އައިޖީއެމްއެޗުން ތުއްތު ކުއްޖަކަށް ނުބައި ބޭސްތަކެއް ދިން މައްސަލައެއް!

ސަރުކާރުގެ މައި ހޮސްޕިޓަލް އައިޖީއެމްއެޗުން ތުއްތު އަންހެން ކުއްޖަކަށް އޮޅިގެން ނުބައި ބޭހެއް ދިން މައްސަލައެއް ސޯޝަލް މީޑިއާގައި ފެންމަތިވެއްޖެއެވެ.

އެ ކުއްޖާގެ މަންމަ އިއްޔެ ފޭސްބުކުގައި ކުރި ޕޯސްޓެއްގައި ބުނީ މިދިޔަ ހޯމަ ދުވަހު ވިހެއި އޭނާގެ ދަރިފުޅުގެ ބަރުދަނުގައި ހަތަރު ކިލޯ ހުރުމުން ކުއްޖާގެ ހާލު ރަނގަޅު ކަމަށް ޑޮކްޓަރު މައުލޫމާތު ދިން ކަމަށެވެ. އެހެންވެ ކުއްޖާއަށް އެންއައިސީޔޫގައި ފަރުވާ ދޭން ނުޖެހޭނެ ކަމަށް ޑޮކްޓަރު މައުލޫމާތު ދިން ކަމަށެވެ.

"ނަމަވެސް ޖެހިގެން އައި ރޭ އެ މީހުން ވަނީ ދަރިފުޅު ރީނދޫވާތީ އެންއައިސީޔޫ ގެންގޮސްފަ. ބުދަ ދުވަހުގެ ރޭ ޑޮކްޓަރު ގުޅާފައި މައުލޫމާތު ދިނީ އިންފެކްޝަނެއް ހުރުމުން ދަރިފުޅަށް އެންޓިބަޔޮޓިކްސް ދިން ކަމަށް. އަޅުގަނޑު ބުނިން މައްސަލައެއް ނެތޭ،" ކުއްޖާގެ މަންމަ ބުންޏެވެ.

ކުއްޖާގެ މަންމަ ބުނީ ހަމަ އެ ރޭ އެންއައިސީޔޫ އިން ގުޅާފައި ދަރިފުޅަށް ގާތުން ދިނުމަށް އައިސްދިނުމަށް އެދުނު ކަމަށެވެ. އެންއައިސީޔޫއަށް ދިއުމުން އެތަނުގައި ހުރި ނަރުހެއް ވަނީ 4:00 ޖަހާއިރު ދަރިފުޅަށް އެންޓިބަޔޮޓިކް ދޭނެ ކަމަށް މައުލޫމާތު ދީފައި ކަމަށާއި އަދި އިތުރު އެންޓިބަޔޮޓިކެއް 5:00 ޖަހާއިރު ދޭނެ ކަމަށެވެ. އެ ފަހުން މިދިޔަ ބުރާސްފަތި ދުވަހު އެންއައިސީޔޫ އިން ގުޅާފައި ދަރިފުޅާއި މަންނަ އެ ވޯޑެއްގައި އެޑްމިޓްކުރާނެ ވާހަކަ ބުނި ކަމަށެވެ.

ދަރިފުޅުގެ ހާލު ރަނގަޅު ނަމަވެސް ރީނދޫ ވެފައިވާތީ ފޮޓޯތެރެޕީ ދަރިފުޅަށް ދިން ކަމަށް ކުއްޖާގެ މަންމަ ބުންޏެވެ. އެރޭ 1:00 ޖެހިއިރު އެ ވޯޑުގައި ހުރި ނަރުހަށް ވަނީ ކުއްޖާއަށް އެންޓިބަޔޮޓިކްގެ އިތުރު ޑޯޒެއް ދެވިފައިވާކަން ފާހަގަވެފައި ކަމަށް ކުއްޖާގެ މަންމަ ބުންޏެވެ.

"އަޅުގަނޑަށާއި އަޅުގަނޑުގެ ފިރިމީހާއަށް ކޮންސަލްޓެންޓް އެންގީ ބޭހުގެ 60 މިލިގްރާމް އިތުރަށް ދަރިފުޅަށް ދެވިފައިވާ ކަމަށް. އެ ދުވަހުގެ ފަތިހު 5:00 ގައި ދީފައި ހުއްޓާލަން ޖެހޭ ބޭހެއް ހަވީރު ވެސް ދީފައި ވަނީ. އެހެންވެ އަހަރެންގެ ދަރިފުޅަށް ދީފައި ވަނީ، ބޭހުގެ 120 މިލިގްރާމް،" ކުއްޖާގެ މަންމަ ބުންޏެވެ.

"އެންޓިބަޔޮޓިކް އިތުރަށް ދެވުމުގެ ސަބަބުން ކުއްޖާގެ ކިޑްނީ ފެއިލްވެ އަޑުއިވުމުން މަހުރޫމުވުމުގެ އިތުރުން ނާރުގެ ބަލިތަކަށް މަގުފަހިކުރުވާ ޑޮކްޓަރު މައުލޫމާތު ދިން،"

ހޮސްޕިޓަލުން ބުނީ އެފަދަ އެއްވެސް އަލާމާތެއް ފެނިއްޖެނަމަ ފަރުވާ ދެވޭނެކަން ކަމަށް އެކަނި ކަމަށް ކުއްޖާގެ މަންމަ ބުންޏެވެ. އަދި ވަނީ ދަރިފުޅަށް އިތުރަށް އެންޓިބަޔޮޓިކް ދެވުމުގެ ސަބަބުން މައާފަށް އެދިފައި ކަމަށެވެ.

ކުއްޖާގެ މަންމަ ވަނީ އެކަމުގެ ޒިންމާ ނަގާނީ ކޮން ފަރާތަކުންތޯ ސުވާލުކޮށްފައެވެ. ދަރިފުޅުގެ ނުވެސް ނެތް ބަލިތަކަށް ބޭސް ދީފައިވާ ކަމަށާއި ރިޕޯޓުތައް ލިބުނުއިރު ކުއްޖާގެ އެއްވެސް އިންފެކްޝަނެއް ނެތްކަން އެނގުނު ކަމަށް ކުއްޖާގެ މަންމަ ބުންޏެވެ. އޭނާގެ ދަރިފުޅާއި އެހެން ކުއްޖަކަށް ދޭންޖެހޭ ބޭހެއް ހޮސްޕިޓަލުން އޮޅުވާލީ ކަމަށް ބެލެވޭ ކަމަށް ކުއްޖާގެ މަންމަ ބުންޏެވެ.

އެކަމާ ގުޅޭގޮތުން އައިޖީއެމްއެޗްގެ ބަހެއް ހޯދުމަށް "ވަން" އިން ތަކުރާރުކޮށް މަސައްކަތްކުރި ނަމަވެސް، މިހާތަނަށް އެ ހޮސްޕިޓަލުގެ ބަހެއް ލިބިފައެއް ނުވެއެވެ.