ގިނަ ވޯޓް ފޮށިތަކެއްގެ ވަގުތީ ނަތީޖާ މިހާރު އިއުލާނުކޮށް ނިމިފައިވާ އިރު، ޑރ. މުހައްމަދު މުއިއްޒު ވަނީ ބޮޑު ތަފާތަކުން ރައީސް އިބްރާހިމް މުހައްމަދު ސޯލިހްގެ މައްޗަށް ކުރި ހޯއްދަވާފައި
އަމީނިއްޔާ ސްކޫލުގައި ހުރި ތ. ކިނބިދޫ ދާއިރާގެ ވޯޓު ގުނި އިރު ރަނގަޅު ފާހަގަ ޖަހާފައި ހުރި ބައެއް ވޯޓު ކަރުދާސްތައް ބާތިލު ކުރަން ނިންމުމުން މަންދޫބުން ހިތްހަމަ ޖެހުން ފާޅުކުރަނީ. 20 ވޯޓު ބާތިލު ކަމަށް ނިންމާފައިވޭ
ވޯޓުގެ ކަންކަމާ ގުޅިގެން ހައްޔަރުކުރި އެންމެމްވެސް މިހާރު ވަނީ ދޫކޮށްލާފައި: ފުލުހުން
ރިޔާސީ އިންތިހާބާ ގުޅޭ އެކި ކަންކަމުގައި މިހާތަނަށް ހަތް މީހަކު ވަނީ ހައްޔަރުކޮށްފައި. ހަ މީހަކު ދޫކޮށްލާފައިވާ އިރު, މިހާރު ބަންދުގައި ހުރީ ވޯޓު ކަރުދާސް ދެއްކުމާ ގުޅިގެން ހައްޔަރުކުރި މީހަކު: ފުލުހުން
ވޯޓް ފޮށިތައް ގުނަން ފަށައި، ބައެއް ފޮށިތަކުގެ ވަގުތީ ނަތީޖާ އިއުލާން ކުރަން ފަށައިފި
ބައެއް ރަށްރަށުގައި ވޯޓު ފޮށިތައް ބަންދުކޮށް ވޯޓް ގުނުމުގެ ކަންކަން މިހާރު ދަނީ ކުރިއަށް. އެގޮތުން ދ. ރިނބޫދޫގައި ވޯޓު ގުނުން މިހާރު ދަނީ ކުރިޔަށް
ކިޔު ބަންދުކުރި ފަހުން މީހަކު ކިޔުއަށް އަރަން އުޅުމުން އަމީނިއްޔާ ސްކޫލުގައިވެސް ހަމަނުޖެހުން ވަނީ ހިންގާފައި.
ހަމަނުޖެހުން ހިންގާފައިވަނީ ގއ. ވިލިނގިލި ވޯޓު ފޮށީގެ ކިޔުއަށް އަރަން އުޅުނު ބައެއްގެ ސަބަބުން.
ނަމަވެސް ހަމަނުޖެހުން ހިންގި މީހުން މިހާރު ވަނީ އެ ސަރަހައްދު ދޫކޮށް ގޮސްފައި.
ބިލަބޮންގް އިންޓަނޭޝަނަލް ސްކޫލުގައި ބަހައްޓާފައިވާ މައްޗަންގޮޅި ވޯޓު ފޮށީގެ ކިޔު ބަންދުކޮށްފައި ވަނިކޮށް ބަޔަކު ކިޔުއަށް އަރަން އުޅުމުން ހަމަނުޖެހުން ހިންގައިފި.
އެ ސަރަހައްދުގައި ހުރި ވަންގެ ނޫސްވެރިއަކު ބުނި ގޮތުގައި ކިޔުއަށް އަރަން ބޭނުންވާ މީހުން ދަނީ ވޯޓު ލެވެން ޖެހޭނެ ކަމަށް ބުނެ، ކިޔު އަލުން ހުޅުވާލަން ގޮވާލަމުން
ރިޔާސީ އިންތިހާބުގެ ވޯޓުލާ ވަގުތު ހަމަވެ، ވޯޓުލާން ކިޔުއަށް އެރުން ބަންދުކޮށްފި. ބައެއް ވޯޓު ފޮށިތައް ވެސް ދަނީ ބަންދުކުރަމުން
ރިޔާސީ އިންތިހާބުގެ ވޯޓުލުން ހަވީރު 4:00 ގައި ހަމަވާނެ. 4 ގެ ފަހުން ކިޔޫ އަށް ނޭރޭނެ ކަމަށާއި ވޯޓުލުމުގެ ވަގުތު އިތުރު ނުކުރާނެ ކަމަށް އީސީން ވަނީ ބުނެފައި
ވޯޓްގެ ވަގުތު ހަމަވާން ބާކީ ފަސް މިނެޓް. އަދިވެސް ގިނަ ބަޔަކު ވޯޓު ލާފައިނުވާ އިރު، ވޯޓްލާން ގިނަ ބަޔަކު މިހާރު ދަނީ ކިޔޫއަށް އަރަމުން.
މިއަދު މެންދުރުފަހު 2:00 އާ ހަމައަށް 58 ޕަސެންޓް މީހުން ވޯޓުލައިފި: އީސީ
ލައިވް: ރިޔާސީ އިންތިހާބާ ގުޅޭ އެކި ކަންކަމުގެ މިހާތަނަށް ހަ މީހަކު ވަނީ ހައްޔަރުކޮށްފައި. އޭގެ ތެރެއިން ހަތަރު މީހަކު ވަނީ ދޫކޮށްލާފައި: ފުލުހުން
މިއަދު މެންދުރުފަހު 1:00 އާ ހަމައަށް 135،422 މީހުން ވޯޓް ލައިފި. އެއީ 47.95 ޕަސެންޓް މީހުން: އީސީ
ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ އުމަރު ނަސީރު ވަނީ މީގެ ކުޑަ އިރުކޮޅެއް ކުރިން ވޯޓް ލައްވާފައި. އުމަރު ވޯޓް ލައްވާފައިވަނީ އިސްލާމިކް ޔުނިވާސިޓީގައި ހުރި ވޯޓު ފޮއްޓަށް
ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބުގެ، ރަނިންމޭޓް ހުސެއިން އަމްރު ވަނީ މިއަދު މެންދުރުފަހު ވޯޓް ލައްވައިފައި
ވޯޓް ލެއްވުމަށްފަހު ނޫސްވެރިންނާ ބައްދަލުކުރައްވައި އަމްރު ވިދާޅުވީ ފަރުދީ ޒިންމާއެއް ކަމަށް ދެކިގެން ކުރިއަށް އޮތް ފަސް އަހަރަށް ވެރިއަކު ހޮވުމަށް ވޯޓް ދިނުމަކީ މުހިންމު ކަމެއް ކަމަށް
ނައިބު ރައީސް ފައިސަލް ނަސީމް ވަނީ މިއަދު ހެނދުނު 11:00 ގައި ވޯޓް ލައްވައިފައި
އިލެކްޝަންސް ކޮމިޝަނުން ބާއްވާ ޕްރެސް ކޮންފަރެންސް ފަށައިފި.
ޕްރެސް ކޮންފަރެންސްގައި އެ ކޮމިޝަންގެ ނައިބް ރައީސް އިސްމާއިލް ހަބީބު ވިދާޅުވީ، އިންތިހާބާ ގުޅޭ 14 މައްސަލައެއް މިހާތަނަށް ހުށަހަޅާފައިވާ ކަމަށް
ރިޔާސީ އިންތިހާބާ ގުޅިގެން އިލެކްޝަންސް ކޮމިޝަނުން ޕްރެސް ކޮންފަރެންސެއް ބާއްވަން ނިންމައިފި
މީޑިއާތަކަށް އެ ކޮމިޝަނުން ފޮނުވި ދައުވަތުގައި ބުނެފައިވާ ގޮތުން، ޕްރެސް ކޮންފަރެންސް އޮންނާނީ ދަރުބާރުގެ ޕްރެސް ރޫމްގައި މެންދުރު 1:00 ޖަހާއިރު
އެމްޑީޕީގެ ކުރީގެ ރައީސް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރިޔާސީ އިންތިހާބުގައި ވޯޓު ލައްވައިފި
ވޯޓު ލެއްވުމަށްފަހު ނޫސްވެރިންނާ ބައްދަލުކުރައްވައި ނަޝީދު ވިދާޅުވީ މިއީ ވަރަށް މުހިންމު ވޯޓު ކަރުދާސްކޮޅެއް ކަމަށް. އިންތިހާބުގައި ރަނގަޅު ނަތީޖާއެއް ލިބޭނެ ކަމަށް އުންމީދުކުރައްވާ ކަމަށް.
އިލެކްޝަންސް ކޮމިޝަނުން ބުނާ ގޮތުން، ރިޔާސީ އިންތިހާބުގައި ވޯޓުލުމުގެ ޝަރުތު ހަމަވާ މީހުންގެ ތެރެއިން، މިހާތަނަށް 12.81 ޕަސެންޓް މީހުން ވަނީ ވޯޓު ލާފައި. އެއީ 36،163 މީހުން.
އޭގެ ތެރޭގައި ހިމެނެނީ 13،760 އަންހެނުންނާއި 22،403 ފިރިހެނުން.
އިންތިހާބުގެ ކެމްޕެއިން ފެށިގެންވެސް ފެނުނީ ވަރަށް މިނިވަންކަމާ އެކު ހުރިހާ ކެންޑިޑޭޓުންނަށްވެސް ކެމްޕޭން ކުރިގެންދިޔަ މަންޒަރު ކަމަށާއި އެއީ އެމަނިކުފާނު ވަރަށް އުފާކުރައްވާ ކަމެއް ކަމަށް ރައީސް ވިދާޅުވި
"މިއަދު 8 ޖެހި އިރު ވޯޓް ފޮށިތައް ހުޅުވި ވޯޓް ލާން ފުރުސަތު ލިބިިގެންދިޔަ. އެއީ މީގެ ކުރީގެ އިންތިހާބު ތަކުގައި ނުފެންނަ މަންޒަރެއް. އެއްވެސް ތަނެއްގައި ހަމަނުޖެހުމެއް ހިންގައިގެން އެކަހަލަ މާ ބޮޑު ޝަކުވާއެއް އައިސްފައެއް ނެތް. އިންތިހާބު ފެށުނީއްސުރެ މި ހުރިހާ ކަމެއް ދަނީ ވަރަށް ސްމޫތުކޮށް، މިހާތަނަށް ރާއްޖޭގައި ނުދެކޭފަދަ ރަނގަޅު ޑެމޮކްރެޓިކް ހަމަތަކެއްގެ މަތިން އެބަދޭ،" ރައީސް ވިދާޅުވި
ރައީސް ވަނީ ގާނޫނު އަސާސީން ލިބިދީފައިވާ ހައްގު އެންމެ ފުރިހަމަ ގޮތުގައި ހިފައި އެންމެންވެސް ވޯޓް ލުމަށް ނުކުތުމަށް އެދިވަޑައިގެންފައި
ވޯޓް ލެއްވުމަށްފަހު ޖަމާލުއްދީން ސްކޫލް ބޭރުގައި ހުންނަވައި ނޫސްވެރިންނާ ބައްދަލުކުރައްވައި ރައީސް ވިދާޅުވީ މި އިންތިހާބުގައި 88 ޕަސެންޓާއި 90 ޕަސެންޓާ ދެމެދުގެ އަދަދަކަށް މީހުން ވޯޓްލާން ނުކުންނާނެ ކަމަށް. ޓްރެންޑް ފެންނަނީ އެގޮތަށް ކަމަށާއި ރަނގަޅަށް ކުރިއަށްދާނެ ކަމަށް ރައީސް ވިދާޅުވި
އެމްޑީޕީން ފައިސާ ބަހަމުންދާ ކަމަށް ތުހުމަތުކޮށް ނޫސްވެރިއަކު ކުރި ސުވާލަށް ޖަވާބުދެއްވަމުން ރައީސް ވިދާޅުވީ އެމްޑީޕީން ފައިސާ ނުބަހާނެ ކަމަށް
އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ސޯލިހް ވޯޓް ލައްވައިފި. ރައީސް ވޯޓް ލައްވާފައިވަނީ ޖަމާލުއްދީން ސްކޫލުގައި ހުރި ހިންނަވަރުގެ ފޮއްޓަށް
އަމިއްލަ ގޮތުން ވާދަކުރައްވާ ފާރިސް މައުމޫން ވޯޓުލައްވައިފި. އޭނާ ވޯޓް ލައްވާފައިވަނީ އަމީނިއްޔާ ސްކޫލްގައި ހުރި ފޮއްޓަށް
ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް ވަނީ މީގެ ކުޑަ އިރުކޮޅެއް ކުރިން ވޯޓް ލައްވައިފައި. އޭނާ ވޯޓް ލައްވަން ވަޑައިގެންނެވި އިރު، އަރިހުގައި ނަޝީދު ވެސް ވަޑައިގެންނެވި
މޯލްޑިވްސް ނެޝަނަލް ޕާޓީ (އެމްއެންޕީ)ގެ ރައީސް އަދި އެ ޕާޓީގެ ރިޔާސީ ކެންޑިޑޭޓް މުހައްމަދު ނާޒިމް ވޯޓް ލައްވައިފި. އޭނާ ވޯޓް ލައްވާފައިވަނީ ތާޖުއްދީން ސްކޫލުގައި ހުރި ފޮއްޓަށް
ވޯޓު ލެއްވުމަށް ފަހު ނޫސްވެރިންނާ ބައްދަލުކުރައްވައި ވާހަކަދައްކަވަމުން ޑރ. މުހައްމަދު މުއިއްޒު ވަނީ ހަވީރު ވަންދެން މަޑުނުކޮށް، ވީހާ ވެސް އަވަހަކަށް ވޯޓުލުމަށް އެދިވަޑައިގެންފައި.
"4 ޖަހާއިރު އެއީ ވޯޓު ފޮށި ބަންދުކުރާ ގަޑި. އެހެންވީމަ، އެއަށް ވުރެ ކުރިއަށް ވީހާ ވެސް އަވަހަކަށް، ހެނދުނު ހެނދުނާ ވަޑައިގެން، ހުރިހާ ބޭފުޅުން ވެސް އެ ބޭފުޅަކު އިހުތިޔާރު ކުރައްވާ ކެންޑިޑޭޓަކަށް ވޯޓު ލެއްވުމަކީ ގާނޫނީ ގޮތުން އެ ބޭފުޅެއްގެ ވާޖިބެއް އަދި ހައްގެއް،" މުއިއްޒު ވިދާޅުވި.
ޕީއެންސީގެ ރިޔާސީ ކެންޑިޑޭޓް، މާލޭ ސިޓީ މޭޔަރު ޑރ. މުހައްމަދު މުއިއްޒު ވޯޓް ލައްވައިފި
އިލެކްޝަންސް ކޮމިޝަނުން ބުނި ގޮތުގައި ލަންޑަނާއި އަބޫ ދާބީ ފިޔަވައި ވޯޓުލާ ހުރިހާ މަރުކަޒެއްގައި ވެސް ވޯޓުލުން ފެށިފައިވާ ކަމަށް
ރިޔާސީ އިންތިހާބުގައި ވާދަކުރައްވާ ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހިމް ވަނީ ކުޑައިރުކޮޅެއް ކުރިން ވޯޓުލައްވައިފި. ގާސިމް ވޯޓް ލައްވާފައިވަނީ ސޯޝަލް ސެންޓަރުގައި ހުރި މާފަންނު ހުޅަނގު ފޮއްޓަށް
ރައީސް އިބްރާހިމް މުހައްމަދު ސޯލިހް ވޯޓުލައްވަން ވަޑައިގަންނަވާނީ 10:00 އާއި 10:30 އާ ދެމެދު. އެ މަނިކުފާނު ވޯޓުލައްވާނީ ޖަމާލުއްދީން ސްކޫލުގައި ބަހައްޓާފައި ހުރި ޅ. އަތޮޅު ފޮއްޓަށް ކަމަށް އެމްޑީޕީން ބުނެފި
އިދިކޮޅު ކޯލިޝަންގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒުގެ ރަނިންމޭޓް، ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު (ސެމްބެ) މީގެ ކުޑަ އިރުކޯޅެއް ކުރިން ވަނީ ވޯޓް ލައްވައިފައި
މިއަހަރުގެ ރިޔާސީ އިންތިހާބުގެ ވޯޓު ލުން ރާއްޖޭގެ ހުރިހާ ހިސާބެއްގައިވެސް ފަށައިފި. ވޯޓްލުން ފަށާފައިވަނީ ހެނދުނު 8:00ގަ
މިއަދު ބާއްވާ ރިޔާސީ އިންތިހާބުގެ ވޯޓުލުން ހެނދުނު 8:00 ގައި ފަށަން ތައްޔާރުވެފައިވާ އިރު، މިއަދު ހެނދުނު 7:00 ގެ ކުރިން މާލެ އާއި ބައެއް ރަށްރަށުގެ ވޯޓް މަރުކަޒުތައް ކައިރީގައި މީހުން ވަނީ ކިޔޫ ހަދަން ފަށައިފައި
މިއަދު ކުރިއަށްދާ ރިޔާސީ އިންތިހާބަކީ އާ ގާނޫނުއަސާސީ އަށް އަމަލުކުރަން ފެށި ފަހުން މިހާތަނަށް އެންމެ ގިނަ ކެންޑިޑޭޓުން ވާދަކުރައްވާ އިންތިހާބެވެ. ޖުމުލަ އަށް ކެންޑިޑޭޓުން ވާދަކުރައްވާއިރު، ކެންޑިޑޭޓުންނާއި ޕާޓީތަކުގެ މެދުގައި އޮތް ވާދަވެރިކަން ބޮޑެވެ.
އާ ގާނޫނުއަސާސީގެ ދަށުން ފުރަތަމަ ރިޔާސީ އިންތިހާބެއް ބޭއްވީ 2008 އެވެ. އެ އިންތިހާބުގައި ހަ ކެންޑިޑޭޓުން ބައިވެރިވެ ވަޑައިގެންނެވި އިރު، 2013ގެ އިންތިހާބުގައި ވާދަކުރެއްވީ ހަތަރު ކެންޑިޑޭޓުންނެވެ. އަދި 2018 ގައި ދެ ކެންޑިޑޭޓުން ވާދަކުރެއްވިއެވެ.
މި ފަހަރުގެ އިންތިހާބުގައި ވާދަކުރައްވަން ފޯމް ހުށަހެޅުއްވި ބޭފުޅުންގެ ތެރެއިން ކެންޑިޑެސީ ސައްހަ ނޫން ކަމަށް ޕީޕީއެމްގެ ލީޑަރު، ކުރީގެ ރައީސް އަބްދުﷲ ޔާމީންގެ ފޯމެވެ. އެގޮތަށް އިލެކްޝަންސް ކޮމިޝަނުން ކަނޑައެޅީ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާތީއެވެ. އެ ނިންމުމާމެދު ހިތްހަމަނުޖެހިގެން އެ މައްސަލަ ސުޕްރީމް ކޯޓަށްވެސް ހުށަހެޅިއެވެ. ނަމަވެސް ސުޕްރީމް ކޯޓުގެ ފަނޑިޔާރުންގެ އަގުލަބިއްޔަތުން ނިންމެވީ އެ ނިންމުން ރަނގަޅު ކަމަށެވެ. އެއާއެކު ޔާމީނަށް ވަނީ އިންތިހާބުގައި ވާދަ ކުރެއްވުމުގެ ފުރުސަތު ގެއްލިފައެވެ.
މިއަދު ކުރިއަށްދާ އިންތިހާބުގައި 282،395 މީހަކަށް ވޯޓު ދިނުމުގެ ހައްގު ލިިބިފައިވެއެވެ. އަދި ޖުމުލަ 574 ވޯޓު ފޮށި ވަނީ ބަހައްޓައިފައެވެ.
އިލެކްޝަންސް ކޮމިޝަނުން ބުނާ ގޮތުން، އިންތިހާބަށް އެ ކޮމިޝަން އޮތީ ތައްޔާރަށެވެ. ވޯޓު ލުން ފެށޭނީ މިއަދު ހެނދުނު 8:00 ޖަހާއިރެވެ. ވޯޓު ލާ މީހުންގެ ކިއު ބަންދުވާނީ ހަވީރު 4:00 ޖަހާއިރެވެ. ކިއު ބަންދުވާ ގަޑީގައި ކިއުގައި ތިބި އެންމެނަށްވެސް ވޯޓު ލެވޭނެ ކަމަށް އިލެކްޝަންސް ކޮމިޝަނުން ބުނެއެވެ.
ރައީސް، ރިޔާސީ ބަޔާން އިއްވަވާ ޖަލްސާ
އިރާނުން އިސްރާއީލަށް މިސައިލު ހަމަލާތަކެއް، ހައިޕާސޮނިކް މިސައިލުތައް ވެސް ބޭނުންކުރި!
ޔޫރޯ 2024 ފައިނަލް ލައިވް: ސްޕެއިން 2-1 އިންގްލެންޑް (ފުލްޓައިމް)
ޔޫރޯ 2024 ސެމީ ފައިނަލް ލައިވް: ނެދަލޭންޑްސް 1-2 އިންގްލެންޑް (ފުލްޓައިމް)
ޔޫރޯ 2024 ސެމީ ފައިނަލް ލައިވް: ސްޕެއިން 2-1 ފްރާންސް (ފުލްޓައިމް)
