މަސައްކަތްތެރިންގެ ހައްގުތައް ކަށަވަރުކުރުމުގައި އެމްޑީޕީ ދެމި އޮންނާނެ: ރައީސް ސޯލިހު

މަސައްކަތްތެރީންގެ ހައްގުތައް ކަށަވަރުކުރުމަށް ކުރަން ޖެހުނު ކޮންމެ ކަމެއް އެމްޑީޕީ އިން ކުރާނެ ކަމަށް އެ ޕާޓީގެ އެޑްވައިޒަރު އަދި ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

މިއަދު ފާހަގަކުރާ މަސައްކަތްތެރިންގެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ސޯލިހު ވިދާޅުވީ، މަސައްކަތްތެރިންގެ ހައްގުތައް ކަށަވަރުކުރުމަށް ގައުމީ މަސައްކަތެއް ކުރީ އެމްޑީޕީ އިން ކަމަށެވެ. އެގޮތުން އެންމެ ކުޑަ އުޖޫރަ ކަނޑައެޅުމާއި މަސައްކަތްތެރިންގެ ގާނޫނެއް ވުޖޫދު ކުރުވުމަކީ އެމްޑީޕީ އިން ފަހުރުވެރިވާ ކަމެއް ކަމުގައި ވިދާޅުވިއެވެ.

"މި މޭޑޭގައި އަޅުގަނޑުމެން ޔަގީންކަން އަރުވަން، މަސައްކަތްތެރިންގެ ހައްގުތަކަށް ފުރިހަމަ ރައްކާތެރިކަން ހޯދައިދިނުމަށްޓަކައި ކުރަން ޖެހުނު ކޮންމެ ކަމެއް އަޅުގަނޑުމެން ކުރާނެކަމުގެ" ރައީސް ސޯލިހު ވިދާޅުވިއެވެ.

މަސައްކަތްތެރިންގެ ހައްގުތައް ކަށަވަރުކުރުމުގައި އެމްޑީޕީ އިން ދެމި އޮންނާނެ ކަމަށް ރައީސް ސޯލިހު ވިދާޅުވި އިރު، ނިމިދިޔަ މަޖިލިސް އިންތިހާބުން އެމްޑީޕީ ބޮޑުތަނުން ބަލިވީ، ސަރުކާރުން ދެއްކި ބިރާއި ފޯރުވި ނުފޫޒުގެ ސަބަބުން ކަމަށް އެ ޕާޓީގެ ޗެއާޕާސަން ފައްޔާޒް އިސްމާއިލް ވަނީ ވިދާޅުވެފައެވެ.