ޚަބަރު

ރައީސްގެ މެމްބަރާއި ސީއެސްސީ އާއި މަޖިލިސް ރައީސް ނުހިމަނައި، ޖޭއެސްސީ އެކުލަވާލަން މަޖިލީހަށް

އިބްރާހިމް ޒަކީ

ޖުޑީޝަލް ސާވިސް ކޮމިޝަން (ޖޭއެސްސީ) އެކުލެވިގެންވާ ގޮތް އިސްލާހުކުރުމަށްޓަކައި ގާނޫނުއަސާސީއަށާއި ގާނޫނަށް ގެންނަންޖެހޭ އިސްލާހުތައް އެކުލެވޭ ބިލު ރައްޔިތުންގެ މަޖިލީހުގެ މިއަދުގެ ޖަލްސާއަށް އެޖެންޑާ ކޮށްފިއެވެ.

މިއީ ސަރުކާރުގެ ފަރާތުން، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް މަޖިލީހަށް ހުށަހަޅުއްވާ ބިލެކެވެ. މި ބިލުގެ ފުރަތަމަ ކިއުން މިއަދު ވަނީ އިއްވައިފައެވެ.

މި ބިލަކީ ރާއްޖޭގެ ޝަރުއީ ނިޒާމް އިސްލާހުކޮށް މިނިވަން ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެވަޑައިގެންފައިވާ ވައުދުފުޅުގެ ދަށުން މަޖިލީހަށް ފޮނުވި ބިލެކެވެ.

މި އިސްލާހުގައި ހުށަހަޅާފައި ވަނީ، މިހާރު ޖޭއެސްސީގައި ހިމެނޭ މެންބަރުންގެ އަދަދު ހަތަކަށް މަދުކޮށް، މިހާރު އޮންނަ ކޮމިޝަންގެ މެންބަރުންގެ ތެރެއިން، ރައްޔިތުންގެ މަޖިލީހުގެ ރައީސް އާއި ސިވިލް ސާވިސް ކޮމިޝަންގެ ރައީސްގެ އިތުރުން ރައީސުލްޖުމްހޫރިއްޔާ އައްޔަންކުރާ މެންބަރު ނުހިމަނައި ކޮމިޝަން އެކުލަވާލުމަށެވެ.

ގާނޫނުއަސާސީއަށް ހުށަހަޅާފައިވާ އިސްލާހުގައި ޖޭއެސްސީ އެތުރިފައިވާ ގޮތް:

ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބު ކުރާ އުއްތަމަ ފަނޑީޔާރު ފިޔަވައި އެހެން ފަނޑިޔާރެއް
ރާއްޖޭގައި ގާނޫނީ ވަކީލުކަން ކުރުމުގެ ހުއްދަ ލިބިފައިވާ ވަކީލުންގެ ތެރެއިން، އެބައި މީހުން އިންތިހާބު ކުރާ ގާނޫނީ ވަކީލެއް
ހައިކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބު ކުރާ ފަނޑިޔާރެއް
ދަށު ކޯޓުގެ ފަނޑިޔާރުންގެ ތެރެއިން އެ ކޯޓުތަކުން އިންތިހާބު ކުރާ ފަނޑިޔާރެއް
ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅާ މެންބަރެއް
އާއްމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހެއް
ބަންޑާރަނައިބު

ޖޭއެސްސީ މިހާރު އެކުލެވިފައިވާގޮތް:

ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބު ކުރާ އުއްތަމަ ފަނޑިޔާރު ފިޔަވައި އެހެން ފަނޑިޔާރެއް
ރާއްޖޭގައި ގާނޫނީ ވަކީލުކަން ކުރުމުގެ ހުއްދަ ލިބިފައިވާ ވަކީލުންގެ ތެރެއިން، އެބައި މީހުން އިންތިހާބު ކުރާ ގާނޫނީ ވަކީލެއް
ހައިކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބު ކުރާ ފަނޑިޔާރެއް
ދަށު ކޯޓުގެ ފަނޑިޔާރުންގެ ތެރެއިން އެ ކޯޓުތަކުން އިންތިހާބު ކުރާ ފަނޑިޔާރެއް
ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅާ މެންބަރެއް
އާއްމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހެއް
ރައީސުލްޖުމްހޫރިއްޔާ ކަނޑަައަޅުއްވާ މެމްބަރެއް
މަޖިލީހުން ކަނޑައަޅާ މެމްބަރެއް
ރައްޔިތުންގެ މަޖިލީހުގެ ރައީސް
ބަންޑާރަނާއިބު

ބިލުގައި ވާގޮތުން ކޮމިޝަނަށް އައްޔަން ކުރާ މީހަކު ނަމަ ކޮމިޝަންގައި އޭނާއަށް ހުރެވޭނީ ފަސް އަހަރުގެ އެއް ދައުރެވެ. އަދި ދައުރު ހަމަވުމުން، އެ މީހަކު އަލުން އެ ކޮމިޝަނަކަށް އައްޔަނެއް ނުކުރެވޭނެއެވެ. މަގާމުގެ ހައިސިއްޔަތުން ކޮމިޝަންގައި ހިމެނޭ ފަރާތަށް ކޮމިޝަންގެ މެންބަރުކަމުގައި ދެމި ހުރެވޭނީ އެ މަގާމުގައި އޭނާ ދެމި ހުރިހާ ދުވަހަކުއެވެ.

ބަންޑާރަ ނައިބު ފިޔަވައި، ކޮމިޝަން މެންބަރުކަމުގެ މަގާމުން އިސްތިއުފާ ދޭން ބޭނުންވެއްޖެނަމަ، ސިޓީއަކުން އެކަން ބަޔާންކޮށް ރައީސުލްޖުމްހޫރިއްޔާއަށް ހުށަހަޅައި، އެ ސިޓީ ރައީސުލްޖުމްހޫރިއްޔާއަށް ލިބުމުން، އެ މެންބަރަކު މެންބަރުކަމުން ވަކިވީއެވެ. ބަންޑާރަނައިބު މެންބަރުކަމުން ވަކިވާނީ، ބަންޑާރަނައިބު ކަމުން ވަކި ކުރުމުންނެވެ.