English Edition Dhivehi Edition
ޔޫރޯ 2024

ޔޫރޯ 2024 ފައިނަލް ލައިވް: ސްޕެއިން 2-1 އިންގްލެންޑް (ފުލްޓައިމް)

15 Jul 02:10

މުބާރާތުގެ އެންމެ މޮޅު ކުޅުންތެރިޔަކަށް ސްޕެއިންގެ ރޮޑްރީ.

15 Jul 02:10

އެންމެ މޮޅު ޒުވާން ކުޅުންތެރިޔަކަށް ސްޕެއިންގެ ލަމީން ޔަމާލް.

15 Jul 01:56

މެޗުގެ އުސްއަލިތައް

  • ފުރަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން ކުޅުނީ ސްޕެއިނުން
  • އިންގްލެންޑުން މަސައްކަތްކުރީ ޑިފެންސަށް ފައިބައި، ކައުންޓާ އެޓޭކުގައި ނުރައްކާކުރަން
  • ސްޕެއިނުން ހަމަލާތަކެއް ފޮނުވާލި ނަމަވެސް، އިންގްލެންޑުގެ ގޯލަށް ނުރައްކާކުރެވިފައެއް ނުވޭ
  • މޮރާޓާ އާއި ނިކޯ ވިލިއަމްސް ލަމީން ޔަމާލް އަދި ފަބިއަން ރުއިޒްގެ ހަމަލާއެއް ވެސް ވަނީ ބްލޮކްވެފައި
  • އެންމެ ހުސް ފުރުސަތެއް ލިބުނީ އިންގްލެންޑަށް، ފޮޑެންގެ އެ ހަމަލާގެ ހުރަހަކަށްވީ ސްޕެއިން ކީޕަރު ސިމޮން
  • ދެވަނަ ހާފު ފެށިތާ ދެ މިނެޓު ތެރޭ ސްޕެއިނުން ވަނީ ގޯލެއް ޖަހައި ލީޑު ހޯދާފައި
  • ސްޕެއިނަށް އެ ގޯލު ކާމިޔާބުކޮށްދިނީ ނިކޯ ވިލިއަމްސް
  • އޭގެ މާގިނައިރުތަކެއް ނުވެ، ސްޕެއިނަށް ކައިރިކައިރީގައި ގިނަ ފުރުސަތުތަކެއް ލިބުނު އޮލްމޯގެ ހަމަލާ ގޯލާ އަމާޒުވެފައި ނުވާ އިރު، މޮރާޓާ ފޮނުވާލި ހަމަލާ ގޯލު ކުރިމަތިން އިންގްލެންޑް ޑިފެންޑަރު ސްޓޯންސް ވަނީ ދިފާއުކޮށްފައި
  • ސްޕެއިންގެ ނިކޯ ވިލިއަމްސް ފޮނުވާލި ހަމަލާއެއް ގޯލުގެ އަރިމަތީ ދަނޑިކައިރިން ބޭރަށް ދިޔަ
  • އޭގެ ފަހުން އިންގްލެންޑް އަދި ސްޕެއިންގެ ނުރައްކަލެއް ފެނުނު
  • އިންގްލެންޑުން ވަނީ ގޯލެއް ޖަހައި ނަތީޖާ ހަމަހަމަކޮށްފައި
  • އިންގްލެންޑުން ނަތީޖާ ހަމަހަމަކުރީ ކޯލް ޕާމާގެ ހިތްގައިމު ގޯލަކުން
  • އޭގެ ފަހުން ސްޕެއިނުން ރީތި ކުޅުމަކާއެކު އަލުން ނުރައްކާކުރަން ފެށި
  • މެޗު ނިމެން ހަތަރު މިނެޓަށް ވެފައިވަނިކޮށް، ސްޕެއިނަށް ތަށި ޔަގީންވީ އޮޔާޒަބާލްގެ ގޯލުން
15 Jul 01:53

މެޗުގެ ކުޅުން ނިންމާލައިފި. އިންގްލެންޑް ބަލިކޮށް، ޔޫރޯގެ ޗެމްޕިއަންކަން ސްޕެއިނަށް.

15 Jul 01:51

'90+2 - ނާޗޯއަށް ކުރި ފައުލަކާ ގުޅިގެން އިންގްލެންޑްގެ އޮލީ ވޮޓްކިންސްއަށް ރީނދޫ ކާޑެއް.

