އެހެން ގައުމުތަކުގެ މީހުންނަށް ރަށްވެހިކަން ދިނުމަކީ އިޔާދަ ނުކުރެވޭ ގެއްލުންތަކެއް ލިބިދާނެ ކަމެއް: ޑރ. މުއިއްޒު

ދިވެހިން ނޫން ބަޔަކަށް ރާއްޖޭގެ ރަށްވެހިކަން ދިނުމަކީ އިޔާދަ ނުކުރެވޭ ވަރުގެ ގެއްލުންތަކެއް ލިބިދާނެ ކަމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.

އެމްޑީޕީގެ ޕާލިމެންޓްރީ ގްރޫޕިގެ ލީޑަރު، އަދި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ވަނީ ރާއްޖޭގައި 30 އަށްވުރެ ގިނަ އަހަރު ހޭދަކޮށް، މާމަ ކާފަ ކިޔާފައި ތިބި ބިދޭސީން އެބަތިބި ކަމަށާއި އެފަދަ ފަރާތްތަކަށް ރާއްޖޭގެ ރަށްވެހިކަން ދޭން ނުފެނޭތޯ ޓްވީޓާގައި ސުވާލު އުފައްދަވައިފައެވެ.

އެޓުވީޓަށް ޖަވާބު ދެއްވަމުން އިދިކޮޅު ޕީޕީއެމްގެ ނައިބު ރައީސް މުއިއްޒު ވިދާޅުވީ، ދިވެހީން ނޫން ބަޔަކަށް ދިވެހިރާއްޖޭގެ ސިޓިޒަންޝިޕް (ރަށްވެހިކަން) ދިނުމަކީ މި ކުޑަ ކުޑަ މުޖުތަމައުގެ އެއް ނަސްލެއް ކަމާއި އެއް ދީނަކަށް އުޅުމާއި އެއްބަހަކުން ވާހަކަ ދެއްކުން ފަދަ ކަންކަމަށް ދުރު މުސްތަގުބަލެއްގައި އިޔާދަ ނުކުރެވޭފަދަ ގެއްލުންތަކެއް ވެދާނެ ކަމެއް ކަމަށެވެ.

މުއިއްޒު ވަނީ ސިޔާސީ ކަންކަމުގެ މައްޗަށް ގައުމިއްޔަތު އިސް ކުރުމަށް ގޮވާލާފައެވެ.

މުއިއްޒު އެހެން ވިދާޅުވެފައިވާއިރު، އެހެން ގައުމުތަކުގެ މީހުންނަށް ރަށްވެހިކަން ދެވޭ ގޮތަށް ގާނޫނަށް އިސްލާހެއް ގެންނަން ސަރުކާރުން އުޅޭ ކަމަށް ނައިފަރު ދާއިރާގެ މެންބަރު އަހްމަދު ޝިޔާމްވެސް ވަނީ ވިދާޅުވެފައެވެ.

އިދިކޮޅު ފަރާތްތަކުން ބުރާސްފަތި ދުވަހުގެ ރޭ 'ކޮބާ ނުވިއެއްނު"، ނަމުގައި ބޭއްވި ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ ސަރުކާރުން އެބިލު ވަރަށް އަވަހަށް މަޖިލީހަށް ހުށަހަޅާނެ ކަމަށެވެ.