ޔޫރޯ 2024 ލައިވް: އިންގްލެންޑް 2-1 ސްލޮވޭކިއާ

މެޗުގެ އުސްއަލިތައް

މެޗުގެ ކުޅުން ނިންމާލައިފި. 2-1 ގެ ނަތީޖާއަކުން ސްލޮވާކިއާ ބަލިކޮށް، އިންގްލެންޑް ކުއާޓާ ފައިނަލަށް.

'120 - އިންގްލެންޑްގެ ހަމަލާއެއް. ކައުންޓާ އެޓޭކެއްގައި ޕެނަލްޓީ އޭރިއާ ބޭރުން ލިބުނު ބޯޅައަކުން އިވާން ޓޯނީ ފޮނުވާލި ހަމަލާ ދިޔައީ ސްލޮވާކިއާ ގޯލުގެ ހުރަސް ދަނޑިމަތިން ބޭރަށް.

'111 - ސްލޮވާކިއާގެ ޓުޕްޓާގެ ހިލޭ ޖެހުން، އިންގްލެންޑް ގޯލުގެ ހުރަސް ދަނޑިމަތިން ބޭރަށް.

'109 - ސްލޮވާކިއާ އިން ބަދަލެއް. ޕީޓާ ޕެކަރިކްގެ ބަދަލުގައި ކުޅެން ނުކުތީ ލުބޮމިއާ ޓުޕްޓާ.

'108 - އެބެރެޗީ އެޒޭއަށް ކުރި ފައުލަކާ ގުޅިގެން ސްލޮވާކިއާގެ ޑެނިސް ވޮވްރޯއަށް ރީނދޫ ކާޑެއް.

އިތުރު ވަގުތުގެ ފަހު 15 މިނެޓުގެ ކުޅުން ފަށައިފި.

އިންގްލެންޑުން ދެ ބަދަލެއް. ބެލިންހަމް އާއި ކޭންގެ ބަދަލުގައި ކުޅެން ނުކުތީ ކޮނޯ ގަލެގާ އަދި އެޒްރީ ކޮންސާ.

އިތުރު ވަގުތުގެ ފުރަތަމަ 15 މިނެޓުގެ ކުޅުން ނިންމާލައިފި. 2-1 ގެ ނަތީޖާއަކުން ކުރީގައި އޮތީ އިންގްލެންޑް.

'105 - ސްލޮވާކިއާގެ ނުރައްކަލެއް. ލާޒްލޯ ބެނޭސް ދިން ބޯޅައަކުން ޕެނަލްޓީ އޭރިއާ ތެރެއިން ޕީޓާ ޕެކަރިކް ފޮނުވާލި ހަމަލާ ދިޔައީ އިންގްލެންޑް ގޯލުގެ ހުރަސް ދަނޑިމަތިން ބޭރަށް.

'91 - އިންގްލެންޑުން ލީޑު ހޯދައިފި. އިވާން ޓޯނީ ދިން ބޯޅައަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ކެޕްޓަން ހެރީ ކޭން.

އިތުރު ވަގުތުގެ ފުރަތަމަ 15 މިނެޓުގެ ކުޅުން ފަށައިފި.

މެޗުގެ ފުރިހަމަ ވަގުތުގެ ކުޅުން ނިންމާލައިފި. 1-1 ގެ ނަތީޖާއަކުން ދެ ޓީމު އެއްވަރުވެފައިވުމުން ދެން ކުޅޭނީ އިތުރު ވަގުތުގެ ދެ ހާފު.

'90+6 - އިންގްލެންޑުން ގޯލެއް ޖަހައި ނަތީޖާ ހަމަހަމަކޮށްފި. މާކް ގުއޭހީ ބޮލުން ޖައްސާލި ބޯޅައަކުން ޕެނަލްޓީ އޭރިއާ ތެރޭ ހުރެ ފޮނުވާލި އޯވަހެޑް ހަމަލާއަކުން އިންގްލެންޑަށް އެ ގޯލު ކާމިޔާބުކޮށްދިނީ ޖޫޑް ބެލިންހަމް.

'90+4 - އިންގްލެންޑުން ބަދަލެއް. ފިލް ފޮޑެންގެ ބަދަލުގައި ކުޅެން ނުކުތީ އިވާން ޓޯނީ.

'90+3 - ސްލޮވާކިއާ އިން ބަދަލެއް. ޝްރާންޒްގެ ބަދަލުގައި ކުޅެން ނުކުތީ ނޮބާޓް ޖިޔޮމްބާ.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'84 - އިންގްލެންޑްގެ ބަދަލެއް. ކޮބީ މައިނޫގެ ބަދަލުގައި ކުޅެން ނުކުތީ އެބެރެޗީ އެޒޭ.

'82 - ސްލޮވާކިއާ އިން ދެ ބަދަލެއް. ޑޫޑާ އާއި ކުޗްކާގެ ބަދަލުގައި ކުޅެން ނުކުތީ މަޓުސް ބެރޯ އަދި ލާޒްލޯ ބެނެސް.