15 Jul 01:50

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

15 Jul 01:50

'90 - އިންގްލެންޑްގެ ނުރައްކަލެއް. ކޯލް ޕާމާ ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ ޑެކްލަން ރައިސް ބޮލުން ފޮނުވާލި ހަމަލާ، ސްޕެއިން ކީޕަރު އުނައި ސިމޮން ވަނީ މަތަކޮށްފައި. ރީބައުންސް ބޯޅައިން މާކޭ ގޭހީ ބޮލުން ފޮނުވާލި ހަމަލާ، ގޯލު ލައިންމަތިން ދިފާއުކުރީ ސްޕެއިންގެ ޑެނީ އޮލްމޯ.

15 Jul 01:48

'89 - ސްޕެއިނުން ވެސް ބަދަލެއް. ޔަމާލްގެ ބަދަލުގައި ކުޅެން ނުކުތީ މިކެލް މެރީނޯ.

15 Jul 01:48

'89 - އިންގްލެންޑުން ބަދަލެއް. ފިލް ފޮޑެންގެ ބަދަލުގައި ކުޅެން ނުކުތީ އިވާން ޓޯނީ.

15 Jul 01:46

'86 - ސްޕެއިނުން ގޯލެއް ޖަހައި އަލުން ލީޑު ހޯދައިފި. މާކް ކުކުރެއާ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ފޮނުވާލި ހަމަލާއަކުން ސްޕެއިނަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް މިކެލް އޮޔާޒަބަލް.

15 Jul 01:42

'83 - ސްޕެއިނުން ބަދަލެއް. ލެ ނޯމަންޑްގެ ބަދަލުގައި ކުޅެން ނުކުތީ ނާޗޯ.

15 Jul 01:41

'82 - ސްޕެއިންގެ ނުރައްކަލެއް. ޑެނީ އޮލްމޯ ދިން ބޯޅައަކުން ޕެނަލްޓީ އޭރިއާ ތެރެއިން ލަމީން ޔަމާލް ފޮނުވާލި ހަމަލާ، އިންގްލެންޑް ކީޕަރު ޖޯޑަން ޕިކްފޯޑް ވަނީ މަތަކޮށްފައި.

15 Jul 01:35

15 Jul 01:32

'73 - އިންގްލެންޑުން ގޯލެއް ޖަހައި ނަތީޖާ ހަމަހަމަކޮށްފި. ބުކަޔޯ ސަކާ ދިން ބޯޅައަކުން ޕެނަލްޓީ އޭރިއާ ބޭރުން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ކޯލް ޕާމާ. އޭނާގެ ބޯޅަ އަމާޒުކޮށްލީ ސްޕެއިން ގޯލުގެ ތިރީ ކަނަކަށް.

15 Jul 01:29

'71 - އިންގްލެންޑުން ބަދަލެއް. ކޮބީ މައިނޫގެ ބަދަލުގައި ކުޅެން ނުކުތީ ކޯލް ޕާމާ.

15 Jul 01:28

'70 - ސްޕެއިންގެ ހަމަލާއެއް. ޕެނަލްޓީ އޭރިއާ ބޭރުން ފަބިއަން ރުއިޒް ފޮނުވާލި ބާރު ހަމަލާ ދިޔައީ އިންގްލެންޑް ގޯލުގެ ހުރަސް ދަނޑިމަތިން ބޭރަށް.

15 Jul 01:26

'67 - ސްޕެއިނުން ބަދަލެއް. އަލްވާރޯ މޮރާޓާގެ ބަދަލުގައި ކުޅެން ނުކުތީ މިކެލް އޮޔާޒަބަލް.

15 Jul 01:26

15 Jul 01:26

'66 - ސްޕެއިންގެ ނުރައްކާތެރި ކައުންޓާ އެޓޭކެއް. ޑެނީ އޮލްމޯ ދިން ރީތި ބޯޅައަކުން ޕެނަލްޓީ އޭރިއާ ބޭރުން ލަމީން ޔަމާލް ފޮނުވާލި ހަމަލާ، އިންގްލެންޑް ކީޕަރު ޖޯޑަން ޕިކްފޯޑް ވަނީ ހުޝިޔާރުކަމާއެކު މަތަކޮށްފައި.

15 Jul 01:23

'64 - އިންގްލެންޑްގެ ނުރައްކަލެއް. ރީތިކޮށް އެނބުރިލާފައި ޕެނަލްޓީ އޭރިއާ ބޭރުން ޖޫޑް ބެލިންހަމް ފޮނުވާލި ހަމަލާ ދިޔައީ ސްޕެއިން ގޯލުގެ އަރިމަތީ ދަނޑިކައިރިން ބޭރަށް.

15 Jul 01:20

'61 - އިންގްލެންޑުން ބަދަލެއް. ކެޕްޓަން ހެރީ ކޭންގެ ބަދަލުގައި ކުޅެން ނުކުތީ އޮލީ ވޮޓްކިންސް.

15 Jul 01:16

'56 - ސްޕެއިންގެ އިތުރު ނުރައްކަލެއް. ޕެނަލްޓީ އޭރިއާ ބޭރުން ނިކޯ ވިލިއަމްސް ފޮނުވާލި ހަމަލާ ދިޔައީ އިންގްލެންޑް ގޯލުގެ އަރިމަތީ ދަނޑިކައިރިން ބޭރަށް.

15 Jul 01:16

'55 - ސްޕެއިންގެ ނުރައްކަލެއް. ޕެނަލްޓީ އޭރިއާ ތެރެއިން ހުސްވެލުމަށްފަހު، ކެޕްޓަން އަލްވާރޯ މޮރާޓާ ފޮނުވާލި ހަމަލާ، ގޯލު ކުރިމަތިން އިންގްލެންޑް ޑިފެންޑަރު ޖޯން ސްޓޯންސް ވަނީ ބްލޮކްކޮށްފައި.

15 Jul 01:12

'53 - މާޓިން ޒުބިމެންޑީއަށް ކުރި ފައުލަކާ ގުޅިގެން އިންގްލެންޑްގެ ޑެކްލަން ރައިސްއަށް ރީނދޫ ކާޑެއް.

15 Jul 01:11

15 Jul 01:08

'49 - ސްޕެއިނަށް އިތުރު ފުރުސަތެއް. ނިކޯ ވިލިއަމްސް ދިން ބޯޅައަކުން ޕެނަލްޓީ އޭރިއާ ތެރެއިން ޑެނީ އޮލްމޯ ފޮނުވާލި ހަމަލާ، އިންގްލެންޑްގެ ގޯލާ އަމާޒުވެފައެއް ނުވޭ.

15 Jul 01:07

'47 - ސްޕެެއިނުން ގޯލެއް ޖަހައި ލީޑު ހޯދައިފި. ލަމީން ޔަމާލް ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން ސްޕެއިނަށް އެ ގޯލު ކާމިޔާބުކޮށްދިނީ ނިކޯ ވިލިއަމްސް. އޭނާގެ ބޯޅަ އަމާޒުކޮށްލީ ގޯލުގެ ތިރީ ކަނަކަށް.

15 Jul 01:05

ސްޕެއިނުން ނުކުތީ ބަދަލަކާއެކު. ރޮޑްރީގެ ބަދަލުގައި ކުޅެން ނުކުތީ މާޓިން ޒުބިމެންޑީ.

15 Jul 01:04

ދެވަނަ ހާފުގެ ކުޅުން ފެށީ ސްޕެއިނުން.

15 Jul 00:52

ފުރަތަމަ ހާފުގެ އުސްއަލިތައް:

  • ފުރަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން ކުޅުނީ ސްޕެއިނުން
  • އިންގްލެންޑުން މަސައްކަތްކުރީ ޑިފެންސަށް ފައިބައި، ކައުންޓާ އެޓޭކުގައި ނުރައްކާކުރަން
  • ސްޕެއިނުން ހަމަލާތަކެއް ފޮނުވާލި ނަމަވެސް، އިންގްލެންޑުގެ ގޯލަށް ނުރައްކާކުރެވިފައެއް ނުވޭ
  • މޮރާޓާ އާއި ނިކޯ ވިލިއަމްސް ލަމީން ޔަމާލް އަދި ފަބިއަން ރުއިޒްގެ ހަމަލާއެއް ވެސް ވަނީ ބްލޮކްވެފައި
  • އެންމެ ހުސް ފުރުސަތެއް ލިބުނީ އިންގްލެންޑަށް، ފޮޑެންގެ އެ ހަމަލާގެ ހުރަހަކަށްވީ ސްޕެއިން ކީޕަރު ސިމޮން
15 Jul 00:47

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.

15 Jul 00:47

'45+1 - އިންގްލެންޑުގެ ނުރައްކަލެއް. ޕެނަލްޓީ އޭރިއާ ތެރޭ ހުސްކޮށް ހުއްޓައި ލިބުނު ބޯޅައަކުން ފިލް ފޮޑެން ފޮނުވާލި ހަމަލާ، ސްޕެއިން ކީޕަރު އުނައި ސިމޮން ވަނީ މަތަކޮށްފައި.

15 Jul 00:46

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

15 Jul 00:45

'44 - އިންގްލެންޑްގެ ހަމަލާއެއް. ޖޫޑް ބެލިންހަމް ދިން ބޯޅައަކުން ޕެނަލްޓީ އޭރިއާ ބޭރުން ހެރީ ކޭން ފޮނުވާލި ހަމަލާ، ސްޕެއިން މިޑްފީލްޑަރު ރޮޑްރީ ވަނީ ބްލޮކްކޮށްފައި.

15 Jul 00:42

އިންގްލެންޑް ކުޅުންތެރިން ވަރަށް ބޮޑަށް ފަހަތަށް ފައިބައިގެން ކުޅެމުންދާތީ، ގޯލު ޖަހާނެ ފުރުސަތުތައް ތަނަވަސްކުރުމަށް ސްޕެއިނަށް ވަނީ އުނދަގޫތަކަކާ ކުރިމަތިލާން ޖެހިފައި. އިންގްލެންޑުން މަސައްކަތްކުރަނީ ކައުންޓާ އެޓޭކުގައި ނުރައްކާކުރުމަށް.

15 Jul 00:31

'30 - ޑެކްލަން ރައިސްއަށް ކުރި ފައުލަކާ ގުޅިގެން ސްޕެއިންގެ ޑެނީ އޮލްމޯއަށް ރީނދޫ ކާޑެއް.

15 Jul 00:28

'28 - ސްޕެއިންގެ ހަމަލާއެއް. ޕެނަލްޓީ އޭރިއާ ބޭރުން ފަބިއަން ރުއިޒް ފޮނުވާލި ހަމަލާ، އިންގްލެންޑް ޑިފެންޑަރު މާކް ގޭހީ ވަނީ ބްލޮކްކޮށްފައި.

15 Jul 00:27

15 Jul 00:25

'25 - ފަބިއަން ރުއިޒްއަށް ކުރި ފައުލަކާ ގުޅިގެން އިންގްލެންޑް ކެޕްޓަން ހެރީ ކޭންއަށް ރީނދޫ ކާޑެއް.

15 Jul 00:24

'23 - ސްޕެއިންގެ ހަމަލާއެއް. ޑެނީ އޮލްމޯ ދިން ބޯޅައަކުން ޕެނަލްޓީ އޭރިއާ ތެރެއަށް ވަނުމަށްފަހު، ލަމީން ޔަމާލް ފޮނުވާލި ހަމަލާ، އިންގްލެންޑް ޑިފެންޑަރު މާކް ގޭހީ ވަނީ ބްލޮކްކޮށްފައި.

15 Jul 00:22

މެޗުގެ ފުރަތަމަ 20 މިނެޓުގެ ތެރޭގައި ގިނަ ވަގުތު ބޯޅަ ހިފަހައްޓައިގެން ކުޅުނީ ސްޕެއިނުން. ނަމަވެސް ދެ ޓީމަށް ވެސް ގޯލު ޖަހާނެ ރަނގަޅު ފުރުސަތެއް އަދި ތަނަވަސްކުރެވިފައެއް ނުވޭ.

15 Jul 00:13

'13 - ސްޕެއިންގެ ހަމަލާއެއް. ރޮޑްރީ ޖައްސާލި ބޯޅައަކުން ޕެނަލްޓީ އޭރިއާ ތެރެއިން ރޮބިން ލެ ނޯމަންޑް ފޮނުވާލި ހަމަލާ، އިންގްލެންޑްގެ ގޯލާ އަމާޒުވެފައެއް ނުވޭ.

15 Jul 00:12

'12 - ސްޕެއިންގެ ނުރައްކަލެއް. ފަބިއަން ރުއިޒް ދިން ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ނިކޯ ވިލިއަމްސް ފޮނުވާލި ހަމަލާ، އިންގްލެންޑް ޑިފެންޑަރު ޖޯން ސްޓޯންސް ވަނީ ބްލޮކްކޮށްފައި.

15 Jul 00:08

15 Jul 00:05

'5 - ނިކޯ ވިލިއަމްސް ނަގައިދިން ހުރަސް، ޕެނަލްޓީ އޭރިއާ ތެރެއިން ސްޕެއިން ކެޕްޓަން އަލްވާރޯ މޮރާޓާއަށް ލިބުމުގެ ކުރިން އިންގްލެންޑް ޑިފެންޑަރު ޖޯން ސްޓޯންސް ދިފާއުކޮށްފި.

15 Jul 00:04

މި މެޗުގައި ވެސް ސްޕެއިނުން ކުޅެމުންދަނީ އެޓީމުގެ ރަސްމީ ކުޅުން. ގިނަ ވަގުތު ބޯޅަ ހިފަހައްޓައިގެން ސްޕެއިނުން ކުޅެމުންދާ އިރު، އިންގްލެންޑުން ދަނީ ޕްރެސް ކުރުމަށް މަސައްކަތްކުރޭ.

15 Jul 00:00

މެޗުގެ ކުޅުން ފަށައިފި. ކިކްއޯފް ކުރީ އިންގްލެންޑުން.

14 Jul 23:59

މި މުބާރާތުގައި އެންމެ ބޮޑަށް ވިދާލި އެއް ކުޅުންތެރިޔަކީ ސްޕެއިންގެ ލަމީން ޔަމާލް. އޭނާ 16 އަހަރުގެ ކުޅުންތެރިއެއްގެ ގޮތުގައި މުބާރާތަށް ނުކުތް ނަމަވެސް، އިއްޔެ އޭނާއަށް ވަނީ 17 އަހަރު ފުރިފައި.

14 Jul 23:53

ސަސްޕެންޝަނަށްފަހު ސްޕެއިންގެ ދެ ޑިފެންޑަރުން ކަމަށްވާ ޑެނިއެލް ކާވަހާލް އަދި ރޮބިން ލެ ނޯމަންޑް ވަނީ ފުރަތަމަ 11 ގައި ހިމެނިފައި. އިންގްލެންޑުން ބަދަލަކަށް ފެންނަނީ ކިއެރެން ޓްރިޕިއާގެ ބަދަލުގައި ލޫކް ޝޯއަށް ފުރަތަމަ 11 އިން ފުރުސަތު ދިނުން.

14 Jul 23:51

އިންގްލެންޑްގެ ފުރަތަމަ 11:

  • ޖޯޑަން ޕިކްފޯޑް - ގޯލްކީޕަރު
  • ބުކަޔޯ ސަކާ
  • ޖޯން ސްޓޯންސް
  • މާކް ގޭހީ
  • ލޫކް ޝޯ
  • ކައިލް ވޯކާ
  • ކޮބީ މައިނޫ
  • ފިލް ފޮޑެން
  • ޑެކްލަން ރައިސް
  • ޖޫޑް ބެލިންހަމް
  • ހެރީ ކޭން - ކެޕްޓަން
14 Jul 23:50

ސްޕެއިންގެ ފުރަތަމަ 11:

  • އުނައި ސިމޮން - ގޯލްކީޕަރު
  • ރޮބިން ލެ ނޯމަންޑް
  • އައިމެރިކް ލަޕޯޓް
  • ޑެނިއެލް ކާވަހާލް
  • މާކް ކުކުރެއާ
  • ލަމީން ޔަމާލް
  • ނިކޯ ވިލިއަމްސް
  • ރޮޑްރީ
  • ޑެނީ އޮލްމޯ
  • ފަބިއަން ރުއިޒް
  • އަލްވާރޯ މޮރާޓާ - ކެޕްޓަން

ޔޫރޯ 2024 ގެ ފައިނަލުގައި ސްޕެއިނާއި އިންގްލެންޑް ވާދަކުރާ މެޗުގެ ލައިވް ބްލޮގަށް "ވަން ސްޕޯޓްސް"ގެ ކިޔުންތެރިންނަށް މަރުހަބާ!

މިއީ ޔޫރޯ ފުޓުބޯޅަ ތާރީހުގައި ކުޅޭނެ 17 ވަނަ ފައިނަލް. ފައިނަލަށް ކުރެވެމުން އަންނަ އިންތިޒާރު ބޮޑު. އިންގްލެންޑުން އެގައުމުގެ ތާރީހުގައި ވެސް ފުރަތަމަ ފަހަރަށް ޔޫރޯ ތަށްޓެއް ހޯދަން ނުކުންނަ އިރު، ސްޕެއިން ނުކުންނަނީ އެގައުމުގެ ރަން ޖީލުން އެންމެފަހުން ހޯދި 2012 ވަނަ އަހަރު ޔޫރޯގެ ކާމިޔާބީ ތަކުރާރު ކުރުމަށް. އަދި ސްޕެއިން މިރޭ ތަށި ހޯދައިފިނަމަ އެގައުމު ވެގެންދާނީ ޔޫރޯގެ ތާރީހުގައި އެންމެ ގިނަ މުބާރާތް ކާމިޔާބު ކުރި ޓީމަށް. މީގެ ކުރިން އެންމެ ގިނަ ޔޫރޯ ކާމިޔާބުކުރުމުގެ ރެކޯޑު އޮތީ ސްޕެއިނާއި ޖަރުމަނު އަތުގައި. އެއީ ތިން ޓަށްޓާއެކު.

ސައުތުގޭޓް ހިތްދަތި ޕެނަލްޓީގެ ހަނދާން ނައްތާލުމަށް: "ފެއަރީޓޭލް" ގަބޫލެއް ނުކުރޭ

ޔޫރޯގައި އެންމެ ކާމިޔާބު އެއް ގައުމު ޖަރުމަނުގައި ޔޫރޯ ކުޅެވެމުންދާ އިރު، މިފަހަރުގެ ޔޫރޯ ފައިނަލްގައި އިންގްލެންޑާ ދެކޮޅަށް ސްޕެއިން ނުކުންނާނީ ބާލިންގެ އޮލިމްޕިކްސް ސްޓޭޑިއަމްގައި. މިއީ އިންގްލެންޑުން ޖެހިޖެހިގެން ކުޅޭ ޔޫރޯގެ ދެވަނަ ފައިނަލް މެޗު. އެންމެފަހުން ޔޫރޯ 2020 ގެ ފައިނަލުގައި އިންގްލެންޑުން ކުޅުނު ފައިނަލުގައި އިޓަލީ ކައިރިން ބަލިވީ 3-2 ގެ ނަތީޖާއަކުން. އެއީ ޕެނަލްޓީގައި.

ސައުތުގޭޓަކީ 1966 ވަނަ އަހަރު ވޯލްޑް ކަޕަށްފަހު، އެގައުމުގެ ގައުމީ ޓީމު ގޮވައިގެން ފައިނަލަކަށް ދިޔަ ހަމައެކަނި ކޯޗު. އިންގްލެންޑަށް ތަށްޓެއް ނުލިބޭތާ 58 އަހަރު ވެފައިވާ އިރު، މިރޭ އެ އިންތިޒާރަށް ނިމުން ގެންނަން ނުކުންނަނީ އަމިއްލަ ގައުމުގައި މާޔޫސްވި ކޯޗެއް. 1996 ވަނަ އަހަރު އިންގްލެންޑުގައި ޖަރުމަނުން ޔޫރޯ ކާމިޔާބު ކުރި. އެ އަހަރު ޖަރުމަނުން ޔޫރޯ ތަށްޓާ ހަމައަށް ދިޔައީ ސެމީ ފައިނަލްގައި ޕެނެލްޓީ ޖަހައިގެން އިންގްލެންޑް ކަޓުވާލުމަށްފަހު. ޔޫރޯގެ ތަށި އިންގްލެންޑަށް އަދި ހޯދިފައި ނުވާއިރު، ޖަރުމަނާ ދެކޮޅަށް ކުޅުނު 1996 ގެ ސެމީމެޗުގެ ފުރިހަމަ ވަގުތު ހަމަވި އިރު ނަތީޖާ އެއްވަރު ވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެން.

ދެޓީމުންވެސް ފުރަތަމަ ފަސް ޕެނެލްޓީ ކާމިޔާބުކޮށް ޕެނެލްޓީ ޝޫޓްއައުޓް ދިގުލައިގެން ދިޔަ އިރު، ހަވަނަ ޕެނެލްޓީ ޖަރުމަނުން ވެއްދި ނަމަވެސް، އިންގްލެންޑަށް ވީ ނާކާމިޔާބު. އެ ފަހަރު އިންގްލެންޑަށް ނާކާމިޔާބު ވި ޕެނެލްޓީ ޖެހީ މިހާރުގެ ކޯޗު ސައުތުގޭޓް.

މިރޭގެ މެޗަށް ނުކުންނަ އިރު، ސައުތުގޭޓަށް އޮތީ ޖަރުމަނުގެ ފަސްގަނޑުގައި ގައުމަށް، އެފަހަރު ނުލިބުނު ޔޫރޯ ހޯދައިދިނުން. އެހެންނަމަވެސް، ސައުތުގޭޓްގެ ނަޒަރުގައި އެކަހަލަ ފެއަރީޓޭލް އޭނާ ގަބޫލެއް ނުކުރޭ.

"އަހަރެން އެކަހަލަ ފެއަރީޓޭލް ގަބޫލެއް ނުކުރަން. އަހަންނަކީ ހުވަފެންތައް ދެކެ، ހުވަފެންތައް ހަގީގަތަކަށް ހަދަން މަސައްކަތް ކުރުން ގަބޫލުކުރާ މީހެއް. އަހަރެމެން މިފަހަރު ޔޫރޯއަށް ނުކުތީ ބޮޑެތި އުންމީދުތަކަކާ އެކުގައި. އަދި މި ޔޫރޯގެ މުހިއްމުކަން ވެސް ދަނެގެން. އެހެން އެކަން އޮތަސް، ހުވަފެންތައް ހާސިލްކުރަން ޖެހޭނެ މަސައްކަތް ކުރަން،" ސައުތުގޭޓް މެޗު ކުރިން ބުނި.

ފާޑުކިޔުންތައް އަމާޒުވި ކޯޗު ޑެ ލަ ފުއެންޓޭ ފައިނަލަށް، ބޭނުންވަނީ ސްޕެއިން ތާރީހު ލިޔެލަން

ސްޕެއިނުން 2012 ވަނަ އަހަރަށްފަހު ފުރަތަމަ ފަހަރަށް ޔޫރޯގެ ފައިނަލަށް މިރޭ ނުކުންނާނީ ރެކޯޑު ހަތަރު ވަނަ ޔޫރޯ ތަށްޓެއް ހޯދުމަށް. މިހާތަނަށް މުބާރާތުގައި ސްޕެއިންގެ ފަރާތުން ހިތްގައިމު ކުޅުމެއް ފެނިގެން ގޮސްފައިވާ އިރު، އެޓީމުން ވަނީ ކުޅުނު ހަ މެޗުންވެސް މޮޅުވެފައި. ސްޕެއިނަކީ ހަ މެޗުން މިފަހަރުގެ ޔޫރޯގައި މޮޅުވެފައި އޮތް ހަމައެކަނި ޓީމު. އެހެން ނަމަވެސް، ކޯޗު ޑެ ލަ ފުއެންޓޭގެ ނަޒަރުގައި ސްޕެއިނަކީ ފެވަރިޓުންނެއް ނޫން.

"އަހަރެމެން މިތިބީ ވަރަށް ހަމަޖެހިގެން. އަހަރެމެންގެ އަމާޒު ހާސިލު ކުރަން ފޯކަސް ގެއްލުވައެއް ނުލާނަން. އަހަރެމެންނަށް ކޮންޓްރޯލް ކުރެވޭ ކަންތައް ކޮންޓްރޯލް ކުރުމަށް ވިސްނާނީ. އަހަރެމެންނަކީ ފެވަރިޓުންގެ ގޮތުގައި ނުބުނެވޭނެ. ފައިނަލް ވެގެންދާނީ ހަމަހަމަ ބެލެންސް މެޗަކަށް. އަހަރެމެން ފެވަރިޓުން ބަލައިގެން މިރޭގެ މެޗަށް ނުކުންނަން ބޭނުމެއް ނޫން،" ޑެ ލަ ފުއެންޓޭ މެޗުގެ ކުރިން ބުނި.

އޭނާ ބުނީ ސްޕެއިނަށް އެންމެ މުހިއްމު ކަމަކީ ސްޕެއިންގެ ގޮތުގައި އޮތުން ކަމަށާއި ސްޕެއިނުން އިންގްލެންޑް ވެގެން ސްޓައިލް ބަދަލުކޮށް ނަހަދާނެ ކަމަށް.

މިފަހަރުގެ ޔޫރޯ ކުރިން ސްޕެއިން ކޯޗު، ލުއިސް ޑެ ލަ ފުއެންޓޭގެ ނަން ފުޓުބޯޅައިގައި މާ ބޮޑަކަށް ހިނގާފައެއް ނުވޭ. ފާޑަކަށް އާ މޫނެކެވެ. އެހާ ބޮޑު ފަސްމަންޒަރެއްވެސް ނެތް. ތަޖުރިބާއެއްވެސް ނެތް. ޑެ ލަ ފުއެންޓޭ ކޯޗަކަށް ނެރުމުން ސްޕެއިން ފެޑަރޭޝަނުން ކީއްކުރަންތޯ، މުބާރާތުގެ ކުރިން ބަޔަކު ސުވާލުވެސް އުފެއްދި. އެސޯސިއޭޝަން ނާޒަކު ހާލަތެއްގައި އޮތް އޮތުމުން ޓީމަށް އޮތް ޕްރެޝަރު ޑެ ލަ ފުއެންޓޭއަށް ހޭންޑްލް ނުކުރެވޭނެ ކަމަށްވެސް ގިނަ ބަޔަކު ދެކުނު.

ކޯޗިން ކެރިއަރު 1997 ވަނަ އަހަރު ފެށި ލުއިސް ޑެ ލަ ފުއެންޓޭ އަކީ މާބޮޑަށް ފާހަގަކޮށްލެވޭ ކޯޗެއް ނޫން. ވޯލްޑް ކަޕް 2022 ގެ ނާކާމިޔާބީއާއެކު ލުއިސް އެންރީކޭ މަގާމުން އިސްތިއުފާދިނުމަށްފަހު 2022 ވަނަ އަހަރުގެ ޑިސެމްބަރު މަހު ޓީމާ ހަވާލުވި ޑެ ލާ ފުއެންޓޭ ވަނީ މިދިޔަ އަހަރު ސްޕެއިނަށް ޔޫއެފާ ނޭޝަންސް ލީގު ކާމިޔާބުކޮށްދީފައި. އެއީ ހަމަ ޖެހުމެއް. އޭނާ ސްޕެއިނާއެކު ޔޫރޯ ފައިނަލަށް ދިޔައީ ޒުވާން ޓީމުތަކުން ކުޅުންތެރިންނާ ގުޅުނު ގުޅުމުގެ ބޭނުންކޮށްގެން.

ސްޕެއިންގެ 19 އަހަރުން ދަށާއި، 21 އަހަރުން ދަށުގެ ޓީމާއެކު ޔޫރޯ ނެގި ޑެ ލަ ފުއެންޓޭ ނުދަންނަ ކުޅުންތެރިޔަކު މިހާރުގެ ފުރަތަމަ ޓީމުގައި މަދު. އެއީ ޖޫނިއާ ރޭންކްތަކުގައި އޭނާ ބޮޑަށް ހަރަކާތްތެރިވުމުން. އެ ޒކުޅުންތެރިން ގާތުން އެނގޭތީ ޑެ ލަ ފުއެންޓޭއަށް ލިބުނު އެންމެ ބޮޑު ފައިދާއަކީ އާއިލީ ގުޅުމެއް އޮންނަ ޓީމެއް ބިނާކުރުމަށް ފަސޭހަވުން.

ފައިނަލް ކުޅޭ ސްޓޭޑިއަމް: އޮލިމްޕިއާސްޓާޑިއޯން ބާލިން

  • ޔޫރޯ 2024 މުބާރާތުގެ މެޗުތައް ކުޅޭނެ އެންމެ ބޮޑު ދަނޑަކީ އޮލިމްޕިއާސްޓާޑިއޯން ބާލިން
  • މިއީ ޖަރުމަނުގެ އެންމެ މަޝްހޫރު އަދި އެންމެ މުހިއްމު އެއް ފުޓުބޯޅަ ދަނޑު
  • 1985 އިން ފެށިގެން ޖާމަން ކަޕް ފައިނަލް ކުޅޭ ދަނޑަކީ މިއީ
  • އެދަނޑުގައި ކުޅެފައި ވާ މުހިއްމު މެޗުތަކުގެ ތެރޭގައި 2006 ވަނަ އަހަރުގެ ފީފާ ވޯލްޑް ކަޕްގެ ފައިނަލް މެޗާއި، 2015 ވަނަ އަހަރުގެ ޔުއެފާ ޗެމްޕިއަންސް ލީގު ފައިނަލް މެޗު ހިމެނޭ
  • ކެޕޭސިޓީ: 71000
  • ހޯމް ޓީމު: ހާތާ ބާރލިން
ގުޅޭ ޓެގު ފުޓްބޯޅަ ސްޕެއިން އިންގްލެންޑް ބޭރު ކުޅިވަރު ވަން ކުޅިވަރު ޔޫރޯ 2024
ޔޫރޯ 2024

ޔޫރޯ ސްކޮޑުގައި އަހަރެން ހިމެނެން ޖެހޭ: ގްރީލިޝް

ބޭއަދަބީ ޗޭންޓްގެ މައްސަލައިގައި މޮރާޓާއާއި ރޮޑްރީއަށް އައީ އެއް މެޗުގެ ސަސްޕެންޝަނެއް

ޔޫރޯގައި ވާދަކުރި ހަތް ޓީމަކަށް އަދަބު ދީފި

އުފާފާޅުކުރުންތަކުގެ ތެރެއިން ރޮޑްރީ އާއި މޮރާޓާ ހޫނު ފެނަށް

ސްޕެއިން ކެޕްޓަން މޮރާޓާ، އޭސީ މިލާނަށް