އާސަންދައިގެ ހިދުމަތް، ޖެންޑާ މިނިސްޓްރީއަށް ބަދަލު ކުރަން ހުށަހެޅި އިސްލާހު ބަލައިގެންފި

ނެޝަނަލް ސޯޝަލް ޕްރޮޓެކްޝަން އެޖެންސީން ދެމުން އަންނަ އާސަންދައިގެ ހިދުމަތް، ހެލްތު މިނިސްޓްރީގެ ދަށުން ޖެންޑާ މިނިސްޓްރީއަށް ބަދަލު ކުރުމަށް ގާނޫނަށް ހުށަހެޅި އިސްލާހު މަޖިލީހަށް ބަލައިގަނެފިއެވެ.

ސަރުކާރުގެ ފަރާތުން އެ ހިދުމަތް ބަދަލުކުރުމަށް ހުށަހަޅާފައިވަނީ، އިޖުތިމާއީ ސިއްހީ އިންޝުއަރެންސްގެ ގައުމީ ނިޒާމުގެ ގާނޫނަށް ގެންނަ އިސްލާހެއްގެ ގޮތުގައެވެ.

މަނަދޫ ދާއިރާގެ މެންބަރު އަހުމަދު ހާރޫނު މި އިސްލާހު ހުށަހަޅުއްވާފައިވަނީ އެ ގާނޫނުގެ 42 ވަނަ މާއްދާއަށެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މި އިސްލާހު މަޖިލީހަށް ބަލައިގަތީ، ޖަލްސާގައި ތިއްބެވި 66 މެންބަރުންގެ ތެރެއިން 65 މެންބަރުން ވޯޓު ދެއްވައިގެންނެވެ.

މިބިލު މަޖިލީހަށް ބަލައިގަތުމުން އިތުރަށް ދިރާސާ ކުރުމަށް ބިލު ވަނީ އިޖުތިމާއީ ކޮމިޓީއަށް ފޮނުވައިފައެވެ.

ގާނޫނުގެ 42 ވަނަ މާއްދާގައި މިހާރު ބުނެފައިވަނީ، އިޖްތިމާއީ ސިއްހީ އިންޝުއަރެންސްގެ ގައުމީ ނިޒާމު ހިންގުމަށްޓަކައި "ނެޝަނަލް ސޯޝަލް ޕްރޮޓެކްޝަން އެޖެންސީ" އޮންނަން ޖެހޭނެ ކަމަށެވެ. އަދި މި ހިދުމަތް ހިނގަމުންދާނީ ސިއްހަތާބެހޭ ކަންކަން ބެލެހެއްޓުމުގެ މަސްއޫލިއްޔަތު ހަވާލު ކުރެވިފައިވާ ވަޒީރުގެ މަސްއޫލިއްޔަތުގެ ދަށުން ކަމަށްވެސް ބުނެފައިވެއެވެ.

ގާނޫނަށް އިސްލާހު ހުށަހަޅާފައިވަނީ، ހެލްތު މިނިސްޓަރުކަމަށް ގާނޫނުގައި ބުނެފައިވާ މާއްދާ، ރައްޔިތުންނަށް އިޖުތިމާއީ ހިދުމަތްތައް ފޯރުކޮށްދިނުމާގުޅޭ ސިޔާސަތުތައް ކަނޑައެޅުމުގެ މަސްއޫލިއްޔަތު ހަވާލު ކުރެވިފައިވާ ސަރުކާރުގެ ވުޒާރާގެ ވަޒީރަށް ބަދަލު ކުރުމަށެވެ.