ޔޫރޯ 2024 ލައިވް: ޕޯޗުގަލް 2-1 ޗެކު ރިޕަބްލިކް (ފުލްޓައިމް)

މެޗުގެ އުސްއަލިތައް

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-1 ގެ ނަތީޖާއަކުން ޕޯޗުގަލް ކުރީގައި އޮވެގެން.

'90+2 - ޕޯޗުގަލުން ގޯލެއް ޖަހައި ލީޑު ހޯދައިފި. ޕެޑްރޯ ނެޓޯ ނަގައިދިން ހުރަހެއް ރޮބިން ހްރެނަކް ދިފާއުކުރުމާއެކު ލިބުނު ރީބައުންސް ބޯޅައަކުން ޕޯޗުގަލަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ޗިކޯ ކޮންޗޭކާއޯ. އޭނާއަށް ޕެނަލްޓީ އޭރިއާ ތެރެއިން ބޯޅަ ލިބުނު އިރު ހުރީ ވަރަށް ހުސްކޮށް.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'90 - ޕޯޗުގަލުން ތިން ބަދަލެއް. ވިޓީނިއާ އާއި ނޫނޯ މެންޑޭޒް އަދި ކެންސެލޯގެ ބަދަލުގައި ކުޅެން ނުކުތީ ޗިކޯ ކޮންޗޭކާއޯ އާއި ނެލްސަން ސެމޭޑޯ އަދި ޕެޑްރޯ ނެޓޯ.

'88 - ރޮނާލްޑޯ ބޮލުން ފޮނުވާލި ހަމަލާ، އަރިމަތީ ދަނޑީގައި ޖެހި ނުކުތުމާއެކު ޑިއޯގޯ ޖޮޓާއަށް ލިބުނު ރީބައުންސް ބޯޅަ، ޗެކްގެ ގޯލުގެ ތެރެއަށް ފޮނުވާލި ނަމަވެސް ވީއޭއާރްގެ އެހީގައި ރެފްރީ ނިންމީ ރޮނާލްޑޯ އޮފްސައިޑް މަގާމެއްގައި ހުރި ކަމަށް.

'82 - ޗެކްގެ ނުރައްކަލެއް. ޕެނަލްޓީ އޭރިއާ ތެރެއިން ޕީޓާ ސެވްޗިކް ފޮނުވާލި ހަމަލާއެއް ޕޯޗުގަލް ޑިފެންޑަރު ޑިއާޒް ބްލޮކްކުރުމާއެކު ލިބުނު ރީބައުންސް ބޯޅައިން ޕެނަލްޓީ އޭރިއާ ބޭރުން ޗެކްގެ ކެޕްޓަން ސޯޗެކް ފޮނުވާލި ހަމަލާ ދިޔައީ ޕޯޗުގަލް ގޯލުގެ އަރިމަތީ ދަނޑި ކައިރިން ބޭރަށް.

'79 - ޗެކްގެ ދެ ބަދަލެއް. ސުލްޗް އާއި ޕްރޮވޯޑްގެ ބަދަލުގައި ކުޅެން ނުކުތީ އެންޓޮނިން ބަރަކް އަދި ޕީޓާ ސެވްޗިކް.

'78 - ޕޯޗުގަލްގެ ނުރައްކަލެއް. ރޮނާލްޑޯ ދިން ބޯޅައަކުން ޕެނަލްޓީ އޭރިއާ ބޭރުން ވިޓީނިއާ ފޮނުވާލި ހަމަލާ، ޗެކްގެ ކީޕަރު ސްޓަނެކް ވަނީ މަތަކޮށްފައި.

'72 - ޕޯޗުގަލަށް ރަނގަޅު ފުރުސަތެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން ބެނާޑޯ ސިލްވާ ފޮނުވާލި ބާރު ހަމަލާ، ޗެކްގެ ކީޕަރު ސްޓަނެކް ވަނީ މަތަކޮށްފައި.

'69 - ޕޯޗުގަލުން ނަތީޖާ ހަމަހަމަކޮށްފި. އެ ގޯލަކީ ޗެކް ޑިފެންޑަރު ރޮބިން ހްރަނަކް އަތުން ބައިކޮޅަށް ވަން ގޯލެއް. ވިޓީނިއާ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ނޫނޯ މެންޑޭޒް ބޮލުން ފޮނުވާލި ހަމަލާ، ޗެކްގެ ކީޕަރު ސްޓަނެކް މަތަކުރި ނަމަވެސް، ހްރަނަކްގެ ފައިގައި ޖެހި ވަނީ ބައިކޮޅަށް ވަދެފައި.

'64 - ޕޯޗުގަލުން ދެ ބަދަލު. ޑަލޯ އާއި ލެއާއޯގެ ބަދަލުގައި ކުޅެން ނުކުތީ ގޮންކާލޯ އިނާސިއޯ އަދި ޑިއޯގޯ ޖޮޓާ.

'62 - ޗެކުން ގޯލެއް ޖަހައި ލީޑު ހޯދައިފި. ލަޑިމިއާ ކޯފާލް ދިން ބޯޅައަކުން ޕެނަލްޓީ އޭރިއާ ބޭރުން ފޮނުވާލި ހަމަލާއަކުން ޗެކަށް އެ ގޯލު ކާމިޔާބުކޮށްދިނީ ލޫކަސް ޕްރޮވޯޑް. އޭނާ ބޯޅަ އަމާޒުކޮށްލާފައިވަނީ ޕޯޗުގަލް ގޯލުގެ މަތީ ކަނަކަށް.

'61 - ޗެކްގެ ދެ ބަދަލެއް. ޝިކް އާއި ކުޗްޓާގެ ބަދަލުގައި ކުޅެން ނުކުތީ އޮންދްރޭ ލިންގާ އަދި މޮއިމިއާ ޗީޓިލް.

'58 - ޕޯޗުގަލް ކެޕްޓަން ރޮނާލްޑޯގެ ހިލޭ ޖެހުން އަމާޒުވީ ޗެކް ކީޕަރު ސްޓަނެކްއާ ދިމާއަށް.

'57 - ކެންސެލޯއަށް ކުރި ފައުލަކާ ގުޅިގެން ޗެކް ފޯވަޑް ޕެޓްރިކް ޝިކްއަށް ރީނދޫ ކާޑެއް، ޕޯޗުގަލަށް ހިލޭ ޖެހުމެއް.

'55 - ޕޯޗުގަލްގެ ނުރައްކަލެއް. ޑިއާސް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ރޮނާލްޑޯ ބޮލުން ފޮނުވާލި ހަމަލާ، ޗެކްގެ ޑިފެންޑަރު ތޯމަސް ހޯލްސްގެ ބޮލުގައި ޖެހި ވަނީ ބްލޮކްވެފައި.

'52 - ޕޯޗުގަލްގެ އިތުރު ހަމަލާއެއް. ޕެނަލްޓީ އޭރިއާ ބޭރުން ބެނާޑޯ ސިލްވާ ފޮނުވާލި ހަމަލާ ވެސް ޗެކްގެ ގޯލާ އަމާޒުވެފައެއް ނުވޭ.

'46 - ޕޯޗުގަލްގެ ހަމަލާއެއް. ޑިއޯގޯ ޑަލޯ ފޮނުވާލި ހަމަލާ، ޗެކްގެ ގޯލާ އަމާޒުވެފައެއް ނުވޭ.

ދެވަނަ ހާފު ފެށީ ޗެކް ރިޕަބްލިކުން.

ފުރަތަމަ ހާފުގެ އުސްއަލިތައް

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.

'45 - ޕޯޗުގަލްގެ ނުރައްކާތެރި ހަމަލާއެއް. ޖޮއާ ކެންސެލޯ ދިން ބޯޅައަކުން ޕެނަލްޓީ އޭރިއާ ތެރެއިން ރޮނާލްޑޯ ފޮނުވާލި ބާރު ހަމަލާ، ޗެކްގެ ކީޕަރު ސްޓަނެކް ވަނީ މަތަކޮށްފައި.

'44 - އަދިވެސް ގިނަ ވަގުތު ބޯޅަ ހިފަހައްޓައިގެން ކުޅެމުންދަނީ ޕޯޗުގަލުން. ޕޯޗުގަލްގެ ޑިފެންޑަރުން ވެސް ވަރަށް ބޮޑަށް ކުރިއަށްޖެހި އެޓޭކުގައި ބައިވެރިވޭ. ޗެކުން ކުޅެމުންދަނީ ޑިފެންސިވް ކުޅުމެއް.

'39 - ޕޯޗުގަލް ފޯވަޑް ލެއާއޯ ޕެނަލްޓީ އޭރިއާ ތެރެއަށް ޑައިވްކުރުމުން އޭނާއަށް ރީނދޫ ކާޑެއް ދައްކައިފި.

'33 - ޕޯޗުގަލަށް އިތުރު ހުސް ފުރުސަތެއް. ރޮނާލްޑޯ ދިން ރީތި ބޯޅައަކުން ޕެނަލްޓީ އޭރިއާ ތެރެއިން ވިޓީނިއާ ފޮނުވާލި ހަމަލާ، ޗެކްގެ ޑިފެންސުން ވަނީ ދިފާއުކޮށްފައި.

'32 - ޕޯޗުގަލަށް ހުސް ފުރުސަތެއް. ބްރޫނޯ ފެނާންޑޭޒް ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ރޮނާލްޑޯ ފޮނުވާލި ހަމަލާ، ޗެކްގެ ކީޕަރު ޔިންޑްރިޗް ސްޓަނެކް ވަނީ ހުޝިޔާރުކަމާއެކު މަތަކޮށްފައި.

'26 - ޕޯޗުގަލަށް ރަނގަޅު ފުރުސަތެއް. ކައުންޓާ އެޓޭކެއްގައި ބްރޫނޯ ފެނާންޑޭޒް ދިން ބޯޅަ، ޕެނަލްޓީ އޭރިއާ ތެރެއިން ލެއާއޯގެ ފައިގައި ލައްވާލާ ގޮތް ވެފައެއް ނުވޭ.

'24 - ޕޯޗުގަލްގެ އިތުރު ހަމަލާއެއް. ޕެނަލްޓީ އޭރިއާ ބޭރުން ބްރޫނޯ ފެނާންޑޭޒް ފޮނުވާލި ބާރު ހަމަލާ، ޗެކްގެ ކުޅުންތެރިއެއްގެ ފައިގައި ޖެހި ދިޔައީ ގޯލުގެ ހުރަސް ދަނޑިމަތިން ބޭރަށް.

'22 - ޕޯޗުގަލްގެ ހަމަލާއެއް. ވިޓީނިއާ ދިން ބޯޅައަކުން ޕެނަލްޓީ އޭރިއާ ބޭރުން ރުބެން ޑިއާޒް ފޮނުވާލި ހަމަލާ، ޗެކްގެ ޕަވެލް ސުލްޗް ވަނީ ބްލޮކްކޮށްފައި.

'19 - ޕޯޗުގަލްގެ މެދުތެރެއިން ރީތި ކުޅުމަކަށްފަހު ނެގި ހުރަސް، ޗެކްގެ ޕެނަލްޓީ އޭރިއާ ތެރޭ ހުރި ރޮނާލްޑޯގެ ބޮލުގައި ލައްވާލާ ގޮތެއް ނުވި.

'17 - ޕޯޗުގަލްގެ ހަމަލާއެއް. ނޫނޯ މެންޑޭޒް ދުރުން ފޮނުވާލި ހަމަލާ، ޗެކްގެ ގޯލާ އަމާޒުވެފައެއް ނުވޭ.

މެޗުގެ ފުރަތަމަ 15 މިނެޓުގެ ކުޅުން ނިމުނު އިރު، ދެ ޓީމުންކުރެ އެއްވެސް ޓީމަކަށް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ. ގިނަ ވަގުތު ބޯޅަ ހިފަަހައްޓައިގެން ޕޯޗުގަލް ކުޅުނު ނަމަވެސް، އެޓީމުގެ ވަރުގަދަ އެޓޭކިން ލައިންގެ މާބޮޑު ނުރައްކަލެއް ޗެކަށް ކުރިމައްޗެއް ނުވޭ.

'12 - ޗެކްގެ ޕެނަލްޓީ އޭރިއާ ތެރެއަށް ވަނުމަށްފަހު ލެއާއޯ ދިން ބޯޅަ ލިބޭ ހިސާބުގައި ޕޯޗުގަލްގެ ކުޅުންތެރިޔަކު ނެތް.

'8 - ޕޯޗުގަލްގެ ފުރަތަަމަ ހަމަލާ ރޮނާލްޑޯގެ ފަރާތުން. ރަފައެލް ލެއާއޯ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ކެޕްޓަން ކްރިސްޓިއާނޯ ރޮނާލްޑޯ ބޮލުން ފޮނުވާލި ހަމަލާގައި ބާރެއް ނެތް، ޗެކްގެ ގޯލާ އަމާޒުވެފައެއް ވެސް ނުވޭ.

'4 - ޕޯޗުގަލުން ބެނާޑޯ ސިލްވާ އަދި ބްރޫނޯ ފެނާންޑޭޒް ވެސް ޗެކް ރިޕަބްލިކްގެ ޕެނަލްޓީ އޭރިއާ ތެރެއަށް ބޯޅަތަކެއް ހުރަސްކުރި ނަމަވެސް، ބޯޅަ ލިބޭ ހިސާބުގައި ޕޯޗުގަލްގެ ކުޅުންތެރިޔަކު ނެތް.

މެޗުގެ ކުޅުން ފަށައިފި. ކިކްއޯފް ކުރީ ޕޯޗުގަލުން.

ޗެކް ރިޕަބްލިކްގެ ފުރަތަމަ 11:

ޕޯޗުގަލްގެ ފުރަތަމަ 11: