ޔޫރޯ 2024 ސެމީ ފައިނަލް ލައިވް: ނެދަލޭންޑްސް 1-2 އިންގްލެންޑް (ފުލްޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި. 2-1 ގެ ނަތީޖާއަކުން ނެދަލެންޑްސް ބަލިކޮށް، އިންގްލެންޑް ފައިނަލަށް. ފައިނަލުގައި އިންގްލެންޑް ނުކުންނަން ޖެހޭނީ ސްޕެއިނާ ދެކޮޅަށް.

'90 - އިންގްލެންޑުން ގޯލެއް ޖަހައި ލީޑު ހޯދައިފި. ކޯލް ޕާމާ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް އޮލީ ވަޓްކިންސް.

'88 - އިންގްލެންޑަށް ފުރުސަތެއް. ލޫކް ޝޯ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ، ކޯލް ޕާމާ ފޮނުވާލި ހަމަލާ، ނެދަލެންޑްސްގެ ގޯލާ އަމާޒުވެފައެއް ނުވޭ.

'87 - ރެފްރީއަށް ޝަކުވާކުރުމާ ގުޅިގެން ނެދަލެންޑްސް ކެޕްޓަން ވާޖިލް ވެން ޑައިކްއަށް ރީނދޫ ކާޑެއް.

'86 - ކޯޑީ ގަކްޕޯއަށް ކުރި ފައުލަކާ ގުޅިގެން އިންގްލެންޑްގެ ބުކަޔޯ ސަކާއަށް ރީނދޫ ކާޑެއް.

'80 - އިންގްލެންޑުން ދެ ބަދަލެއް. ކެޕްޓަން ހެރީ ކޭން އާއި ފިލް ފޮޑެންގެ ބަދަލުގައި ކުޅެން ނުކުތީ އޮލީ ވަޓްކިންސް އަދި ކޯލް ޕާމާ.

'78 - ނެދަލެންޑްސްގެ ނުރައްކަލެއް. ޕެނަލްޓީ އޭރިއާ ތެރޭ ހުސްކޮށް ހުއްޓައި ލިބުނު ބޯޅައަކުން ޒަވީ ސިމޮންސް ފޮނުވާލި ހަމަލާ އަމާޒުވީ އިންގްލެންޑް ކީޕަރު ޖޯޑަން ޕިކްފޯޑްއާ ދިމާއަށް.

'72 - ސްޓެފަން ޑި ވްރައިއަށް ކުރި ފައުލަކާ ގުޅިގެން އިންގްލެންޑްގެ ޖޫޑް ބެލިންހަމްއަށް ރީނދޫ ކާޑެއް.

'65 - ނެދަލެންޑްސްގެ ނުރައްކަލެއް. ޖޯއީ ވާމަން ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، ކެޕްޓަން ވާޖިލް ވެން ޑައިކް ފޮނުވާލި ހަމަލާ، އިންގްލެންޑް ކީޕަރު ޖޯޑަން ޕިކްފޯޑް ވަނީ ހުޝިޔާރުކަމާއެކު މަތަކޮށްފައި.

ދެވަނަ ހާފުގެ ފުރަތަމަ ދިހަ މިނެޓުގެ ތެރޭގައި ދެ ޓީމުގެ ފަރާތުން ވެސް ފެނުނީ ދާދި ހަމަހަމަ ކުޅުމެއް. ދެ ޓީމަށް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

އިންގްލެންޑް އަދި ނެދަލެންޑްސް އިން ވެސް ދެވަނަ ހާފަށް ނުކުތީ ބަދަލަކާއެކު. އިންގްލެންޑުން ކިއެރެން ޓްރިޕިއާގެ ބަދަލުގައި ކުޅެން ނުކުތީ ލޫކް ޝޯ. އަދި ނެދަލެންޑްސް އިން ޑޮންޔެލް މާލެންގެ ބަދަލުގައި ކުޅެން ނުކުތީ ވޫޓް ވެގްހޯސްޓް.

މެޗުގެ ދެވަނަ ހާފުގެ ކުޅުން ފެށީ ނެދަލެންޑްސް އިން.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1 ގެ ނަތީޖާއަކުން ދެ ޓީމު އެއްވަރުވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'39 - އިންގްލެންޑްގެ އިތުރު ނުރައްކަލެއް. ޕެނަލްޓީ އޭރިއާ ބޭރުން ފިލް ފޮޑެން ފޮނުވާލި ހަމަލާ، ގޯލުގެ ތިރީ ކަނަކަށް އަމާޒުވާން ދަނިކޮށް، ނެދަލެންޑްސް ކީޕަރު ބާޓް ވާބްރުގެން ވަނީ މަތަކޮށްފައި.

'35 - ނެދަލެންޑްސް އިން ބަދަލެއް. އަނިޔާއަކާ ގުޅިގެން މެމްފިސް ޑިޕާއީގެ ބަދަލުގައި ކުޅެން ނުކުތީ ޖޯއީ ވާމަން.

'32 - އިންގްލެންޑްގެ ނުރައްކަލެއް. ޕެނަލްޓީ އޭރިއާ ބޭރުން ފިލް ފޮޑެން ފޮނުވާލި ހަމަލާ އަމާޒުވީ ނެދަލެންޑްސް ގޯލުގެ އަރިމަތީ ދަނޑިއަށް.

'30 - ނެދަލެންޑްސްގެ ނުރައްކަލެއް. ޒަވީ ސިމޮންސް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ، ޑެންޒެލް ޑަމްފްރީސް ބޮލުން ފޮނުވާލި ހަމަލާ އަމާޒުވީ އިންގްލެންޑް ގޯލުގެ ހުރަސް ދަނޑިއަށް.

'23 - އިންގްލެންޑްގެ ނުރައްކަލެއް. ކޮބީ މައިނޫ ދިން ބޯޅައަކުން ޕެނަލްޓީ އޭރިއާ ތެރެއިން ފިލް ފޮޑެން ފޮނުވާލި ހަމަލާ، ގޯލު ލައިންމަތިން ނެދަލެންޑްސް ޑިފެންޑަރު ޑެންޒެލް ޑަމްފްރީސް ވަނީ ދިފާއުކޮށްފައި.

'18 - އިންގްލެންޑް ކެޕްޓަން ހެރީ ކޭންގެ ޕެނަލްޓީ ކާމިޔާބުކޮށް، ނަތީޖާ ހަމަހަމަކޮށްފި. އޭނާގެ ޕެނަލްޓީ އަމާޒުކޮށްލީ ނެދަލެންޑްސް ގޯލުގެ ތިރީ ކަނަށް.

'16 - ވީއޭއާރްގެ އެހީގައި ރެފްރީ ނިންމީ ނެދަލެންޑްސްގެ ޑެންޒެލް ޑަމްފްރީސް، އިންގްލެންޑް ކެޕްޓަން ހެރީ ކޭންއަށް ފައުލްކޮށްފައިވާ ކަމަށް، އިންގްލެންޑަށް ޕެނަލްޓީއެއް.

ކޭން އެ ބޯޅަ ފޮނުވާލި އިރު، ޕެނަލްޓީ އޭރިއާ ތެރެއިން ޑެންޒެލް ޑަމްފްރީސް ފައުލްކުރިތޯ ބެލުމަށް ރެފްރީ ވީއޭއާރުގެ އެހީ ހޯދަނީ.

'14 - އިންގްލެންޑްގެ ނުރައްކަލެއް. ބުކަޔޯ ސަކާ ފޮނުވާލި ހަމަލާއެއް ނެދަލެންޑްސްގެ ޑިފެންސުން ބްލޮކްކުރުމާއެކު ޕެނަލްޓީ އޭރިއާ ތެރެއިން ލިބުނު ބޯޅައަކުން ހުސްކޮށް ހުރެ ކެޕްޓަން ހެރީ ކޭން ފޮނުވާލި ހަމަލާ، ނެދަލެންޑްސްގެ ގޯލާ އަމާޒުވެފައެއް ނުވޭ.

'13 - އިންގްލެންޑުގެ ނުރައްކަލެއް. ޖޫޑް ބެލިންހަމް ދިން ބޯޅައަކުން ކެޕްޓަން ހެރީ ކޭން ދުރުން ފޮނުވާލި ހަމަލާ، ނެދަލެންޑްސް ކީޕަރު ބާޓް ވާބްރުގެން ވަނީ މަތަކޮށްފައި.

'7 - ނެދަލެންޑްސް އިން ގޯލެއް ޖަހައި ލީޑު ހޯދައިފި. ޑެކްލަން ރައިސް އަތުން ބޯޅަ އަތުލައިގެން ކުރިއަށް ޖެހި، ޕެނަލްޓީ އޭރިއާ ބޭރުން ފޮނުވާލި ހަމަލާއަކުން ނެދަލެންޑްސްއަށް އެ ގޯލު ކާމިޔާބުކޮށްދިނީ ޒަވީ ސިމޮންސް. އޭނާ ބޯޅަ އަމާޒުކޮށްލާފައިވަނީ އިންގްލެންޑް ގޯލުގެ މަތީ ކަނަކަށް.

މެޗުގެ ކުޅުން ފަށައިފި. ކިކްއޯފް ކުރީ އިންގްލެންޑުން.

މި މެޗަށް ދެ ޓީމުން ވެސް ބަދަލެއް ފެނިގެންދޭ. ނެދަލެންޑްސް އިން ވަނީ ސްޓީވަން ބާގްވައިންގެ ބަދަލުގައި ޑޮންޔެލް މަލެންއަށް ފުރަތަމަ 11 އިން ފުރުސަތު ދީފައި. މަލެން އަކީ ގަދަ 16 ގައި ރުމޭނިއާއާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ނުކުމެ ފަހު ދިހަ މިނެޓުގެ ތެރޭގައި ނެދަލެންޑްސްއަށް ދެ ގޯލު ކާމިޔާބުކޮށްދިން ކުޅުންތެރިއެއް. އިންގްލެންޑުން ފާހަގަކޮށްލެވޭ ބަދަލަކީ ކުއާޓާ ފައިނަލް މެޗަށް ސަސްޕެންޝަނުގައި ހުރި ޑިފެންޑަރު މާކް ގުއޭ އަށް ފުރަތަމަ 11 އިން އަލުން ފުރުސަތު ދިނުން.

އިންގްލެންޑްގެ ފުރަތަމަ 11:

ނެދަލެންޑްސްގެ ފުރަތަމަ 11: