ސާފް ޗެމްޕިއަންޝިޕް ލައިވް: ރާއްޖެ 1-3 ބަންގްލަދޭޝް (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 3-1 ގެ ނަތީޖާއަކުން ރާއްޖެ ބަލިވެގެން. އެ ނަތީޖާއާއެކު ސެމީ ފައިނަލަށް ދަތުރުކުރުމަށް ރާއްޖެއަށް ވަނީ އުނދަގޫތަކަކާ ކުރިމަތިވެފައި.

'90+5 - ސަމުއްޓޭ ކުރި ފައުލަކާ ގުޅިގެން އޭނާއަށް ރީނދޫ ކާޑެއް.

'90+1 - ރާއްޖޭގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން ހަމްޕު ފޮނުވާލި ބާރު ހަމަލާ އަމާޒުވީ ބަންގުލަދޭޝް ގޯލުގެ އަރިމަތީ ދަނޑިއަށް.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'90 - ބަންގުލަދޭޝް އިން އިތުރު ގޯލެއް ޖަހައި ލީޑު ފުޅާކޮށްފި. ކައުންޓާ އެޓޭކެއްގައި ކުރިއަށް ގޮސް، ބިޝްވަނާންތު ގޯޝް ދިން ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން ބަންގުލަދޭޝްއަށް އެ ގޯލު ކާމިޔާބުކޮށްދިނީ ޝެއިޚް މޯސަލިން.

'86 - ރާއްޖޭގެ ހަމަލާއެއް. ޕެނަލްޓީ އޭރިއާ ތެރޭ ހުރެ ހަމްޕު ބޮލުން ފޮނުވާލި ހަމަލާ އަމާޒުވީ ބަންގުލަދޭޝް ކީޕަރު އަނީސުރް ރަހުމާންގެ އަތަށް، އެ ބޯޅައިގައި ބާރެއް ނެތް.

'83 - މެޗު ލަސްކުރުމަށް މަސައްކަތްކުރުމުން ބަންގުލަދޭޝްގެ އެމްޑީ އީސާ ފައިސަލަށް ރީނދޫ ކާޑެއް ދައްކައިފި.

ރާއްޖެއިން ބަދަލެއް. ސެންޓޭގެ ބަދަލުގައި ކުޅެން ނުކުތީ އިބްރާހިމް ވަހީދު ހަސަން (އިއްބެ).

'70 - ކޯނަރެއްގެ ތެރެއިން އަނެއްކާވެސް ބަންގުލަދޭޝްގެ ނުރައްކަލެއް. ކޯނަރު ދިފާއުކުރުމާއެކު ޕެނަލްޓީ އޭރިއާ ބޭރުން ލިބުނު ބޯޅައަކުން ބަންގުލަދޭޝްގެ ޝެއިޚް މޯސަލިން ފޮނުވާލި ހަމަލާ، ރާއްޖޭގެ ކީޕަރު ހުސައިން ޝަރީފް ވަނީ ހުޝިޔާރުކަމާއެކު މަތަކޮށްފައި.

'67 - ބަންގުލަދޭޝް އިން ގޯލެއް ޖަހައި ލީޑު ހޯދައިފި. ބަންގުލަދޭޝްގެ ކޯނަރެއް ރާއްޖެއަށް ރަނގަޅަށް ދިފާއުނުކުރެވުމާއެކު ޕެނަލްޓީ އޭރިއާ ތެރެއިން ލިބުނު ބޯޅައަކުން ބަންގުލަދޭޝްއަށް އެ ގޯލު ކާމިޔާބުކޮށްދިނީ ތާރިގު ރައިހާން ކާޒީ. އޭނާގެ ފުރަތަމަ ހަމަލާ، ގޯލު ލައިން މަތިން ނިހާޓު ދިފާއުކުރި ނަމަވެސް، ރީބައުންސް ބޯޅަ ވަނީ ރާއްޖޭގެ ގޯލުގެ ތެރެއަށް ފޮނުވާލާފައި. އޭރު ރާއްޖޭގެ ކީޕަރު ހުސައިން ހުރީ ކޯނަރުން ނެގި ބޯޅަ ދިފާއުކުރުމަށް ކުރިއަށް ނުކުމެ.

'66 - ބަންގުލަދޭޝްގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން ޝެއިޚް މޯސަލިން ފޮނުވާލި ހަމަލާ ދިޔައީ ރާއްޖޭގެ ޑިފެންޑަރުން ގައިގައި ޖެހި ގޯލުގެ އަރިމަތީ ދަނޑިކައިރިން ބޭރަށް.

'63 - ބަންގުލަދޭޝް އިން ދެ ބަދަލެއް. ކެޕްޓަން ޖަމާލް ބުޔާން އާއި ސޮހެލް ރަނާގެ ބަދަލުގައި ކުޅެން ނުކުތީ ޝެއިޚް މޯސަލިން އަދި އެމްޑީ މޮޖީބޮރް ރަހުމާން ޖޮނީ.

ރާއްޖެއިން ފެންނަނީ އެޓޭކުގައި ބޯޅަ ހިފެހެއްޓުމަށް އުނދަގޫތަކަކާ ކުރިމަތިލާން ޖެހޭތަން. ނަމަވެސް ދެ ޓީމުގެ ފަރާތުން ފެންނަނީ ދާދި ހަމަހަމަ ކުޅުމެއް.

'56 - ރާއްޖޭގެ ހަމަލާއެއް. އިބްރާހިމް އައިސަމް ދިން ބޯޅައަކުން ޕެނަލްޓީ އޭރިއާ ބޭރުން ސެންޓޭ ފޮނުވާލި ހަމަލާ، ބަންގުލަދޭޝްގެ ކުޅުންތެރިއެއް ގައިގައި ޖެހި ވަނީ ކޯނަރަކަށް ބޭރުވެފައި. ކޯނަރުގެ ބޭނުން ރާއްޖެއަށް ހިފިފައެއް ނުވޭ.

'52 - ބަންގުލަދޭޝްގެ ނުރައްކާތެރި ކައުންޓާ އެޓޭކެއް. އެމްޑީ ފައިސަލް އަހުމަދު ފަހީމް ކުރިއަށް ޖެހި، ދިން ބޯޅަ ޕެނަލްޓީ އޭރިއާ ތެރެއިން ބަންގުލަދޭޝްގެ ކުޅުންތެރިޔަކަށް ލިބުމުގެ ކުރިން ރާއްޖޭގެ ޑިފެންސުން ވަނީ އެ ބޯޅަ ދިފާއުކޮށްފައި.

ރާއްޖެއިން ދެވަނަ ހާފު ފެށީ ބަދަލަކާއެކު. ހަސަން ނާއިޒް (ދާދު)ގެ ބަދަލުގައި ކުޅެން ނުކުމެފައިވަނީ އިބްރާހިމް މަހުދީ ހުސައިން (ފޭދޫ އިއްބެ).

'46 - ބަންގުލަދޭޝްއަށް ރަނގަޅު ފުރުސަތެއް. ޖަމާލް ބުޔާން ނަގައިދިން ކޯނަރުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، ބަންގުލަދޭޝްގެ ބިޝްވަނާތު ގޯޝް ބޮލުން ފޮނުވާލި ހަމަލާ ދިޔައީ ރާއްޖޭގެ ގޯލުގެ ހުރަސް ދަނޑިމަތިން ބޭރަށް.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 1-1 ގެ ނަތީޖާއަކުން ދެ ޓީމު އެއްވަރުވެގެން.

'45+3 - ބަންގުލަދޭޝްގެ ހަމަލާއެއް. ބިޝްވަނާތު ގޯޝް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބަންގުލަދޭޝްގެ އެމްޑީ ފައިސަލް އަހުމަދު ފަހީމް ބޮލުން ފޮނުވާލި ހަމަލާ ދިޔައީ ރާއްޖޭގެ ގޯލުގެ ހުރަސް ދަނޑިމަތިން ބޭރަށް.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'42 - ބަންގުލަދޭޝް އިން ގޯލެއް ޖަހައި ނަތީޖާ ހަމަހަމަކޮށްފި. ބަންގުލަދޭޝަށް އެ ގޯލު ކާމިޔާބުކޮށްދިނީ ރާކިބް ހުސައިން. އޭނާ އެ ގޯލު ކާމިޔާބުކުރީ ސޮހެލް ރަނާ ނަގައިދިން ހުރަސް، ބަންގުލަދޭޝް ޑިފެންޑަރު ޓޮޕޫ ބަރްމަން ބޮލުން ޖައްސާލުމާއެކު ރާއްޖޭގެ ޕެނަލްޓީ އޭރިއާ ތެރޭ ހުރެ ވަރަށް ހުސްކޮށް ހުރެ ބޮލުން ފޮނުވާލި ހަމަލާއަކުން.

'39 - ނާއިޒް ހަސަން (ދާދު) އަރިމަތިން ކުރިއަށް ޖެހި ބަންގްލަދޭޝް އޭރިއާ ތެރެއަށް ނުރައްކާ ކުރަން މަސައްކަތް ކުރި ބޯޅަ އެޓީމުގެ ޑިފެންޑަރު ބޭރުކޮށްލައިފި.

'37 - ބަންގްލަދޭޝްއިން ރާއްޖޭގެ އޭރިއާ ތެރެއަށް ހުރަސްކުރަން މަސައްކަތް ކުރި ބޯޅަ، ހައިޝަމް ބޮލުން ދިފާއުކޮށް ބޭރުކޮށްލައިފި.

'34 - ބަންގުލަދޭޝްގެ އިތުރު ހަމަލާއެއް. ޖަމާލް ބުޔާން ދިން ބޯޅައަކުން ޕެނަލްޓީ އޭރިއާ ބޭރުން އެމްޑީ ފައިސަލް އަހުމަދު ފަހީމް ފޮނުވާލި ހަމަލާ އަމާޒުވީ ރާއްޖޭގެ ކީޕަރު ހުސައިން ޝަރީފްއާ ދިމާއަށް.

'33 - ކޯނަރެއްގެ ތެރެއިން ބަންގުލަދޭޝްގެ ނުރައްކަލެއް. ސޮހަލް ރަނާ ނަގައިދިން ކޯނަރުން ޕެނަލްޓީ އޭރިއާ ތެރޭ ހުރެ ޓޮޕޫ ބަރްމަން ބޮލުން ފޮނުވާލި ހަމަލާ، ގޯލު ލައިން މަތީ ހުރި ރާއްޖޭގެ ހުސައިން ނިހާން (ނިހާޓް) ވަނީ ދިފާއުކޮށްފައި. ނިހާޓް ދިފާއުކުރަން ފޮނުވާލި ބޯޅަ، އަހުމަދު ނޫމާން (ހެލްމެޓް) ގައިގައި ޖެހި ގޯލާ އަމާޒުވާން ދަނިކޮށް، އެ ބޯޅަ ހުޝިޔާރުކަމާއެކު ރާއްޖޭގެ ކީޕަރު ހުސައިން ޝަރީފް ވަނީ މަތަކޮށްފައި. ހެލްމެޓްގެ އަތުގައި ޖެހިފައިވާ ކަމަށްބުނެ، ބަންގުލަދޭޝްގެ ކުޅުންތެރިން ޕެނަލްޓީއަކަށް ވެސް އެޕީލް ކުރި.

ގޯލަށްފަހު ރާއްޖެއިން ކުޅެމުންދަނީ ވަރަށް ބޮޑަށް ފަހަތަށް ވިސްނައިގެން. ބަންގުލަދޭޝް އިން ދަނީ އެޓޭކު ކުރުމަށް މަސައްކަތްތަކެއް ކުރަމުން. ނަމަވެސް ބަންގުލަދޭޝްއަށް އަދި ރަނގަޅު ފުރުސަތެއް ތަނަވަސްކުރެވިފައެއް ނުވޭ.

'26 - ރާއްޖޭގެ ހުސައިން ނިހާން (ނިހާޓް) އަށް ކުރި ފައުލަކާ ގުޅިގެން ބަންގުލަދޭޝްގެ ސޮހެލް ރަނާއަށް ރީނދޫ ކާޑެއް.

ރާއްޖެއިން ގޯލު ޖަހާފައިމިވަނީ ބަންގުލަދޭޝްގެ ގޯލާ އަމާޒުކޮށް ފޮނުވާލި ފުރަތަަމަ ހަމަލާއިން.

'17 - ރާއްޖެއިން ގޯލު ޖަހައި ލީޑު ހޯދައިފި. އަލީ ފާސިރު (ސެންޓޭ) ދިން ބޯޅައަކުން ރާއްޖެއަށް އެ ގޯލު ކާމިޔާބުކޮށްދިނީ ބޫޓާން މެޗުގައި ވެސް ރާއްޖޭގެ ފުރަތަމަ ގޯލު ޖަހައިދިން ހަމްޒާ މުހައްމަދު (ހަމްޕު). ޕެނަލްޓީ އޭރިއާ ބޭރުން ހަމްޕު ފޮނުވާލި ހަމަލާ އަމާޒުވީ ބަންގުލަދޭޝް ގޯލުގެ ތިރީ ކަނަކަށް، ހިތްގައިމު ގޯލެއް.

މެޗުގެ ފުރަތަަމަ 15 މިނެޓުގެ ކުޅުން ނިމުނު އިރު، ދެ ޓީމުގެ ފަރާތުން ވެސް ފެނިގެންދިޔައީ ދާދި ހަމަހަމަ ކުޅުމެއް. ނަމަވެސް ގޯލާ އަމާޒުކޮށް ހަމަލާއެއް ފޮނުވާލެވިފައިވަނީ ބަންގުލަދޭޝަށް. ރާއްޖެއަށް އަދި ބަންގުލަދޭޝްގެ ގޯލާ އަމާޒުކޮށް ހަމަލާއެއް ފޮނުވާލެވިފައެއް ނުވޭ. ރާއްޖެއިން ބޮޑަށް މަސައްކަތްކުރަމުންދަނީ ކައުންޓާ އެޓޭކުތަކުގައި ނުރައްކާކުރުމަށް.

'11 - ބަންގުލަދޭޝްގެ ނުރައްކަލެއް. ޖަމާލް ބުޔާން ނަގައިދިން ކޯނަރުން ޕެނަލްޓީ އޭރިއާ ތެރޭ ހުރެ އެމްޑީ ސޮހެލް ރަނާ ބޮލުން ފޮނުވާލި ހަމަލާ، ރާއްޖޭގެ ކީޕަރު ހުސައިން ޝަރީފް ވަނީ މަތަކޮށްފައި.

'8 - ކުރިއަށް ޖެހި ހައިޝަމް ހަސަން (ބިޑި)، ބަންގުލަދޭޝްގެ ޕެނަލްޓީ އޭރިއާ ތެރެއިން ރާއްޖޭގެ ކުޅުންތެރިޔަކަށް ދޭން މަސައްކަތްކުރި ބޯޅަ، ބަންގުލަދޭޝްގެ ޑިފެންޑަރުން ދިފާއުކޮށްފި.

'7 - އެމްޑީ ސޮހެލް ރަނާ ދިން ބޯޅަ ރާއްޖޭގެ ޕެނަލްޓީ އޭރިއާ ތެރެއިން ރާކިބް ހުސައިނަށް ލިބޭ ގޮތެއް ނުވި.

'5 - ރާއްޖޭގެ ފުރަތަަމަ ކޯނަރު ނަގައިދިނީ ހަމްޕު، ނަމަވެސް ހަމްޕު ނަގައިދިން ކޯނަރުގައި ނުރައްކަލެއް ނެތް.

'4 - ރާއްޖޭގެ ހަމަލާއެއް. ހަމްޒާ މުހައްމަދު (ހަމްޕު) ދިން ބޯޅައަކުން ޕެނަލްޓީ އޭރިއާ ބޭރުން އިބްރާހިމް އައިސަމް ފޮނުވާލި ހަމަލާ، ބަންގުލަދޭޝްގެ އެމްޑީ ރޯއީ ވަނީ ބްލޮކްކޮށްފައި.

'2 - މެޗުގެ ފުރަތަމަ ކޯނަރު ބަންގުލަދޭޝްއަށް. ކެޕްޓަން ޖަމާލް ބުޔަން ނަގައިދިން ކޯނަރު، ޕެނަލްޓީ އޭރިއާ ތެރެއިން ދިފާއުކުރީ ރާއްޖޭގެ ހަސަން ނާއިޒް (ދާދު).

މި މެޗު ރާއްޖެއިން ކުޅެނީ ނޫ ކުލައިގެ އަވޭ ޖާޒީގައި. އަދި ބަންގުލަދޭޝް އިން ކުޅެނީ އެޓީމުގެ ރަސްމީ ފެހި ކުލައިގެ ޖާޒީގައި.

މެޗުގެ ކުޅުން ފަށައިފި. ކިކްއޯފް ކުރީ ރާއްޖެއިން.

ބަންގުލަދޭޝް އިން ވެސް މި މެޗަށް ނުކުންނަނީ ދެ ބަދަލަކާއެކު. ލުބުނާނާ ދެކޮޅަށް ކުޅުނު މެޗުގައި ބަންގުލަދޭޝްގެ ފުރަތަމަ 11 އިން ފެނުނު އެމްޑީ ސުމަން ރެޒާ އާއި އެމްޑީ މޮޖިބޯރް ރަހުމާން ޖޮނީ މިއަދުގެ މެޗު ފެށީ ބެންޗުން. އެ ދެ ކުޅުންތެރިންގެ ބަދަލުގައި މި މެޗުގެ ފުރަތަމަ 11 އިން ފުރުސަތު ދީފައިވަނީ އެމްޑީ ރިޑޯއީ އާއި ރާކިބް ހުސައިނަށް.

ރާއްޖެ އިން މި މެޗަށް ނުކުންނަނީ ދެ ބަދަލަކާއެކު. ބޫޓާނާ ދެކޮޅަށް ކުޅުނު މެޗުގެ ފުރަތަމަ 11 އިން ފެނުނު އިބްރާހިމް މަހުދީ ހުސައިން (ފޭދޫ އިއްބެ) އާއި އިބްރާހިމް ވަހީދު ހަސަން (އިއްބެ) މިއަދުގެ މެޗު ފަށަނީ ބެންޗުން. އެ ދެ ކުޅުންތެރިންގެ ބަދަލުގައި މި މެޗުގެ ފުރަތަމަ 11 ގައި ހިމަނާފައިވަނީ އަލީ ފާސިރު (ސެންޓޭ) އާއި ނާއިޒް ހަސަން (ދާދު). އޭގެ ތެރެއިން ދާދު އަކީ ބޫޓާން މެޗުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުމެ ގޯލު ޖަހާފައިވާ ކުޅުންތެރިއެއް.

ރާއްޖޭގެ ބަދަލު ކުޅުންތެރިން:

ރާއްޖޭގެ ފުރަތަމަ 11:

ބަންގުލަދޭޝްގެ ފުރަތަމަ 11: