ސާފް ޗެމްޕިއަންޝިޕް ލައިވް: ބޫޓާން 1-4 ލުބުނާން (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 4-1 ގެ ނަތީޖާއަކުން ލުބުނާން ކުރީގައި އޮވެގެން.

ދެވަނަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'89 - ލުބުނާނަށް ހުސް ފުރުސަތެއް. އަލީ މާކަބަވީ ދިން ރީތި ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ، ލުބުނާންގެ ކެޕްޓަން ހަސަން މާތޫކް ފޮނުވާލި ހަމަލާ ދިޔައީ ބޫޓާން ގޯލުގެ އަރިމަތީ ދަނޑިކައިރިން ބޭރަށް.

'86 - ލުބުނާނުން ދެ ބަދަލެއް. މުހައްމަދު ސަޑެކް އާއި ހުސައިން ޒެއިންގެ ބަދަލުގައި ކުޅެން ނުކުތީ ކެޕްޓަން ހަސަން މާތޫކް އަދި ވާލިދް ޝޫރް.

'81 - ބޫޓާންގެ ހަމަލާއެއް. ޕެނަލްޓީ އޭރިއާ ބޭރުން ފުބް ތިންލޭ ފޮނުވާލި ހަމަލާ ދިޔައީ ލުބުނާން ގޯލުގެ އަރިމަތީ ދަނޑިކައިރިން ބޭރަށް.

'79 - ބޫޓާނުން އެޓީމުގެ ފުރަތަމަ ގޯލު ޖަހައިފި. ޑޯޖީ ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ބޫޓާނަށް އެ ގޯލު ކާމިޔާބުކޮށްދިނީ ކެޕްޓަން ޗެންޗޯ ޔެލްޓްޝެން. މިއީ މި މުބާރާތުގައި ބޫޓާނުން ޖެހި ފުރަތަމަ ގޯލު.

'77 - ލުބުނާނުން ބަދަލެއް. އަލީ އަލް ހާޖްގެ ބަދަލުގައި ކުޅެން ނުކުތީ އަލީ ޝައިތޫ.

'73 - ލުބުނާންގެ ޚަލީލް ބަދަރް ނަގައިދިން ހުރަސް، ބޫޓާންގެ ޕެނަލްޓީ އޭރިއާ ތެރޭ ހުރި އަލީ މާކާބާވީއަށް ނުލިބި ބޭރަށް.

'70 - ލުބުނާންގެ ހަސަން ކޫރާނީ ފޮނުވާލި ހިލޭ ޖެހުން ބޫޓާންގެ ގޯލާ އަމާޒެއް ނުވި.

'56 - ލުބުނާންގެ ކެޕްޓަން މުހައްމަދު އަލީ ދައިނީއަށް ރީނދޫ ކާޑެއް.

'55 - ބޫޓާންގެ ތަރި ޗެންޗޯ ފޮނުވާލި ޕެނަލްޓީ، ލުބުނާންގެ ގޯލާ އަމާޒެއް ނުވި.

'54 - ޕެނަލްޓީ އޭރިއާ ތެރެއިން ބޫޓާން ކެޕްޓަން ޗެންޗޯއަށް ލުބުނާންގެ ކެޕްޓަން މުހައްމަދު އަލީ ދައިނީ ކުރި ފައުލަކާ ގުޅިގެން ބޫޓާނަށް ޕެނަލްޓީއެއް.

'53 - ލުބުނާންގެ ކީޕަރު އެންޓޮއިން ނަޔާ އަލްދޫހީގެ މޮޅު ދެ ސޭވްއެއް. ޕެނަލްޓީ އޭރިއާ ބޭރުން ބޫޓާންގެ ކިންގާ ވަންގްޗުކް ފޮނުވާލި ހަމަލާ ލުބުނާން ކީޕަރު އަލްދޫހީ މަތަކުރުމާއެކު ލިބުނު ރީބައުންސް ބޯޅައިން ބޫޓާން ކެޕްޓަން ޗެންޗޯ ފޮނުވާލި ހަމަލާ ވެސް ކީޕަރު އަލްދޫހީ ވަނީ މަތަކޮށްފައި.

މިހާރު ބޫޓާންގެ ކެޕްޓަން ބޭންޑު އަޅައިގެން ކުޅެނީ ޗެންޗޯ ޔެލްޓްޝެން.

ބޫޓާނުން ދެވަނަ ހާފަށް ނުކުތީ ދެ ބަދަލަކާއެކު. ކެޕްޓަން ކަރްމާ ޝެޑްރުޕް ޝެރިންގް އާއި ދަވާ ޝެރިންގްގެ ބަދަލުގައި ކުޅެން ނުކުތީ ފުންޓްޝޯ ޖިގްމޭ އަދި ފުބް ތިންލޭ.

ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 4-0 ގެ ނަތީޖާއަކުން ލުބުނާން ކުރީގައި އޮވެގެން.

'45+2 - ބޫޓާންގެ ނުރައްކާތެރި ހަމަލާއެއް. ނިމާ ވަންގްޑީ ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، ބޫޓާންގެ ޓެންޒިން ނޯބޫ ބޮލުން ފޮނުވާލި ހަމަލާ، ލުބުނާންގެ ކީޕަރު އެންޓޮއިން ނަޔާ އަލްދޫހީ ވަނީ މަތަކޮށްފައި.

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

'43 - ލުބުނާނުން އެޓީމުގެ ހަތަރުވަނަ ގޯލު ޖަހައިފި. ޚަލީލް ބަދަރް ފޮނުވާލި ހަމަލާއެއް ބޮލްކުވުމާއެކު ލިބުނު ރީބައުންސް ބޯޅައިން ފޮނުވާލި ހަމަލާއަކުން ލުބުނާނަށް އެ ގޯލު ކާމިޔާބުކޮށްދިނީ މަހްދީ ޒެއިން.

'35 - ލުބުނާނުން ތިން ގޯލުގެ ލީޑެއް ހޯދައިފި. ބޫޓާންގެ ޑިފެންޑަރުންނަށް ކޯނަރެއް ރަނގަޅަށް ދިފާއުނުކުރެވުމާއެކު ޕެނަލްޓީ އޭރިއާ ތެރެއިން ލިބުނު ބޯޅައަކުން ލުބުނާނަށް އެ ގޯލު ކާމިޔާބުކޮށްދިނީ ޙަލީލް ބަދަރް. އޭނާއަށް ޕެނަލްޓީ އޭރިއާ ތެރެއިން ބޯޅަ ލިބުނު އިރު، ހުރީ ވަރަށް ހުސްކޮށް.

'31 - ބޫޓާންގެ ފުރަތަމަ ހަމަލާ، ޕެނަލްޓީ އޭރިއާ ބޭރުން ޗެންޗޯ ޔެލްޓްޝެން ފޮނުވާލި އެ ހަމަލާ ލިބުނާންގެ ކީޕަރު އެންޓޮއިން ނަޔާ އަލްދޫހީ ވަނީ މަތަކޮށްފައި.

ލުބުނާން މުޅިން ވެސް ފެންނަނީ އެޓޭކުގައި، އެޓީމުގެ ޑިފެންޑަރުންނާއެކު ގިނަ ކުޅުންތެރިންތަކެއް އެޓޭކުގައި ބައިވެރިވޭ.

'23 - ލުބުނާނުން އިތުރު ގޯލެއް ޖަހައި ލީޑު ފުޅާކޮށްފި. ޕެނަލްޓީ އޭރިއާ ތެރެއިން ވަރަށް ފަސޭހަކަމާއެކު ބޫޓާންގެ ތިން ކުޅުންތެރިއެއް ކައިރިން ނައްޓާލުމަށްފަހު ފޮނުވާލި ހަމަލާއަކުން ލުބުނާނަށް އެ ގޯލު ކާމިޔާބުކޮށްދިނީ އަލީ އަލް ހާޖް.

'17 - ލުބުނާންގެ ހަމަލާއެއް. ޕެނަލްޓީ އޭރިއާ ބޭރުން ލުބުނާންގެ ޚަލީލް ބަދަރް ފޮނުވާލި ބާރު ހަމަލާ، ބޫޓާންގެ ކީޕަރު ޝެރިން ޑެންޑުޕް ވަނީ މަތަކޮށްފައި.

މި މެޗުގައި ވެސް ލުބުނާންގެ ކެޕްޓަން އަދި އެޓީމުގެ ރެކޯޑު ގޯލު ޖެހުންތެރިޔާ ހަސަން މާތޫކް ފެށީ ބެންޗުން. ބަންގުލަދޭޝް މެޗުގައި ވެސް އޭނާ ފެނުނީ ބަދަލު ކުޅުންތެރިއެއްގެ ގޮތުގައި.

މެޗު ކުރިއަށްދާ އިރު، ދަނޑަށް މިހާރު ދަނީ ބޯކޮށް ވާރޭ ވެހެމުން.

'11 - ލުބުނާނުން ގޯލެއް ޖަހައި ލީޑު ހޯދައިފި. އަލީ އަލް ހާޖް ފޮނުވާލި ހަމަލާއެއް ބޫޓާންގެ ކީޕަރު ޝެރިން ޑެންޑުޕް މަތަކުރުމާއެކު ލިބުނު ރީބައުންސް ބޯޅައަކުން ލުބުނާނަށް އެ ގޯލު ކާމިޔާބުކޮށްދިނީ މުހައްމަދު ސަޑެކް. އޭނާ އެ ގޯލު ކާމިޔާބުކުރީ ވަރަށް ހުސްކޮށް ހުރެ ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން.

މި މެޗުގެ ފުރަތަމަ 11 ގައި ބޫޓާންގެ ތަރި ޗެންޗޯ ޔެލްޓްޝެން ހިމެނޭ. ރާއްޖެއާ ދެކޮޅަށް ކުޅުނު މެޗުގައި އޭނާ ފެނިގެންދިޔައީ ބަދަލު ކުޅުންތެރިއެއްގެ ގޮތުގައި.

'3 - ލުބުނާންގެ ހަމަލާއެއް. ޕެނަލްޓީ އޭރިއާ އަރިމަތިން ލުބުނާންގެ ޚަލީލް ބަދަރް ފޮނުވާލި ހަމަލާ ދިޔައީ ބޫޓާން ގޯލުގެ ހުރަސް ދަނޑިމަތިން ބޭރަށް.

މެޗުގެ ކުޅުން ފަށައިފި. ކިކްއޯފް ކުރީ ލުބުނާނުން.

ލުބުނާންގެ ފުރަތަމަ 11:

ބޫޓާންގެ ފުރަތަަމަ 11: