ހަނދުން ފެން ހޯދުމަށް ރަޝިޔާއިން ފޮނުވާލި އުޅަނދު މިމަހުގެ 21 ވަނަ ދުވަހު ހަނދަށް ތިރިކުރާނެ

ހަނދުން ފެން ހޯދުމަށް ރަޝިޔާއިން ފޮނުވި އުޅަނދު މިމަހުގެ 21 ވަނަ ދުވަހު ހަނދަށް ތިރިކުރާނެ ކަމަށް އެ ގައުމުގެ ޖައްވީ އިދާރާއިން ބުނެފިއެވެ.

މިދިޔަ ހުކުރު ދުވަހު ރަޝިޔާއިން ވަނީ ލޫނާ-25 ނަމުން ނަންދީފައިވާ އެ އުޅަނދު ރޮކެޓެއްގެ އެހީގައި ޖައްވަށް ފޮނުވައިފައެވެ.

ހަނދުގެ ދެކުނު ފަޅީގައި ފެން ހުރިކަމަށް ޖައްވީ ދިރާސާތަކުން ހޯދިފައިވުމާއެކު ރަޝިޔާއިން ފޮނުވާލި އުޅަނދު އެކަން ޔަގީން ކުރުމަށް ދިރާސާ ކުރުމަށް ވަނީ ހަމަޖެހިފައެވެ.

ލޫނާ-25 ރައްކާތެރިކަމާއެކު ހަނދުގެ ދެކުނު ފަރާތަށް ތިރިކޮށްފި ނަމަ ރަޝިއާ ވެގެން ދާނީ ހަނދުގެ އެސަރަހައްދަށް އުޅަނދެެއް ތިރިކުރާ ފުރަތަމަ ގައުމަށެވެ.

ރަޝިޔާގެ ޖައްވީ އިދާރާ ރޮސްކޮމޯސް އިން ވަނީ ލޫނާ-25 ގެ ދަތުރު ހަނދާއި ދިމާލަށް ފަށާފައިވާކަމަށް ބުނެފައެވެ. އެ އިދާރާއިން ވަނީ ލޫނާ-25ގެ ސިގުނަލް އެއިދާރާއަށް ފުރިހަމައަށް ލިބޭކަމަށް ބުނެފައެވެ. އަދި ރޭވިފައިވާ ގޮތަށް ކުރިޔަށް ދާނަމަ މިމަހުގެ 21 ވަނަ ދުވަހު އެއުޅަނދު ހަނދަށް ތިރިކުރާނެ ކަމަށް ރޮސްކޮމޯސް އިން ބުނެފައިވެއެވެ.

ރޮސްކޮމޯސްގެ ލޫނާ-25 އަކީ އިންޑިއާއިން ހަނދަށް ފޮނުވާލި ޗަންދްރަޔާން-3 އާއި ވާދައަށް ފޮނުވާލި އުޅަނދެއްކަމަށް ބައެއްފަރާތްތަކުން ވަނީ ފާހަގަކޮށްފައެވެ.

ކުޑަ ކާރެއްގެ ސައިޒުގެ ލޫނާ-25 ހަނދަށް ތިރިކުމަށްފަހު ދިރާސާކުރުމަށް ހަނދުން ބައެއް ސާމްޕަލް އެއްކުރުމަށްވެސް ހަމަޖެހިފައިވެއެވެ.