ޔޫރޯ 2024 ލައިވް: ތުރުކީ 0-3 ޕޯޗުގަލް (ފުލްޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 3-0 ގެ ނަތީޖާއަކުން ޕޯޗުގަލް ކުރީގައި އޮވެގެން.

ދެވަނަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.

'90 - ޕޯޗުގަލަށް އިތުރު ފުރުސަތެއް. ރޮނާލްޑޯ ދިން ބޯޅައަކުން ޕެނަލްޓީ އޭރިއާ ތެރެއިން ބެނާޑޯ ސިލްވާ ފޮނުވާލި ހަމަލާ، ތުރުކީ ޑިފެންޑަރު މެރީހް ޑެމިރާލް ވަނީ ބްލޮކްކޮށްފައި.

'87 - ޕޯޗުގަލަށް ފުރުސަތެއް. ބްރޫނޯ ފެނާންޑޭޒް ދިން ބޯޅަ، ޕެނަލްޓީ އޭރިއާ ތެރެއިން ބެނާޑޯ ސިލްވާއަށް ލިބުމުގެ ކުރިން ތުރުކީގެ ކީޕަރު އަލްޓާއީ ބަޔިންދީރް ވަނީ ހޯދާފައި.

'82 - ޕޯޗުގަލުން ބަދަލެއް. ޕެޕޭގެ ބަދަލުގައި ކުޅެން ނުކުތީ އެންޓޯނިއޯ ސިލްވާ.

'75 - ތުރުކީން ބަދަލެއް. އަނިޔާއަކާ ގުޅިގެން އަކޭޑިންގެ ބަދަލުގައި ކުޅެން ނުކުތީ މެރީޙް ޑެމިރާލް.

'73 - ޕޯޗުގަލަށް ފުރުސަތެއް. ޕެޑްރޯ ނެޓޯ ދިން ބޯޅަ، ޕެނަލްޓީ އޭރިއާ ތެރެއިން ނެލްސަން ސެމޭޑޯއަށް ލިބުމުގެ ކުރިން ތުރުކީގެ ޑިފެންސުން ވަނީ ދިފާއުކޮށްފައި.

'69 - ތުރުކީން ބަދަލެއް. ޔޫނުސް އަކްގުންގެ ބަދަލުގައި ކުޅެން ނުކުތީ އަރްދާ ގުލާ.

'68 - ޕޯޗުގަލުން ބަދަލެއް. ކަންސެލޯގެ ބަދަލުގައި ކުޅެން ނުކުތީ ނެލްސަން ސަމޭޑޯ.

'66 - ޕޯޗުގަލަށް ފުރުސަތެއް. ބެނާޑޯ ސިލްވާ ނަގައިދިން ހުރަހަކުން ޕެނަލްޓީ އޭރިއާ ތެރެއިން ރޮނާލްޑޯގެ ބޮލުގައި ރަނގަޅަށް އެ ބޯޅަ ލައްވާލައިފައެއް ނުވޭ.

'58 - ތުރުކީން ދެ ބަދަލެއް. ކާން އައިހާން އާއި ކަރެމް އަކްތުރްކޮގްލޫގެ ބަދަލުގައި ކުޅެން ނުކުތީ ކެނާން ޔިލްދީޒް އަދި އިސްމާއިލް ޔުކްސެކް.

'55 - ޕޯޗުގަލުން އިތުރު ގޯލެއް ޖަހައި ތިން ގޯލުގެ ލީޑެއް ހޯދައިފި. ކްރިސްޓިއާނޯ ރޮނާލްޑޯ ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން ޕޯޗުގަލަށް އެ ގޯލު ކާމިޔާބުކޮށްދިނީ ބްރޫނޯ ފެނާންޑޭޒް. އެ ބޯޅަ ރޮނާލްޑޯއަށް ވެސް ގޯލުގެ ތެރެއަށް ފޮނުވާލުމުގެ ފުރުސަތު އޮތް.

'53 - ތުރުކީގެ ހަމަލާއެއް. ޔޫނުސް އަކްގުން ދިން ބޯޅައަކުން ޕެނަލްޓީ އޭރިއާ ބޭރުން ޔޫސުފް ޔަޒީޗީ ފޮނުވާލި ހަމަލާ، ޕޯޗުގަލްގެ ކީޕަރު ޑިއޯގޯ ކޮސްޓާ ވަނީ ފަސޭހަކަމާއެކު މަތަކޮށްފައި.

ދެވަނަ ހާފުގެ ފުރަތަމަ ފަސް މިނެޓުގެ ތެރޭގައި ޕޯޗުގަލުން އެޓޭކްގައި މަސައްކަތްތަކެއް ކުރި ނަމަވެސް، ތުރުކީގެ ގޯލަށް ނުރައްކާ ކުރެވޭ ގޮތެއް ނުވޭ.

ތުރުކީން ވެސް ނުކުތީ ބަދަލަކާއެކު. އޯކުން ކުކްޗޫގެ ބަދަލުގައި ކުޅެން ނުކުތީ ޔޫސުފް ޔަޒީޗީ.

ޕޯޗުގަލުން ދެވަނަ ހާފަށް ނުކުތީ ދެ ބަދަލަކާއެކު. ރަފައެލް ލިއާއޯ އާއި ޕަލްހީނިއާގެ ބަދަލުގައި ކުޅެން ނުކުތީ ރުބެން ނެވޭސް އަދި ޕެޑްރޯ ނެޓޯ.

ދެވަނަ ހާފުގެ ކުޅުން ފެށީ ތުރުކީން.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-0 ގެ ނަތީޖާއަކުން ޕޯޗުގަލް ކުރީގައި އޮވެގެން.

'45 - ޔޫނުސް އަކްގުންއަށް ކުރި ފައުލަކާ ގުޅިގެން ޕޯޗުގަލްގެ ޖޮއާ ޕަލްހީނިއާއަށް ރީނދޫ ކާޑެއް.

ރެފްރީއަށް ޝަކުވާ ކުރުމުން ތުރުކީގެ މެހްމެތު ޒެކީ ޗެލިކްއަށް ވެސް ރީނދޫ ކާޑެއް.

'42 - ފައުލަކާ ގުޅިގެން ތުރުކީގެ އަކޭޑިންއަށް ރީނދޫ ކާޑެއް.

'41 - ތުރުކީގެ ހަމަލާއެއް. ޕެނަލްޓީ އޭރިއާ ބޭރުން އޯކުން ކުޗޫ ފޮނުވާލި ހަމަލާ، ޕޯޗުގަލް ކީޕަރު ޑިއޯގޯ ކޮސްޓާ ވަނީ މަތަކޮށްފައި.

'39 - ޑައިވް ކުރުމުން ރަފައެލް ލިއާއޯއަށް ރީނދޫ ކާޑެއް، ދެ ކާޑު ހަމަވުމުން ގްރޫޕުގެ ފަހު މެޗުގައި އޭނާއަށް ނުކުޅެވޭނެ.

'36 - ޕޯޗުގަލްގެ ހަމަލާއެއް. ޕެނަލްޓީ އޭރިއާ ބޭރުން ރޮނާލްޑޯ ފޮނުވާލި ހަމަލާ، ތުރުކީގެ ގޯލާ އަމާޒުވެފައެއް ނުވޭ.

'31 - ތުރުކީގެ އިތުރު ހަމަލާއެއް. ޕެނަލްޓީ އޭރިއާ ތެރެއިން އޮރްކޫން ކުޗޫ ފޮނުވާލި ހަމަލާ، ރޮނާލްޑޯ ވަނީ ބްލޮކްކޮށްފައި.

'30 - ތުރުކީއަށް ފުރުސަތެއް. ޕެނަލްޓީ އޭރިއާ ތެރެއިން ކަރެން އާކްތޫރްކޮގްލޫ ފޮނުވާލި ހަމަލާ، ޕޯޗުގަލް ކީޕަރު ޑިއޯގޯ ކޮސްޓާ ވަނީ މަތަކޮށްފައި.

'28 - ޕޯޗުގަލުން ލީޑު ފުޅާކޮށްފި. އެ ގޯލަކީ ތުރުކީގެ ސަމެތު އަކޭޑިން އަތުން ބައިކޮޅަށް ވަން ގޯލެއް. ތުރުކީގެ ކީޕަރު އަލްޓާއީ ބަޔިންދިރްއަށް އަކޭޑިން ޖެއްސި ބޯޅަ، އޭނާއަށް ނުލިބި، ގޯލުގެ ތެރެއަށް ވަނީ ވަދެފައި.

'25 - ނުރައްކާތެރި ފައުލަކާ ގުޅިގެން ތުރުކީގެ އަބްދުލްކެރީމް ބަރްޑަކްޗީއަށް ރީނދޫ ކާޑެއް.

'24 - ޕޯޗުގަލްގެ އިތުރު ހަމަލާއެއް. ލިއާއޯ ދިން ބޯޅައަކުން ޕެނަލްޓީ އޭރިއާ ބޭރުން ބްރޫނޯ ފެނާންޑޭޒް ފޮނުވާލި ހަމަލާ ދިޔައީ ތުރުކީގެ ގޯލާ އަމާޒުނުވެ ބޭރަށް.

'21 - ޕޯޗުގަލުން ގޯލު ޖަހައި ލީޑު ހޯދައިފި. ރަފައެލް ލިއާއޯ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ފޮނުވާލި ހަމަލާއަކުން ޕޯޗުގަލަށް އެ ގޯލު ކާމިޔާބުކޮށްދިނީ ބެނާޑޯ ސިލްވާ.

'15 - ޕޯޗުގަލްގެ ހަމަލާއެއް. ރޮނާލްޑޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ރަފައެލް ލިއާއޯ ފޮނުވާލި ބޯޅައިގައި ނުރައްކަލެއް ނެތް.

'8 - ޕޯޗުގަލްގެ ހަމަލާއެއް. ޖޮއާ ކަންސެލޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ރޮނާލްޑޯ ބޮލުން ފޮނުވާލި ހަމަލާ، ތުރުކީގެ ގޯލާ އަމާޒުވެފައެއް ނުވޭ.

'6 - ތުރުކީއަށް ހުސް ފުރުސަތެއް. މެހްމެތު ޒެކީ ޗެލިކް ނަގައިދިން ބޯޅަ، ޕޯޗުގަލް ގޯލު ކުރިމަތިން ކެރީމް އަކްޓޫކޮގްލޫގެ ފައިގައި ރަނގަޅަށް ބޯޅަ ލައްވާލައިފައެއް ނުވޭ.

'4 - ޕޯޗުގަލްގެ އިތުރު ހަމަލާއެއް. ޕެނަލްޓީ އޭރިއާ ބޭރުން ބްރޫނޯ ފެނާންޑޭޒް ފޮނުވާލި ހަމަލާ، ތުރުކީގެ ޑިފެންސުން ވަނީ ބްލޮކްކޮށްފައި.

'2 - ޕޯޗުގަލަށް ފުރުސަތެއް. ބެނާޑޯ ސިލްވާ ބޯޅައަކުން ޕެނަލްޓީ އޭރިއާ ތެރޭ ހުރެ ކްރިސްޓިއާނޯ ރޮނާލްޑޯ ފޮނުވާލި ހަމަލާ އަމާޒުވީ ތުރުކީ ކީޕަރު އަލްޓޭއީ ބަޔިންދީރްއާ ދިމާއަށް.

މެޗުގެ ކުޅުން ފަށައިފި. ކިކްއޯފް ކުރީ ޕޯޗުގަލުން.

ޕޯޗުގަލްގެ ފުރަތަމަ 11:

ތުރުކީގެ ފުރަތަމަ 11: