ޕީސީބީ ބޯޑު އުވާލަން ރައީސުލް ޖުމްހޫރިއްޔާއަށް ދަންނަވަން މަޖިލީހަށް ހުށަހަޅައިފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން (ޕީސީބީ)ގެ މިހާރުގެ ބޯޑު އުވާލައި އެ ބޯޑަށް އަލުން މެންބަރުން އައްޔަންކުރައްވައި މަޖިލީހުގެ ރުހުން ހޯއްދަވަން ފޮނުއްވެެވުމަށް ރައްޔިތުންގެ މަޖިލީހުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ދަންނަވަން ކޮމިޓީން ނިންމި ރިޕޯޓް މަޖިލީހަށް ހުށަހަޅުއްްވައި ބަހުސް ފަށައިފިއެވެ.

މިއީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ މަސްއޫލިއްޔަތު އަދާކޮށްފައިވާ މިންވަރު ބަލައި، ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީން މަޖިލީހަށް މިއަދު ހުށަހެޅި ރިޕޯޓްގައި ހިމަނައިގެން ބަހުސް ކުރަމުންދާ މައްސަލައެކެވެ.

މި ރިޕޯޓް މިއަދުގެ ޖަލްސާއަށް ހުށަހެޅުއްވީ، އެ ކޮމިޓީގެ މުގައްރިރު ހުޅުދޫ ދާއިރާގެ މެންބަރު އިލިޔާސް ލަބީބެވެ.

ޕީސީބީގެ މެންބަރުން ކޮމިޓީއަށް ހާޒިރުކޮށްގެންނާއެކު، އެ ކޮމިޓީން ބެލި ބެލުމުން ކޮމިޓީއަށް ފާހަގަކުރެވޭ 12 ކަމެއް ކޮމިޓީ ރިޕޯޓްގައި ވަނީ ފާހަގަކޮށްފައެވެ.

އޭގެ ތެރޭގައި 2014 ވަނަ އަހަރުގެ ޖެނުވަރީ 26 ގައި ޕީސީބީގެ ބޯޑް ރައީސުލް ޖުމްހޫރިއްޔާ ފުރަތަމަ އެކުލަވާލައި، އެ ބޯޑުގެ 4 އަހަރުގެ ދައުރުނިމި 29 ޖެނުއަރީ 2018 ގައި ދެވަނަ ފަހަރަށް އަލުން ބޯޑު އެކުލަވާލި ނަމަވެސް (ދައުލަތުގެ ވިޔަފާރިތަންތަން ޕްރައިވެޓައިޒް ކުރުމާއި ކޯ ޕްރަވެޓައިސް ކުރުމާއި އަދި މޮނިޓާކޮށް އިވެލުވޭޓް ކުރުމުގެ ގާނޫނު)ގެ 4 ވަނަ މާއްދާގެ (ށ) ގައި ބަޔާންކޮށްފައިވާ ގޮތަށް މަޖިލީހުގެ ރުހުން ހޯދާފައި ނުވާކަން ވަނީ ފާހަގަކޮށްފައެވެ.

އަދި އެ ގާނޫނުގެ ތިންވަނަ މާއްދާގެ ދަށުން ބޯޑު އެކުލެވިގެންވާނީ ރައީސާއި ނާއިބު ރައީސާއެކު ރައީސުލް ޖުމްހުފިއްޔާ އައްޔަންކުރާ ޖުމްލަ 7 މެންބަރުންގެ މައްޗަށް ކަމަށްވީ ނަމަވެސް 2018 ޖެނުއަރީ 29 ގައި ރައީސުލް ޖުމްހޫރިއްޔާ ބޯޑް އެކުލަވާ ލެއްވިއިރު ބޯޑުގެ ރައީސާއެކު އައްޔަންކުރައްވާފައިވަނީ ފަސް މެންބަރުން ކަންވެސް ވަނީ ފާހަގަ ކޮށްފައެވެ.

މީގެ އިތުރުން އެބޯޑުން ގާނޫނާ އެއްގޮތަށް ކޮށްފައިނުވާ ކަންކަން ފާހަގަކޮށް، ގާނޫނުން ބޯޑުގެ މައްޗަށް މަތިކޮށްފައިވާ މަސްއޫލިއްޔަތުތައް އާދާނުކުރެއްވުމާއި، އިދާރީގޮތުން ހިންގަންޖެހޭ ކަންކަން ނުކުރުމާއި އަދި ގާނޫނު އޭގެ ފުރިހަމަ ގޮތުގައި ތަންފީޒު ކުރެވެމުން ނުދާކަން ވެސް ރިޕޯޓްގައި ވަނީ ފާހަގަ ކޮށްފައެވެ.

"އެހެންކަމުން (ދައުލަތުގެ ވިޔަފާރިތަންތަން ޕްރައިވެޓައިޒް ކުރުމާއި ކޯ ޕްރަވެޓައިސް ކުރުމާއި އަދި މޮނިޓާކޮށް އިވެލުވޭޓް ކުރުމުގެ ގާނޫނު)ގެ ދަށުން އުފައްދާފައިވާ ޕްރަވަޓައިޒޭޝަން އެންޑް ކޯޕްރަވަޓައިޒޭޝަން ބޯޑުގެ ގާނޫނީ ޒިންމާ އަދާކުރެވިފައިވާ މިންވަރު ރިވިއު ކުރުމާގުޅޭގޮތުން ކޮމިޓީން މަޝްވަރާ ކުރެއްވުމަށްފަހު، ކޮމިޓީގައި އެވަގުތު ތިއްބެވި 7 މެންބަރުންގެ އިއްތިފާގުން ނިންމެވީ، އެ ގާނޫނުގެ 7 ވަނަ މާއްދާގެ (ރ) ގައިވާގޮތުގެމަތިން ބޯޑު މެންބަރުން ވަކިކުރުމަށްފަހު އެ ގާނޫނުގެ 4 ވަނަ މާއްދާގެ (ހ) އާއި ނުވަވަނަ މާއްދާގެ (ހ) ގައި ބަޔާންކޮށްފައިވާގޮތުގެ މަތިން ރައީސުލް ޖުމްހޫރިއްޔާ، އެ ބޯޑަށް އަލުން މެންބަރުން އައްޔަން ކުރައްވައި ރައްޔިތުންގެ މަޖިލީހުގެ ރުހުން ހޯދުމަށް ރައީސުލް ޖުމްހޫރިއްޔާއަށް ދެންނެވުމަށެެވެ." ކޮމިޓީގެ ރިޕޯޓްގައި ބުނެފައިވެއެވެ.