ޚަބަރު

އުފާ ފެސްޓިވަލް ފަށައިފި، މިރޭ ހަވާ ވެސް އަރުވާނެ

ފާތިމަތު ލިޔުޝާ

ހުޅުމާލޭގައި މީހުން އާބާދުވާން ފެށިތާ 20 އަހަރު ފުރުމާއި ކުޑަކުދިންގެ ދުވަސް ފާހަގަ ކުރުމަށް ކުރިއަށްގެންދާ "އުފާ ފެސްޓިވަލް" ފަށައިފިއެވެ.

އިޖުތިމާއީ އަދި އާއިލީ ތަރައްގީއާ ބެހޭ މިނިސްޓްރީ އާއި ހައުސިން ޑިވެލޮޕްމެންޓް ކޯޕަރޭޝަން އަދި އުރީދޫ ގުޅިގެން ހުޅުމާލެ ސެންޓްރަލް ޕާކުގައި ކުރިއަށް ގެންދާ އުފާ ފެސްޓިވަލް ފަށާފައިވަނީ އިއްޔެ ހަވީރެވެ. މި ފެސްޓިވަލް ފައްޓަވައިދެއްވީ އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދާއި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ. އާއިޝަތު ޝިހާމްއެވެ. މި ފެސްޓިވަލް ފެށުމުގެ ރަސްމިއްޔާތުގައި އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒުވެސް ބައިވެރިވެވަޑައިގެންނެވިއެވެ.

ކޭކު ފެޅުމުގެ ހަރަކާތަކާ އެކު ފެށި މި ފެންޓިވަލް މިއަދުގެ ނިޔަލަށް ކުރިއަށްދާނެއެވެ. މި ފެސްޓިވަލްގައި ކުޑަކުދިންގެ ހާއްސަކޮށްގެން ކުރިޔަށްގެންދާ ކުޅިވަރު ސްޓޯލްތަކާއި ކާބޯތަކެތީގެ ސްޓޯލްތަކުގެ އިތުރުން ސްޓޭޖް ޝޯގެ ހަރަކާތްތައް ހިމެނެއެވެ.

ބައުންސިން ކާސަލް އާއި ތަފާތު މެސްކޮޓްގެ އިތުރުން އެމްއެންޑީއެފްގެ ފަޔާ ޓްރަކް، އެމްޓީސީސީގެ ބަސް އަދި އެމްޕީއެލްގެ ރީޗް ސްޓެކާއަށް އަރާލުމުގެ ފުރުސަތުވެސް ލިބިގެންދާނެއެވެ.

އިއްޔެ ކުރިޔަށްގެންދިޔަ ހަރަކާތްތައް:

ކޭކު ފެޅުން
މިސް ޔޫލީ އާއެކު ކުޑަކުދިންގެ ވާހަކަ ކިޔުން
ރޮބޯ މޭންގެ ހަރަކާތްތައް
1438ގެ ބޮޑުބެރުގެ ހަރަކާތްތައް

މިއަދު ކުރިޔަށް ގެންދިއުމަށް ނިންމާފައިވާ ހަރަކާތްތައް:

ހަވީރު 4:00ގައި ފެން ކުޅިވަރު
ރޭގަނޑު 8:00 ގައި މޫވީ ނައިޓް
ރޭގަނޑު 9:45ގައި ހަވާ އެރުވުން

ބައިނަލް އަގުވާމީ ކުޑަކުދިންގެ ދުވަހުގެ ގޮތުގައި ފާހަގަކުރަނީ މެއި މަހުގެ 10 ވަނަ ދުވަހެވެ. ކުޑަކުދިންގެ ދުވަހެއް އެންމެ ފުރަތަމަ ފާހަގަކުރަން ފަށާފައިވަނީ 1954 ވަނަ އަހަރުގައެވެ.