ޔޫރޯ 2024 ލައިވް: ސްކޮޓްލޭންޑް 0-1 ހަންގޭރީ (ފުލްޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި.

90+10 ' ހަންގޭރީން ގޯލު ޖަހައި ލީޑު ނަގައިފި. ކައުންޓާ އެޓޭކެއްގައި ގޯލު ޖެހީ ކެވިން ސޮބޮތު. އެ ގޯލާއެކު ގްރޫޕްގެ އެތުރުން ވަނީ ބަދަލުވެފައި. ސްކޮޓްލޭންޑް ކެޓުމާ ދިމާލަށް، ހަންގޭރީއަށް އުންމީދު.

90+8 ' ސްކޮޓްލޭންޑްގެ ހަމަލާއެއް. އަރިމަތިން ހޭންލީ ފޮނުވާލި ބާރު ހަމަލާ މަތަކުރީ ގްލާސީ.

'90+2 - ހަންގޭރީގެ ނުރައްކާތެރި ދެ ހަމަލާއެއް. ސޮބޮސްލާއީ އަރިމަތިން ފޮނުވާލި ހަމަލާ ގުން މަތަކުރި އިރު، އޭގެ ފަހުން ބަދަލަކަށް އެރި ސޮބޮތު އޭރިއާ ތެރެއަށް ވަދެ ފޮނުވާލި ހަމަލާ އަމާޒުވީ އަރިމަތީ ދަނޑިއަށް.

'90 - ހަންގޭރީގެ ހަމަލާއެއް. ޝޭފާ ފޮނުވާލި ހަމަލާ މަތަކުރީ ސްކޮޓްލޭންޑްގެ ކީޕަރު ގުން.

ދެވަނަ ހާފުގެ އިތުރު ވަގުތުގެ ގޮތުގައި 10 މިނެޓުގައި ކުޅުން ދައްކައިފި.

'88 - ސްކޮޓްލޭންޑުން ކެޕްޓަން ރޮބަޓްސަންގެ ބަދަލުގައި ލެވިސް މޯގަން ކުޅެން ނެރެފި.

'86 - ހަންގޭރީގެ ދެ ބަދަލެއް. ކާކޭޒްގެ ބަދަލުގައި ކުޅެން ނުކުތީ ސޮލްޓް ނާގީ. ބޯލާގެ ބަދަލުގައި ކުޅެން ނުކުތީ ކެވިން ސޮބޮތު.

'83 - ސްކޮޓްލޭންޑްގެ އިތުރު ދެ ބަދަލެއް. ރަލްޓްސޮންގެ ބަދަލުގައި ކެނީ މެކްލީން ކުޅެން ނުކުތް އިރު، ގިލްމޯގެ ބަދަލުގައި ނުކުތީ ރަޔަން ކްރިސްޓީ.

'83 - ސްކޮޓްލޭންޑަށް ފުރުސަތެއް. އޭރިއާ ތެރެއަށް ޝޭންކްލޭންޑް ބޯޅައާއެކު ވަދެ ފޮނުވާލަން މަސައްކަތް ކުރި ނަމަވެސް، ލައިންސްމަން ވަނީ އޮފްސައިޑް ކަމަށް ދިދަ ނަގާފައި.

'75 - ހަންގޭރީގެ ލާޒްލޯ ކްލެއިންޝެއިލާއަށް ރީނދޫ ކާޑު.

'76 - ސްކޮޓްލޭންޑްގެ ދެ ބަދަލެއް. ޗޭ އެޑަމްސްގެ ބަދަލުގައި ލޮރެންސް ޝޭންކްލޭންޑް ކުޅެން ނުކުތް އިރު، މެގިންގެ ބަދަލުގައި ނުކުތީ ސްޓުއާޓް އާމްސްޓްރޯންގް.

'74 - ހަންގޭރީގެ ދެ ބަދަލެއް. ވާގާގެ ބަދަލުގައި ކުޅެން ނުކުތީ މާޓިން އެޑަމް. ޑާޑާއީގެ ބަދަލުގައި ކުޅެން ނުކުތީ އަޓީލާ ޒަލާއީ.

ވާގާ ގުން ގައިގައި ޖެހި އޭނާ ހޭނެތު ކަމަށް ބެލެވޭ. މިހާރު ވަނީ އަށިގަނޑުގައި ބާލާފައި. ބޭލީ ވަށައިގެން ފޮތި ދަމައިގެން. އެއީ ފައުލެއްތޯ ބަލަން ވީއޭއާރް އިން ޗެކު ކުރި ނަމަވެސް، ރެފްރީ ނިންމީ ފައުލެއް ނޫން ކަމަށް. އެހެންވެ ޕެނަލްޓީއެއް ނުދޭ.

'68 - ސީރިއަސް އަނިޔާއެއް. ސޮބޮސްލާއީ ނަގައިދިން ހިލޭ ޖެހުމަށް މަސައްކަތް ކުރުމުގެ ތެރޭގައި ސްކޮޓްލޭންޑްގެ ކީޕަރު ގުން ގައިގައި ޖެހި ވާގާއަށް ވަނީ ސީރިއަސް އަނިޔާއެއް ވެފައި. އޭނާއަށް ދިޔައީ އެމަޖެންސީގައި ފަރުވާ ދެމުން.

ހަންގޭރީން ވަނީ ބަދަލެއް ކޮށްފައި. ކަލުމް ސްޓައިލްސްގެ ބަދަލުގައި ކުޅެން ނުކުތީ އެޑަމް ނާގީ.

'64 - ހަންގޭރީގެ އިތުރު ހަމަލާއެއް. ކޯނަރެއްގައި ސޮބޮސްލާއި ނަގައިދިން ހުރަސް، ބޯލާ އޭރިއާ ތެރެއަށް ހުރަސް ކޮށްލުމުން މާޓޮން ޑާޑާއީ ބޮލުން ޖެހި ބޯޅަ ދިޔައީ ހުރަސް ދަނޑި މަތިން ބޭރަށް.

'56 - ހަންގޭރީއަށް ފުރުސަތެއް. ސޮބޮސްލާއީ މެދުތެރެއިން ބޯޅަ ހިފައިގެން ގޮސް، އަރިމައްޗަށް ދިން ބޯޅައިގައި ސަލާއީ ބޯޅަ ފޮނުވާލި. އެހެން ނަމަވެސް ސްކޮޓްލޭންޑް ދެ ޑިފެންޑަރުން ވަނީ އެ ބޯޅަ ބްލޮކް ކޮށްފައި.

'53 - ސްކޮޓްލޭންޑްގެ ފުރަތަމަ ހަމަލާ. އަރިމަތިިން ބޯޅަ ހިފައިގެން ކުރިއަށް ޖެހި، އޭރިއާ ބޭރުން ޗޭ އެޑަމްސް ފޮނުވާލި ހަމަލާ ދިޔައީ މާ މަތިން ބޭރަށް.

'50 - ސްކޮޓްލޭންޑްގެ މެކްޓޮމިނޭއަށް ރީނދޫ ކާޑު. އެއީ ގްރޫޕް ސްޓޭޖުގައި އޭނާއަށް ދެއްކި ދެވަނަ ރީނދޫ ކާޑު. އެޓީމު ގަދަ 16 އަށް ދިޔަ ނަމަވެސް އެ މެޗުގައި މެކްޓޮމިނޭއަށް ނުކުޅެވޭނެ.

'49 - ހަންގޭރީއަށް ފުރުސަތެއް. އޭރިއާ ތެރެއަށް ސޮބޮސްލާއީ ދިން ބޯޅަ، ރޮލާންޑް ސަލާއީ ކޮންޓްރޯލް ކޮށްފައި ތިރިތިރިން ފޮނުވާލި ނަމަވެސް މާ ބޮޑު ބާރެއް ނެތް. ކީޕަރު ގުންއަށް ފަސޭހަ ސޭވެއް.

ދެވަނަ ހާފުގެ ކުޅުން ފަށައިފި، ކިކްއޯފް ކުރީ ސްކޮޓްލޭންޑް.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި.

'45+1 - ހަންގޭރީގެ ހަަމަލާއެއް. ހާފުގެ މެދެއްހާ ހިސާބުން ކުރިއަށް ޖެހިލައި، ސޮބޮސްލާއީ ދުރުން ފޮނުވާލި ހަމަލާ ދިޔައީ މަތިން ބޭރަށް.

'90 - ފުރަތަމަ ހާފުގެ އިތުރު ވަގުތުގެ ކުޅުމަށް އެއް މިނެޓް ދައްކައިފި.

'44 - ހަންގޭރީގެ އަންދްރާސް ޝޭފާއަށް ރީނދޫ ކާޑު. އޭނާއަށް ކާޑު ދެއްކީ ޖެކް ހެންޑްރީ ފަހަޔަށް ކުރި ޓެކުލަކާ ގުޅިގެން.

'41 - ހަންގޭރީގެ ނުރައްކަލެއް. ސޮބޮސްލާއީ ނަގައިދިން ހިލޭ ޖެހުމަކަށް އަރައި، މުޅިން ހުސްކޮށް އޮވެ، އޯބާން ފޮނުވާލި ހަމަލާ ބޭރަށް ދިޔައީ ހުރަސް ދަނޑީގައި ޖެހިފައި. އެހެން ނަމަވެސް، އޭނާ އެ ބޯޅަ ގޯލަށް ވައްދާލި ނަމަވެސް އޮފްސައިޑް ވާނެ ކަމަށް ބެލެވޭ.

'38 - ސްކޮޓްލޭންޑްގެ ހަމަލާއެއް. އަރިމަތިން ޓޯނީ ރަސްލްޓަން ނަގައިދިން ހުރަސް އޭރިއާ ތެރޭގައި ހުރި ސްކޮޓް މެކްޓޮމިނޭއަށް ރަނގަޅަށް ބޭނުން ނުހިފިގެން ފަހަތަށް ދިން ބޯޅަ، އަރިމައްޗަށް ޖެހި މެގިން ފޮނުވާލި ނަމަވެސް މަޑުމަޑުން ދިޔައީ ކީޕަރު ގްލާސްކީ އަތަށް.

'35 - ހަންގޭރީގެ ހަމަލާއެއް. އޭރިއާ ތެރެއަށް ހުރަސްކޮށްލި ބޯޅަ، ސްކޮޓްލޭންޑް ޑިފެންސުން ސާފުކޮށްލުމުން އޭރިއާ ބޭރުގައި ހުރެ، ރޮލާންޑް ސަލާއީ ފޮނުވާލި ހަމަލާ ދިޔައީ މާ މަތިން ގޯލާ އަމާޒުނުވެ.

26' - ހަންގޭރީގެ ވިލީ އޯބާންއަށް ރީނދޫ ކާޑު. މިފަހަރު އޭނާވެސް ފައުލްކުރީ މެގިންއަށް.

'22 - ސްކޮޓްލޭންޑުން ހަމަލާއަކަށް ކުރި މަސައްކަތް ނާކާމިޔާބު. އަރިމަތިން ލިބުނު ހިލޭ ޖެހުން ރޮބަޓްސަން ރަނގަޅަށް ހުރަސް ކުރި ނަމަވެސް، ހަންގޭރީގެ ޑިފެންސުން ވަނީ އެންމެ ފުރަތަމަ ބޯޅަ ހޯދައި، ސާފުކޮށްލާފައި.

މެޗުގެ މިހާތަނަށް އައިރު ދެޓީމުގެ ފަރާތުންވެސް ފެންނަނީ ވަރަށް ބޮޑަށް ޑިފެންސަށް ވިސްނައިގެން ކުޅޭތަން. ހަމަލާތައް މަދު.

'18 - ކެލުން ސްޓައިލްސްއަށް ރީނދޫ ކާޑު. އޭނާ އަތުން ގެއްލުނު ބޯޅައެއް ހޯދަން އުޅުމުގެ ތެރޭގައި މެގިން ފަޔަށް ކުރި ޓެކުލަށް ރެފްރީ ވަނީ ރީނދޫ ކާޑު ދައްކާފައި.

'15 - ހަންގޭރީން ފުރުސަތަކަށް ކުރި މަސައްކަތް ނާކާމިޔާބު. ސްކޮޓްލޭންޑްގެ ހާފު މެދަކާ ހިސާބުން ލިބުނު ހިލޭ ޖެހުމުން، ސޮބޮސްލާއީ ނަގައިދިން ބޯޅަ ހަންގޭރީ ކުޅުންތެރިޔަކަށް ލިބުމުގެ ކުރިން ކީޕަރު ގުން ވަނީ ކުރިއަށް ޖެހި ބޯޅަ ހިފާފައި.

'8 - ހަންގޭރީގެ ހަމަލާއެއް. ދުރުން ބެންޑެގޫޒް ބޯލާ ފޮނުވާލި ބާރު ހަމަލާ މަތަކުރީ ސްކޮޓްލޭންޑްގެ ގޯލްކީޕަރު އަންގުސް ގުން. އެއީ މެޗުގައި ފެނުނު ފުރަތަމަ ހަމަލާ.

ފުރަތަމަ ފަސް ވަރަކަށް މިނެޓުގައި ތެރޭގައި ގިނަ ވަގުތު ބޯޅަ ގެންގުޅެމުން ދަނީ ސްކޮޓްލޭންޑުން. އެހެން ނަމަވެެސް އެޓީމަށްވެސް އަދި ހަންގޭރީގެ ގޯލަށް ނުރައްކާ ކުރެވިފައެއް ނުވޭ. ހަންގޭރީ ކުޅެމުންދަނީ ކެތްތެރިކަމާއެކު އަމިއްލަ ހާފުގައި މަޑުކޮށްގެން.

މެޗުގެ ކުޅުން ފަށައިފި. ކިކްއޯފް ކުރީ ހަންގޭރީން.

މިރޭގެ މެޗަށް ނެރުނު ފުރަތަމަ 11 ގައި ސްކޮޓްލޭންޑްގެ ކިއެރަން ޓިއާނީ ހިމަނާފައެއް ނުވޭ. އޭނާއަށް އެންމެފަހުން މެޗުގައި ލިބުނު އަނިޔާގެ ސަބަބުން ޔޫރޯގެ ބާކީ ބައިގައި ނުކުޅެވޭނެ ކަން ވަނީ ޔަގީންވެފައި. އެއީ ސްކޮޓްލޭންޑަށް ބޮޑު ގެއްލުމެއް.

ހަންގޭރީ ފުރަތަމަ 11

ސްކޮޓްލޭންޑްގެ ފުރަތަމަ 11