'81 - އިންގްލެންޑްގެ އިތުރު ނުރައްކަލެއް. ޕެނަލްޓީ އޭރިއާ ބޭރުން ޑެކްލަން ރައިސް ފޮނުވާލި ބާރު ހަމަލާ އަމާޒުވީ ސްލޮވާކިއާ ގޯލުގެ އަރިމަތީ ދަނޑިއަށް. ރީބައުންސް ބޯޅައިން ޕެނަލްޓީ އޭރިއާ ތެރެއިން ކޭން ފޮނުވާލި ހަމަލާ، ގޯލާ އަމާޒުވެފައެއް ނުވޭ.

'78 - އިންގްލެންޑުގެ ނުރައްކަލެއް. ފިލް ފޮޑެން ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، ކެޕްޓަން ހެރީ ކޭން ބޮލުން ފޮނުވާލި ހަމަލާ ދިޔައީ ސްލޮވާކިއާ ގޯލުގެ އަރިމަތީ ދަނޑިކައިރިން ބޭރަށް.

'77 - ފިލް ފޮޑެންއަށް ކުރި ފައުލަކާ ގުޅިގެން ސްލޮވާކިއާގެ ޕީޓާ ޕެކަރިކްއަށް ރީނދޫ ކާޑެއް.

'68 - އިންގްލެންޑްގެ ހަމަލާއެއް. ކޯލް ޕާމާ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، ފިލް ފޮޑެން ބޮލުން ފޮނުވާލި ހަމަލާ، ސްލޮވާކިއާ ޑިފެންޑަރު ޑެނިސް ވަވްރޯ ވަނީ ބްލޮކްކޮށްފައި.

'65 - އިންގްލެންޑްގެ ބަދަލެއް. ޓްރިޕިއާގެ ބަދަލުގައި ކުޅެން ނުކުތީ ކޯލް ޕާމާ.

'61 - ސްލޮވާކިއާގެ ދެ ބަދަލެއް. ޑޭވިޑް ސްޓްރެލެކް އާއި ލޫކަސް ހަރާސްލިންގެ ބަދަލުގައި ކުޅެން ނުކުތީ ތޯމަސް ސުސްލޯވް އަދި ރޮބާޓް ބޮޒެނިކް.

'60 - އިންގްލެންޑް ފޯވަޑް ފިލް ފޮޑެން ފޮނުވާލި ހަމަލާ، ސްލޮވާކިއާގެ ވޯލްގައި ހުރި އޮންދްރޭ ޑޫޑާ ވަނީ ބްލޮކްކޮށްފައި.

'59 - ކޮބީ މައިނޫއަށް ސްލޮވާކިއާގެ ޔުރާއީ ކުޗްކާ ކުރި ފައުލަކާ ގުޅިގެން ނުރައްކާ ހިސާބަކުން އިންގްލެންޑަށް ހިލޭ ޖެހުމެއް.

'55 - އިންގްލެންޑް ޑިފެންސްގެ ގޯހެއް. އިންގްލެންޑް ކީޕަރު ޖޯޑަން ޕިކްފޯޑް ކުރިއަށް ނުކުމެ ހުރުމާއެކު ސްލޮވާކިއާ ފޯވަޑް ޑޭވިޑް ސްޓްރެލެކް ދުރުން ފޮނުވާލި ހަމަލާ ދިޔައީ އިންގްލެންޑް ގޯލުގެ އަރިމަތީ ދަނޑިކައިރިން ބޭރަށް.

'51 - އިންގްލެންޑްގެ ނުރައްކަލެއް. ޕެނަލްޓީ އޭރިއާ ތެރެއިން ކެޕްޓަން ހެރީ ކޭން ފޮނުވާލި ހަމަލާ، ސްލޮވާކިއާ ޑިފެންޑަރު ޑެނިސް ވޮވްރޯ ވަނީ ބްލޮކްކޮށްފައި.

'49 - ކިއެރެން ޓްރިޕިއާ ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފިލް ފޮޑެން، ސްލޮވާކިއާގެ ގޯލުގެ ތެރެއަށް ބޯޅަ ފޮނުވާލި ނަމަވެސް، އޭނާ ހުރީ އޮފްސައިޑް މަގާމެއްގައި.

ދެވަނަ ހާފުގެ ކުޅުން ފެށީ އިންގްލެންޑުން.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން ސްލޮވާކިއާ ކުރީގައި އޮވެގެން.

'45+1 - ފައުލަކާ ގުޅިގެން ސްލޮވާކިއާ ކެޕްޓަން މިލާން ސްކްރިނިއާއަށް ރީނދޫ ކާޑެއް.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'36 - ހުރަސްތައް ނަގައިގެން އިންގްލެންޑުން ނުރައްކާކުރުމަށް ދަނީ މަސައްކަތްކުރަމުން. ނަމަވެސް އަދި މާ ރަނގަޅު ފުރުސަތެއް ތަނަވަސްކުރެވިފައެއް ނުވޭ.

'25 - ސްލޮވާކިއާ އިން ގޯލެއް ޖަހައި ލީޑު ހޯދައިފި. ޑޭވިޑް ސްޓްރެލެކް ދިން ބޯޅައަކުން ސްލޮވާކިއާއަށް އެ ގޯލު ކާމިޔާބުކޮށްދިނީ އިވާން ޝްރާންޒް. ޕެނަލްޓީ އޭރިއާ ތެރެއިން އޭނާ ބޯޅަ އަމާޒުކޮށްލީ އިންގްލެންޑް ގޯލުގެ ތިރީ ކަނަކަށް. މިއީ މި މުބާރާތުގައި އޭނާ ޖެހި ތިންވަނަ ގޯލު.

'23 - އިންގްލެންޑްގެ ހަމަލާއެއް. ޕެނަލްޓީ އޭރިއާ ތެރޭ ހުރެ، ހެރީ ކޭން ބޮލުން ފޮނުވާލި ހަމަލާ، ސްލޮވާކިއާ ޑިފެންޑަރު ޑޭވިޑް ހެންކޯ ވަނީ ބްލޮކްކޮށްފައި.

'16 - ލޫކަސް ހަރާސްލިއަންއަށް ކުރި ފައުލަކާ ގުޅިގެން އިންގްލެންޑްގެ ޖޫޑް ބެލިންހަމްއަށް ރީނދޫ ކާޑެއް.

'12 - ސްލޮވާކިއާގެ ނުރައްކަލެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު ލޫކަސް ހަރާސްލިން ފޮނުވާލި ހަމަލާ، އިންގްލެންޑް ޑިފެންޑަރު މާކް ގުއޭހީ ވަނީ ބްލޮކްކޮށްފައި.

'9 - އިންގްލެންޑަށް ރަނގަޅު ފުރުސަތެއް. ޖޫޑް ބެލިންހަމް ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ކިއެރެން ޓްރިޕިއާ ފޮނުވާލި ހަމަލާ، ސްލޮވާކިއާގެ ގޯލާ އަމާޒުވެފައެއް ނުވޭ.

'8 - ސްލޮވާކިއާގެ ހަމަލާއެއް. ޕެނަލްޓީ އޭރިއާ ބޭރުން ލޫކަސް ހަރާސްލިން ފޮނުވާލި ހަމަލާ، އިންގްލެންޑް ޑިފެންޑަރު ޖޯން ސްޓޯންސް ވަނީ ބްލޮކްކޮށްފައި.

'7 - އޮންދްރޭ ޑޫޑާއަށް ކުރި ފައުލަކާ ގުޅިގެން އިންގްލެންޑްގެ ކޮބީ މައިނޫއަށް ރީނދޫ ކާޑެއް.

'5 - ސްލޮވާކިއާގެ ނުރައްކަލެއް. ލޫކަސް ހަރާސްލިން ދިން ބޯޅައަކުން ޕެނަލްޓީ އޭރިއާ ތެރެއިން ޑޭވިޑް ހެންކޯ ފޮނުވާލި ހަމަލާ ދިޔައީ އިންގްލެންޑް ގޯލުގެ އަރިމަތީ ދަނޑިކައިރިން ބޭރަށް.

'4 - ޑޭވިޑް ސްޓްރެލެޗްއަށް ކުރި ފައުލަކާ ގުޅިގެން އިންގްލެންޑް ޑިފެންޑަރު މާކް ގުއޭހީއަށް ރީނދޫ ކާޑެއް.

މެޗުގެ ކުޅުން ފަށައިފި. ކިކްއޯފް ކުރީ ސްލޮވާކިއާ އިން.

މި މެޗަށް ވެސް ސްލޮވާކިއާ އިން ބޭނުންކުރަނީ ގްރޫޕު ސްޓޭޖުގެ ފަހު މެޗުގައި ރުމޭނިއާއާ ދެކޮޅަށް ނުކުތް ފުރަތަމަ 11.

މި މެޗަށް ވެސް އިންގްލެންޑްގެ މެދުތެރެއަށް ވަނީ ބަދަލެއް ގެނެސްފައި. ކޮނޯ ގަލެގާގެ ބަދަލުގައި މި މެޗުގެ ފުރަތަމަ 11 އިން ފުރުސަތު ދީފައިވަނީ ކޮބީ މައިނޫ. ގަލެގާގެ ކުރިން އެ މަގާމަށް ބޭނުންކުރަމުންދިޔައީ ޓްރެންޓް އެލެކްސެންޑާ އާނޯލްޑް.

ސްލޮވާކިއާގެ ފުރަތަމަ 11:

އިންގްލެންޑްގެ ފުރަތަމަ 11: