ޔޫރޯ 2024 ލައިވް: އަލްބޭނިއާ 0-1 ސްޕެއިން (ފުލްޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 1-0 ގެ ނަތީޖާއަކުން ސްޕެއިން ކުރީގައި އޮވެގެން. ސްޕެއިނުން ގްރޫޕު ސްޓޭޖު ނިންމާލީ ތިން މެޗުން ވެސް މޮޅުވެގެން. އަލްބޭނިއާއަށް މުބާރާތާ އަލްވަދާއު.

'90+2 - އަލްބޭނިއާއަށް ރަނގަޅު ފުރުސަތެއް. ހިލޭ ޖެހުމެއްގެ ތެރެއިން ލިބުނު ބޯޅައަކުން ޕެނަލްޓީ އޭރިއާ ތެރޭ ހުރެ ބްރޯޔާ ފޮނުވާލި ހަމަލާ، ސްޕެއިން ކީޕަރު ރާޔާ ވަނީ މަތަކޮށްފައި.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'90 - ބްރޯޔާއަށް ކުރި ފައުލަކާ ގުޅިގެން ސްޕެއިންގެ ޑެނިއެލް ވިވިއަންއަށް ރީނދޫ ކާޑެއް.

'88 - ފާމިން ލޯޕޭޒަށް ކުރި ފައުލަކާ ގުޅިގެން އަލްބޭނިއާގެ މެދޮން ބެރީޝާއަށް ރީނދޫ ކާޑެއް.

'85 - ސްޕެއިނުން ބަދަލެއް. އޮލްމޯގެ ބަދަލުގައި ކުޅެން ނުކުތީ އަލެހަންޑްރޯ ބައޭނާ.

'84 - އަލްބޭނިއާގެ ހަމަލާއެއް. ޕެނަލްޓީ އޭރިއާ ތެރެއިން އާބާ ހޮޖާ ފޮނުވާލި ހަމަލާ، ސްޕެއިންގެ ގޯލާ އަމާޒުވެފައެއް ނުވޭ.

'81 - އަލްބޭނިއާގެ ބަދަލެއް. ޔާސިރް އަސާނީގެ ބަދަލުގައި ކުޅެން ނުކުތީ އާނެސްޓް މުޗީ.

'80 - ސްޕެއިންގެ ހަމަލާއެއް. ޕެނަލްޓީ އޭރިއާ ތެރޭ ހުރެ އަލްވާރޯ މޮރާޓާ ފޮނުވާލި ހަމަލާ ދިޔައީ އަލްބޭނިއާ ގޯލުގެ ހުރަސް ދަނޑިމަތިން ބޭރަށް.

'77 - އަލްބޭނިއާގެ ނުރައްކަލެއް. ބްރޯޔާ ދިން ބޯޅައަކުން ޕެނަލްޓީ އޭރިއާ ބޭރުން ކްރިސްޓިއަން އަސްލާނީ ފޮނުވާލި ހަމަލާ ދިޔައީ ސްޕެއިން ގޯލުގެ އަރިމަތީ ދަނޑިކައިރިން ބޭރަށް.

'71 - ސްޕެއިނުން ވެސް ދެ ބަދަލެއް. ހޯސޭލޫ އާއި ފެރާން ޓޮރޭސްގެ ބަދަލުގައި ކުޅެން ނުކުތީ އަލްވާރޯ މޮރާޓާ އަދި ލަމީން ޔަމާލް.

'70 - އަލްބޭނިއާ އިން ދެ ބަދަލެއް. ގާޒިމް ލަޗީ އާއި ނެދީމް ބައިރާމީގެ ބަދަލުގައި ކުޅެން ނުކުތީ އާބާ ހޮޖާ އަދި މެދޮން ބެރިޝާ.

'66 - ގަސްދުގައި ޑައިވް ކުރުމާ ގުޅިގެން އަލްބޭނިއާގެ ނެދީމް ބައިރާމީއަށް ރީނދޫ ކާޑެއް.

'64 - އަލްބޭނިއާއަށް ހުސް ފުރުސަތެއް. ޕެނަލްޓީ އޭރިއާ ތެރެއިން އަރްމާންޑޯ ބްރޯޔާ ފޮނުވާލި ހަމަލާ، ސްޕެއިންގެ ކީޕަރު ރާޔާ ވަނީ ހުޝިޔާރުކަމާއެކު މަތަކޮށްފައި.

61 - ސްޕެއިނުން ބަދަލެއް. އޮޔާޒަބާލްގެ ބަދަލުގައި ކުޅެން ނުކުތީ ފާމިން ލޯޕޭޒް.

'59 - އަލްބޭނިއާ އިން ބަދަލެއް. ރޭ މަނާއީގެ ބަދަލުގައި ކުޅެން ނުކުތީ އަރްމާންޑޯ ބްރޯޔާ.

'51 - އަލްބޭނިއާގެ އެސިސްޓަންޓް ކޯޗަކަށް ރީނދޫ ކާޑެއް.

'50 - އަލްބޭނިއާގެ ކީޕަރު ސްޓްރަކޯޝާ ކުރިއަށް ނުކުމެ ހުރުމާއެކު، ސްޕެއިންގެ އޮލްމޯ ދުރުން ފޮނުވާލި ހަމަލާ، ގޯލާ އަމާޒެއް ނުވި.

'47 - ސްޕެއިންގެ ނުރައްކާތެރި ހަމަލާއެއް. ގްރިމާލްޑޯ ނަގައިދިން ހުރަހަކުން ހޮސޭލޫ ފޮނުވާލި ހަމަލާ ދިޔައީ އަލްބޭނިއާ ގޯލުގެ ހުރަސް ދަނޑިމަތިން ބޭރަށް.

މެޗުގެ ދެވަނަ ހާފުގެ ކުޅުން ފެށީ ސްޕެއިނުން.

ސްޕެއިނުން ދެވަނަ ހާފަށް ނުކުންނަނީ ބަދަލަކާއެކު. ލަޕޯޓްގެ ބަދަލުގައި ކުޅެން ނުކުންނަނީ ރޮބިން ލެ ނޯމަންޑް.

ފުރަތަމަ ހާފުގެ އުސްއަލިތައް

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން ސްޕެއިން ކުރީގައި އޮވެގެން.

'45 - އަލްބޭނިއާގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން ކްރިސްޓިއަން އަސްލާނީ ފޮނުވާލި ބާރު ހަމަލާ، ސްޕެއިންގެ ކީޕަރު ޑޭވިޑް ރާޔާ ވަނީ ހުޝިޔާރުކަމާއެކު މަތަކޮށްފައި.

'44 - އަނެއްކާވެސް ސްޕެއިނަށް ފުރުސަތެއް. ގްރިމާލްޑޯ ދިން ބޯޅައަކުން ޕެނަލްޓީ އޭރިއާ ތެރެއިން މިކެލް މެރީނޯ ފޮނުވާލި ހަމަލާ ވެސް އަލްބޭނިއާގެ ގޯލާ އަމާޒުވެފައެއް ނުވޭ.

'40 - ސްޕެއިނަށް އިތުރު ފުރުސަތެއް. އަލެހަންޑްރޯ ގްރިމާލްޑޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފެރާން ޓޮރޭސް ބޮލުން ފޮނުވާލި ހަމަލާ، އަލްބޭނިއާގެ ގޯލާ އަމާޒުވެފައެއް ނުވޭ.

'36 - ސްޕެއިނަށް ފުރުސަތެއް. ހެސުސް ނަވާސް ދިން ބޯޅައަކުން ޕެނަލްޓީ އޭރިއާ ތެރެއިން ޑެނީ އޮލްމޯ ފޮނުވާލި ހަމަލާ، އަލްބޭނިއާގެ ކެޕްޓަން ބެރާތު ޖިމްޝިޓީ ވަނީ ބްލޮކޮށްފައި.

'33 - ހެސޫސް ނަވާސް ނަގައިދިން ހުރަހުން، ޕެނަލްޓީ އޭރިއާ ތެރޭ ހުރެ ހޯސޭލޫ ނުރައްކާކުރުމުގެ އަލްބޭނިއާގެ ޑިފެންސުން ދިފާއުކޮށްފި.

'21 - ސްޕެއިންގެ ހަމަލާއެއް. ޕެނަލްޓީ އޭރިއާ ބޭރުން ޑެނީ އޮލްމޯ ފޮނުވާލި ހަމަލާ، އަލްބޭނިއާގެ ގޯލާ އަމާޒުވެފައެއް ނުވޭ.

'13 - ސްޕެއިނުން ގޯލެއް ޖަހައި ލީޑު ހޯދައިފި. ޑެނީ އޮލްމޯ ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން ސްޕެއިނަށް އެ ގޯލު ކާމިޔާބުކޮށްދިނީ ފެރާން ޓޮރޭސް. އޭނާ ފޮނުވާލި ހަމަލާ، އަލްބޭނިއާ ގޯލުގެ ތެރެއަށް ވަދެފައިވަނީ ގޯލުގެ އަރިމަތީ ދަނޑީގައި ޖެހިފައި.

'12 - ސްޕެއިނަށް ރަނގަޅު ފުރުސަތެއް. ޖެސޫސް ނަވާސް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، މިކެލް މެރީނޯ ބޮލުން ފޮނުވާލި ހަމަލާ، އަލްބޭނިއާ ކީޕަރު ތޯމަސް ސްޓްރަަކޯޝާ ވަނީ މަތަކޮށްފައި.

މެޗުގެ ފުރަތަމަ ފަސް މިނެޓުގެ ތެރޭގައި އަލްބޭނިއާ އިން ވަނީ ސްޕެއިންގެ ޕެނަލްޓީ އޭރިއާ ތެރެއަށް ހުރަސްތަކެއް ނަގައިގެން ނުރައްކާކުރުމަށް މަސައްކަތްކޮށްފައި، ނަމަވެސް އެއިން އެއްވެސް ހުރަހެއްގެ ބޭނުން ހިފިފައެއް ނުވޭ.

'2 - އަލްބޭނިއާގެ ހުރަހެއް. ނެދީމް ބައިރާމީ ނަގައިދިން ހުރަހުން، ރޭ މަނާއީ ނުރައްކާކުރުމުގެ ކުރިން ސްޕެއިންގެ ޑިފެންސުން ވަނީ ދިފާއުކޮށްފައި.

މެޗުގެ ކުޅުން ފަށައިފި. ކިކްއޯފް ކުރީ އަލްބޭނިއާ އިން.

ގްރޫޕުގެ އެއްވަނަ ކަށަވަރުވެފައިވުމުން، މިރޭގެ މެޗުގެ ފުރަތަމަ 11 ގައި ފެންނަނީ މުޅިން އާ ފުރަތަމަ 11 އެއް. އިޓަލީއާ ދެކޮޅަށް މެޗުގައި ފެނުނު އައިމެރިކް ލަޕޯޓް ފިޔަވައި، ދެން މުޅިން ވެސް ފެންނަނީ އެ މެޗުގައި ބެންޗުން ފެށި ކުޅުންތެރިން.

ސްޕެއިންގެ ފުރަތަމަ 11:

އަލްބޭނިއާގެ ފުރަތަމަ 11: