ސާފް ޗެމްޕިއަންޝިޕް ލައިވް: އިންޑިއާ 1-1 ކުވައިތު (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 1-1 ގެ ނަތީޖާއަކުން ދެ ޓީމު އެއްވަރުވެގެން.

'90+2 - އިންޑިއާ އަތުން ބައިކޮޅަށް ގޯލެއް ވަދެ، ނަތީޖާ ހަމަހަމަ. ކުވައިތުގެ އަބްދުﷲ އަބްލޫޝީ ފޮނުވާލި ހަމަލާއެއް، ޕެނަލްޓީ އޭރިއާ ތެރެއިން ދިފާއުކުރަން އުޅުމުގެ ތެރޭގައި ބައިކޮޅަށް ވަދެފައިވަނީ އިންޑިއާގެ އަންވަރު އަލީ ފައިގައި ޖެހިފައި.

ދެވަނަ ހާފުގެ އިތުރު ވަގުތުގެ ގޮތުގައި އަށް މިނެޓުގެ ކުޅުން ދައްކައިފި.

'90 - ހަމަނުޖެހުމާ ގުޅިގެން ކުވައިތުގެ ހަމަދް އަލް ގަލަފް އަދި އިންޑިއާގެ ރަހިމް އަލީއަށް ވެސް ރަތް ކާޑެއް ދައްކައިފި. އިންޑިއާގެ ރަހިމްއަކީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ކުޅުންތެރިއެއް.

'88 - މެޗު ހޫނުވެ، ހަމަނުޖެހުމަކަށް. ކުޅުންތެރިންގެ އިތުރުން ދެ ޓީމުގެ ބެންޗުން ވެސް ބަހުގެ ހަމަލާތަކެއް ރައްދުކުރި.

'85 - ކުވައިތުގެ ނުރައްކާތެރި ހަމަލާއެއް. ޕެނަލްޓީ އޭރިއާ ތެރެއިން ކުވައިތުގެ ޝަބައިބް އަލް ޚަލްދީ ފޮނުވާލި ބާރު ހަމަލާ، އިންޑިއާގެ ކީޕަރު އަންރިންދަރް ސިންހް ވަނީ ހުޝިޔާރުކަމާއެކު މަތަކޮށްފައި.

'84 - އިންޑިއާއަށް ރަނގަޅު ފުރުސަތެއް. އުދަންތާ ސިންހް ކުމާމް ނަގައިދިން ހުރަހަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، އިންޑިއާގެ ރޯހިތު ކުމާރު ފޮނުވާލި ހަމަލާ ދިޔައީ ކުވައިތުގެ ގޯލާ އަމާޒުނުވެ ބޭރަށް.

'80 - އަނެއްކާވެސް އިންޑިއާގެ ކޯޗު އިގޯ ސްޓިމަކްއަށް ރަތް ކާޑެއް. ފުރަތަމަ ރަތް ކާޑު ދައްކާފައިވަނީ ޕާކިސްތާނާ ދެކޮޅަށް ކުޅުނު މެޗުގައި. އޭގެ ފަހުން އެންމެ ފަހުން ނޭޕާލާ ދެކޮޅަށް ކުޅުނު މެޗުގައި އޭނާ ހުރީ ސަސްޕެންޝަންގައި.

މިރޭ މެޗަށް އިންޑިއާ ސަޕޯޓަރުން ވަދެފައިވަނީ ކުރީ މެޗުތަކަށްވުރެ މަދުން. މިރޭ ޖުމުލަ ދަނޑަށް ވަން ސަޕޯޓަރުންގެ އަދަދު އުޅެނީ 9000 ގެ ތެރޭގައި.

'77 - އިންޑިއާ ޑިފެންޑަރު ސަންދޭޝް ޖިންގަންގެ މޮޅު ޓެކަލްއެއް. ހުސްކޮށް ހުރެ ބޯޅަ ހިފައިގެން ކުވައިތުގެ ޝަބައިބް އަލް ޚަލްދީ، ޕެނަލްޓީ އޭރިއާ ތެރެއަށް ވަނުމާއެކު ސަންދޭޝް ވަނީ ޓެކަލްކޮށް ބޯޅަ ދިފާއުކޮށްފައި.

'70 - އިންޑިއާގެ އިތުރު ހަމަލާއެއް. ޖީކްސަން ދިން ބޯޅައަކުން ޕެނަލްޓީ އޭރިއާ ތެރެއިން އިންޑިއާގެ ސަހަލް ފޮނުވާލި ބާރު ހަމަލާ، ކުވައިތުގެ ޑިފެންޑަރު ހަސަން އަލަނޭޒީ ވަނީ ބްލޮކްކޮށްފައި.

'69 - އިންޑިއާގެ ހަމަލާއެއް. ކޯނަރަކުން ލިބުނު ބޯޅައަކުން ޕެނަލްޓީ އޭރިއާ ތެރޭ ޖީކްސަން ބޮލުން ފޮނުވާލި ހަމަލާ، ކުވައިތުގެ ގޯލާ އަމާޒުވެފައެއް ނުވޭ.

'66 - ސަހަލް އަބްދުލް ސަމަދަށް ކުރި ފައުލަކާ ގުޅިގެން ކުވައިތުގެ ސުލްތާން އަލެނޭޒީއަށް ރީނދޫ ކާޑެއް.

'63 - ޝަކުވާތަކަކަށްފަހު އިންޑިއާގެ ކޯޗު އިގޯ ސްޓިމަކްއަށް ރީނދޫ ކާޑެއް. މިއީ މިފަހަރުގެ މުބާރާތުގައި އޭނާއަށް ދެއްކި ދެވަނަ ކާޑު. ޕާކިސްތާނާ ދެކޮޅަށް ކުޅުނު އޭނާއަށް ދެއްކީ ރަތް ކާޑެއް، އެކަމާ ގުޅިގެން ނޭޕާލާ ދެކޮޅަށް ކުޅުނު މެޗުގައި ހުރީ ސަސްޕެންޝަންގައި.

'61 - އިންޑިއާ އިން ދެ ބަދަލެއް. އަނިރުދް ތާޕާ އާއި މުހައްމަދު ކުރުނިޔަންގެ ބަދަލުގައި ކުޅެން ނުކުތީ ރޯހިތު ކުމާރު އަދި ސަހަލް އަބްދުލް ސަމަދު.

'57 - ކުވައިތުގެ ނުރައްކަލެއް. ހިލޭ ޖެހުމަކުން ޝަބައިބް އަލް ޚަލްދީ ފޮނުވާލި ހަމަލާ، އިންޑިއާގެ ކީޕަރު އަމްރިންދަރު ސިންހް ވަނީ މަތަކޮށްފައި.

'56 - ކުވައިތުން ދެ ބަދަލެއް. ހަމަދް އަލް ހަރްބީ އާއި އަބްދުﷲ އަލް ފަރާދްގެ ބަދަލުގައި ކުޅެން ނުކުތީ އަބްދުﷲ އަލް ބްލޫޝީ އަދި ޚާލިދް ހާޖިއާ.

'53 - ކުވައިތުގެ ހަމަލާއެއް. ޕެނަލްޓީ އޭރިއާ ތެރޭ ހުއްޓައި ލިބުނު ބޯޅައަކުން އީދް އަލް ރާޝިދީ ފޮނުވާލި ހަމަލާ، އިންޑިއާގެ ޑިފެންޑަރުން ގައިގައި ޖެހި ކޯނަރަކަށް ވަނީ ބޭރުވެފައި.

'52 - ކުވައިތަށް ރަނގަޅު ފުރުސަތެއް. އީދް އަލް ރާޝިދީ ދިން ބޯޅަ، އިންޑިއާގެ ޕެނަލްޓީ އޭރިއާ ތެރެއިން ކުވައިތުގެ ޝަބައިބް އަލް ޚަލްދީއަށް ރަނގަޅަށް ކޮންޓްރޯލުކުރެވިފައެއް ނުވޭ.

'51 - އިންޑިއާ އިން ހަމަލާއެއް. ޕެނަލްޓީ އޭރިއާ ތެރެއިން ލިބުނު ބޯޅައަކުން އަރިމަތިން އިންޑިއާގެ މުހައްމަދު ކުރުނިޔަން ފޮނުވާލި ހަމަލާ، ކުވައިތުގެ ގޯލާ އަމާޒުވެފައެއް ނުވޭ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-0 ގެ ނަތީޖާއަކުން އިންޑިއާ ކުރީގައި އޮވެގެން.

މިއީ ސާފް ޗެމްޕިއަންޝިޕްގެ ތާރީހުގައި ސުނިލް ޗެތުރީ ޖެހި 23 ވަނަ ގޯލު. އެއާއެކު ރާއްޖޭގެ އަލީ އަޝްފާގު (ދަގަނޑޭ) ހަދާފައިވާ ގޯލު ޖެހުމުގެ ރެކޯޑާ ވަނީ އަރައި ހަމަކޮށްފައި. ދަގަނޑޭ ވެސް ވަނީ 23 ގޯލު ޖަހާފައި.

'45+2 - އިންޑިއާ އިން ގޯލެއް ޖަހައި ލީޑު ހޯދައިފި. އަނިރުދް ތާޕާ ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ، ވޮލީ ކިކްއަކުން އިންޑިއާއަށް އެ ގޯލު ކާމިޔާބުކޮށްދިނީ ކެޕްޓަން ސުނިލް ޗެތުރީ. ހިތްގައިމު ގޯލެއް.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'41 - އިންޑިއާގެ ނުރައްކަލެއް. ނިކިލް ޗަންދްރަޝޭކަރް ޕުޖާރީ އަރިމަތިން އަރައި ނަގައިދިން ހުރަސް، ޗެތުރީއަށް ރަނގަޅަށް ބޭނުމެއް ނުކުރެވުނު.

'34 - އިންޑިއާއަށް ފުރުސަތެއް. އަނިރުދް ތާޕާ ނަގައިދިން ކޯނަރުން ޕެނަލްޓީ އޭރިއާ ތެރޭ ހުރެ، އިންޑިއާގެ ޑިފެންޑަރު އަންވަރު އަލީ ބޮލުން ފޮނުވާލި ހަމަލާ، ކުވައިތުގެ ގޯލާ އަމާޒުވެފައެއް ނުވޭ.

'28 - އަނިރުދް ތާޕާ ނަގައިދިން ކޯނަރު، ޕެނަލްޓީ އޭރިއާ ތެރެއިން ނުރައްކާވުމުގެ ކުރިން ކުވައިތުގެ ކީޕަރު އަބްދުލް ރަހުމާން މަރްޒޫގު ކުރިއަށް ނުކުމެ ދިފާއުކޮށްފި.

'25 - ޝަބައިބް އަލް ޚަލްދީ ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ކުވައިތުގެ މުހައްމަދު އަބްދުﷲ، އިންޑިއާގެ ގޯލުގެ ތެރެއަށް ބޯޅަ ފޮނުވާލި ނަމަވެސް، ރެފްރީ ނިންމީ އޮފްސައިޑް ކަމަށް.

އިންޑިއާ އަދި ކުވައިތުގެ ފަރާތުން ވެސް ފެންނަނީ ވަރަށް ފިޒިކަލް ކުޅުމެއް.

'20 - ކުވައިތުގެ ހަމަލާއެއް. ޕެނަލްޓީ އޭރިއާ ބޭރުން ޝަބައިބް އަލް ޚަލްދީ ފޮނުވާލި ހަމަލާ ދިޔައީ އިންޑިއާ ގޯލުގެ ހުރަސް ދަނޑިމަތިން ބޭރަށް.

'17 - އިންޑިއާގެ ހަމަލާއެއް. ސުނިލް ޗެތުރީ އަތުން ބޯޅަ ގެއްލުމާއެކު ޕެނަލްޓީ އޭރިއާ ބޭރުން އިންޑިއާގެ މަހޭޝް ސިންހް ފޮނުވާލި ބާރު ހަމަލާ، ކުވައިތު ޑިފެންޑަރު ހަމަދް އަލް ހަރްބީ ވަނީ ބްލޮކްކޮށްފައި.

'14 - އިންޑިއާގެ ޑިފެންޑަރު ސަންދޭޝް ޖިންގަން ކުރި ނުރައްކާތެރި ފައުލަކާ ގުޅިގެން އޭނާއަށް ރީނދޫ ކާޑެއް.

'10 - އިންޑިއާއަށް ފުރުސަތެއް. މަހޭޝް ސިންހް ނަގައިދިން ކޯނަރެއްގެ ތެރެއިން ޕެނަލްޓީ އޭރިއާ ތެރޭ ހުއްޓައި ލިބުނު ބޯޅައިން އަންވަރު އަލީ ފޮނުވާލި ހަމަލާގައި ބާރެއް ނެތް، އެ ބޯޅަ ކުވައިތުގެ ޑިފެންޑަރުން ވަނީ ދިފާއުކޮށްފައި.

'6 - އިންޑިއާއަށް ފުރުސަތެއް. އާކާޝް މިޝްރާ ނަގައިދިން ހުރަސް، ޕެނަލްޓީ އޭރިއާ ތެރޭ ހުރި އިންޑިއާ ކެޕްޓަން ސުނިލް ޗެތުރީއަށް ލިބޭ ގޮތެއް ނުވި.

'4 - ކުވައިތުގެ ހަމަލާއެއް. އީދް އަލް ރާޝިދީ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، ކުވައިތުގެ މުހައްމަދު އަބްދުﷲ އެއް ފަހަރުން ފޮނުވާލި ހަމަލާ، އިންޑިއާގެ ގޯލާ އަމާޒުވެފައެއް ނުވޭ.

މެޗުގެ ކުޅުން ފަށައިފި. ކިކްއޯފް ކުރީ އިންޑިއާ އިން.

މި މެޗުގައި އިންޑިއާގެ ބެންޗުން ކޯޗު އިގޯ ސްޓިމަކް ފެނިގެންދޭ. އޭނާއަށް ޕާކިސްތާން މެޗުގައި ދެއްކި ރަތް ކާޑާ ގުޅިގެން ނޭޕާލާ ދެކޮޅަށް ކުޅުނު މެޗުގައި ހުރީ ސަސްޕެންޝަންގައި.

ކުވައިތުގެ ފުރަތަަމަ 11:

އިންޑިއާގެ ފުރަތަމަ 11: