ޚަބަރު

ރާއްޖޭގެ 10 ސަރަހައްދެއްގައި އެއާޕޯޓު ހަދަނީ، ފައިނާއި މަތިވެރި ހިމެނޭ!

ރާއްޖޭގެ 10 ސަރަހައްދެއްގައި އެއާޕޯޓު ތަރައްގީ ކުރަން ރައީސް ޑރ. މުހައްމަދު މުއިއްޒު ނިންމަވައިފިއެވެ.

ރައީސް މިއަދު ވަނީ އާންމު މަންފާއަކަށްޓަކައި ހާސިލުކުރަން ބޭނުންވާ އިގުތިސޯދީ ސިޔާސަތެއްގެ ދަށުން ހިންގާނޭ މުހިންމު މަޝްރޫއުތައް ކަނޑައެޅުމުގެ ގަރާރަށް އިސްލާހުތަކެއް ގެންނަވައި ގަރާރެއް ނެރުއްވައިފައެވެ.

އެ ގަރާރުގައި އަލަށް ހިންގުމަށް ނިންމާފައިވާ އެއާޕޯޓު މަޝްރޫއުތަކާއި އިތުރަށް ތަރައްގީ ކުރުމަށް ނިންމާފައިވާ އެއާޕޯޓު މަޝްރޫއުތަކުގެ އިތުރުން އައްސޭރި ޓޫރިޒަމް ހިންގަން ނިންމާފައިވާ ސަރަހައްދުތަކާއި އެ މަޝްރޫއުތަކަށް އެންމެ ދަށްވެގެން އިންވެސްޓް ކުރަންޖެހޭ އަދަދު ރައީސް ވަނީ ގަރާރުން ކަނޑައަޅުއްވައިފައެވެ.

އަލަށް ގާއިމުކުރާ އެއާޕޯޓުތަކާއި އެންމެ ދަށްވެގެން ހަރަދުކުރަން ޖެހޭ އަދަދު

ހއ. ދިއްދޫ - 5،000 ޑޮލަރު
ށ. ދިގުވެލި - 5،000 ޑޮލަރު
ށ. މިލަންދޫ - 5،000 ޑޮލަރު
ނ. ވިހަފަރު - 5،000 ޑޮލަރު
ރ. ފައިނު - 5،000 ޑޮލަރު
އއ. މަތިވެރި - 5،000 ޑޮލަރު
ފ. ނިލަންދޫ - 5،000 ޑޮލަރު
ގއ. މާޅެންދޫ - 5،000 ޑޮލަރު
ތ. ގުރައިދޫ - 5،000 ޑޮލަރު
ލ. އަތޮޅުގައި ދެވަނަ އެއާޕޯޓެއް (ސަރުކާރުން ކަނޑައަޅާ ތަނެއް) - 5،000 ޑޮލަރު

މީގެ ތެރެއިން ގިނަ ރަށްރަށަކީ ރިޔާސީ އިންތިހާބުގެ ކެމްޕެއިން ތެރޭގައި ރައީސް މުއިއްޒު އެއާޕޯޓު ހަދާނެ ކަމަށް ވައުދުވެވަޑައިގެންނެވި ސަރަހައްދުތަކެވެ. އަދި ރޯދައިގެ ކުރިން ރާއްޖޭގެ ބައެއް ރަށްރަށަށް ކުރެއްވި ދަތުރުފުޅުގެ ތެރެއިން ވެސް އެމަނިކުފާނު ވަނީ މީގެ ތެރެއިން ބައެއް ރަށްރަށުގައި އެއާޕޯޓު ތަރައްގީ ކުރައްވާނެ ކަމަށް ވިދާޅުވެފައެވެ.

އެގޮތުން ރައީސް މުއިއްޒު ރިޔާސީ އިންތިހާބުގެ ކެމްޕެއިންގައި ލ. އަތޮޅަށް ކުރެއްވި ދަތުރުފުޅުގެ ތެރެއިން އެ އަތޮޅު ކުނަހަންދޫގައި ބޭއްވި ޖަލްސާގައި ލ. އަތޮޅުގައި އިތުރު އެއާޕޯޓެއް ތަރައްގީ ކުރައްވާނެ ކަމަށް ވަނީ ވިދާޅުވެފައެވެ. އަދި ރ. އަތޮޅުގެ ދެކުނު ބިތުގައި ހަދަން މިދިޔަ ސަރުކާރުން ވައުދުވެފައިވާ އެއާޕޯޓު ފައިނުގައި ތަރައްގީ ކުރައްވަން ރައީސް ވައުދުވެވަޑައިގެންނެވިއެވެ. މިދިޔަ ސަރުކާރުން ނިންމީ ރ. އަތޮޅު ބެރިޔަންފަރުގައި އެއާޕޯޓު ތަރައްގީ ކުރުމަށެވެ.

މީގެ ތެރެއިން ފ. ނިލަންދޫގައި ހަދާ އެއާޕޯޓަށް ބޭނުންވާ ބިން ހިއްކުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށް މިއަދު ވަނީ އެއްބަސްވުމުގައި ސޮއިކޮށްފައެވެ.

އިތުރަށް ތަރައްގީ ކުރުމަށް ނިންމާފައިވާ އެއާޕޯޓުތަކާއި އެންމެ ދަށްވެގެން ހަރަދުކުރަން އަދަދު

ގަން އިންޓަނޭޝަނަލް އެއާޕޯޓު - 4،000 ޑޮލަރު
ފުނަދޫ އެއާޕޯޓް - 4،000 ޑޮލަރު
ދަރަވަންދޫ އެއާޕޯޓް - 4،000 ޑޮލަރު
ކުޅުދުއްފުށީ އެއާޕޯޓް - 4،000 ޑޮލަރު
ފުވައްމުލަކު އެއާޕޯޓް - 4،000 ޑޮލަރު
މާވަރުލު އެއާޕޯޓް - 4،000 ޑޮލަރު

ރައީސްގެ ގަރާރުން ވަނީ ލ. ގަމާއި އައްޑޫ ސިޓީގައި އައްސޭރި ޓޫރިޒަމް ހިންގުމަށްވެސް ނިންމަވައިފައެވެ. އެގޮތުން ލ. ގަމު އައްސޭރި ޓޫރިޒަމް މަޝްރޫއަށް އެންމެ ދަށްވެގެން 7،000 ޑޮލަރު އިންވެސްޓް ކުރަންޖެހޭނެއެވެ. އަދި އައްޑޫ ސިޓީ އައްސޭރި ޓޫރިޒަމް މަޝްރޫއަށް އެންމެ ދަށްވެގެން 10،000 ޑޮލަރު އިންވެސްޓް ކުރަންޖެހޭނެއެވެ.