ސާފް ޗެމްޕިއަންޝިޕް ލައިވް: އިންޑިއާ 2-0 ނޭޕާލް (ފުލްޓައިމް)

މެޗުގެ އުސްއަލިތައް:

އިންޑިއާ އާއި ކުވައިތަށް ވަނީ "ގްރޫޕު އޭ"ގެ ސެމީ ފައިނަލުގެ ޖާގަތައް ލިބިފައި. ނޭޕާލާއި ޕާކިސްތާނަށް ވަނީ މުބާރާތާ އަލްވަދާއު ކިޔަން ޖެހިފައި. ނަމަވެސް ގްރޫޕުގެ ފަހު މެޗުތައް އަދި ކުރިއަށް އޮންނާނެ.

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-0 ގެ ނަތީޖާއަކުން އިންޑިއާ ކުރީގައި އޮވެގެން.

ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

މެޗުގައި ނޭޕާލުން ރަނގަޅު އެޓޭކިން ކުޅުމެއް ދައްކަމުންދިޔަ ނަމަވެސް، އެޓީމަށް ކުރިމަތިވާ އުނދަގުލަކީ ލިބޭ ފުރުސަތުތައް އެންމެ އެދެވޭ ގޮތުގައި ބޭނުން ނުހިފުން.

މިފަހަރުގެ މުބާރާތުގައި އިންޑިއާގެ ކެޕްޓަން ސުނިލް ޗެތުރީ ވަނީ މިހާތަނަށް ހަތަރު ގޯލު ޖަހާފައި. އޭގެ ތެރެއިން ތިން ގޯލު ޖަހާފައިވަނީ ޕާކިސްތާނާ ދެކޮޅަށް ކުޅުނު މެޗުގައި.

'75 - އިންޑިއާއަށް އިތުރު ފުރުސަތެއް. ސަހަލް އަބްދުލް ސަމަދު ދިން ބޯޅައަކުން ޕެނަލްޓީ އޭރިއާގެ އަރިމަތިން އިންޑިއާގެ ލާލިއަންޒުއާލާ ޗާންގްޓޭ ފޮނުވާލި ހަމަލާ، ނޭޕާލްގެ ކީޕަރު ކިރަން ކުމާރު ލިމްބޫ ވަނީ މަތަކޮށްފައި.

'70 - އިންޑިއާ އިން އިތުރު ގޯލެއް ޖަހައިފި. ޕެނަލްޓީ އޭރިއާ ތެރެއިން ޗެތުރީ ފޮނުވާލި ހަމަލާއެއް ނޭޕާލްގެ ކީޕަރު ކިރަން ކުމާރް ލިމްބޫ އަތުގައި ޖެހި އަމާޒުވެފައިވަނީ ގޯލުގެ ހުރަސް ދަނޑިއަށް. އެ ބޯޅަ ދަނޑީގައި ޖެހި ނުކުތުމާއެކު އިންޑިއާއަށް ގޯލު ކާމިޔާބުކޮށްދިނީ މަހޭޝް ސިންގް ނައޮރޭމް.

މިއީ ސާފް ޗެމްޕިއަންޝިޕްގެ ތާރީހުގައި ޗެތުރީ ޖެހި 22 ވަނަ ގޯލު. ސާފް ޗެމްޕިއަންޝިޕްގައި އެންމެ ގިނަ ގޯލު ޖެހި ރާއްޖޭގެ އަލީ އަޝްފާގު (ދަގަނޑޭ)ގެ ރެކޯޑާ އަރައި ހަމަކުރަން ދެން ޗެތުރީއަށް ބޭނުންވާނީ އެންމެ ގޯލެއް. ދަގަނޑޭ ވަނީ 23 ގޯލު ޖަހާފައި.

'62 - އިންޑިއާ އިން ގޯލެއް ޖަހައި ލީޑު ހޯދައިފި. މަހޭޝް ސިންހް ނައޮރޭހް ދިން ބޯޅައަކުން އިންޑިއާއަށް އެ ގޯލު ކާމިޔާބުކޮށްދިނީ އެޓީމުގެ ކެޕްޓަން ސުނިލް ޗެތުރީ. އޭނާ އެ ގޯލު ކާމިޔާބުކުރީ ނޭޕާލްގެ ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން.

'59 - އިންޑިއާގެ ހަމަލާއެއް. ޕެނަލްޓީ އޭރިއާ ބޭރުން އިންޑިއާގެ އުދަންތާ ސިންހް ފޮނުވާލި ހަމަލާ، ނޭޕާލްގެ ޑިފެންޑަރުން ވަނީ ދިފާއުކޮށްފައި.

ޕާކިސްތާނާ ދެކޮޅަށް ކުޅުނު މެޗުގައި އިންޑިއާގެ ކޯޗު އިގޯ ސްޓިމަކްއަށް ރަތް ކާޑެއް ދެއްކުމުން، މި މެޗުގައި އޭނާ ހުރީ ސަސްޕެންޝަންގައި.

'48 - ނޭޕާލްގެ ހަމަލާއެއް. އެޓޭކުގައި ގިނަ މަސައްކަތްތަކެއް ކުރުމަށްފަހު، ނޭޕާލްގެ ދެވަންދްރަ ތަމަންގް ދުރުން ފޮނުވާލި ހަމަލާ، ގޯލާ އަމާޒުވެފައެއް ނުވޭ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

ނޭޕާލުން ބަދަލެއް. އަނިޔާއަކާ ގުޅިގެން ނޭޕާލްގެ އެންމެ މުހިންމު އެއް ކުޅުންތެރިިޔާ އަންޖަން ބިސްޓާގެ ބަދަލުގައި ކުޅެން ނުކުތީ އާވާޝް ލަމިޗާނޭ.

'43 - ނޭޕާލަށް ރަނގަޅު ފުރުސަތެއް. ގޯލު ކުރިމަތިން މަނީޝް ޑަންގީ ނަގައިދިން ހުރަހަކަށް ބިމާލް ގަރްތީ މަގަރް ފައިގައި ލައްވާލައިފައެއް ނުވޭ.

'36 - ނޭޕާލްގެ ހަމަލާއެއް. ޕެނަލްޓީ އޭރިއާ ބޭރުން ނޭޕާލްގެ މަނީޝް ޑަންގީ ފޮނުވާލި ހަމަލާ، އިންޑިއާގެ ގޯލާ އަމާޒުވެފައެއް ނުވޭ.

'34 - ނޭޕާލްގެ ކައުންޓާ އެޓޭކެއް. މަނީޝް ޑަންގީ ކުރިއަށްޖެހި ޕެނަލްޓީ އޭރިއާ ތެރެއަށް ވަނުމަށްފަހު ދިން ބޯޅަ، ނޭޕާލްގެ ބިމާލް ގަރްތީ މަގަަަރްއަށް ލިބުމުގެ ކުރިން އިންޑިއާގެ ޑިފެންޑަރުން ވަނީ ދިފާއުކޮށްފައި.

'32 - ޗެތުރީ ނަގައިދިން ހިލޭ ޖެހުން ޕެނަލްޓީ އޭރިއާ ތެރެއިން ނުރައްކާވުމުގެ ކުރިން ނޭޕާލްގެ ޑިފެންޑަރުން ދިފާއުކޮށްފި.

މިއަދުގެ މެޗަށް އިންޑިއާ އިން ނުކުތީ އަށް ބަދަލަކާއެކު. އެގޮތުން ޕާކިސްތާން މެޗުގެ ފުރަތަަމަ 11 އިން ފެނުނު ކީޕަރު އަމްރިންދަރް ސިންހް، ސުބާސިޝް ބޯސް، އަންވަރު އަލީ، ސަންދޭޝް ޖިންގަން، ޖީކްސަން ސިންހް ތޫނައޮޖަމް، ލަލިއަންޒުއަލާ ޗަންގްޓޭ، ޕްރިތަމް ކޮޓާލް އަދި މުހައްމަދު ކުރުނިޔަން މި މެޗު ފެށީ ބެންޗުން.

'17 - ނޭޕާލްގެ ނުރައްކާތެރި ހަމަލާއެއް. ނޭޕާލްގެ ކޯނަރެއް އިންޑިއާގެ ކުޅުންތެރިން ދިފާއުކުރުމާއެކު ޕެނަލްޓީ އޭރިއާ ބޭރުން ލިބުނު ބޯޅައަކުން ނޭޕާލްގެ އަރިކް ބިސްޓާ ފޮނުވާލި ބާރު ހަމަލާ، އިންޑިއާގެ ކީޕަރު ގުޕްރީތު ސިންހް ވަނީ މަތަކޮށްފައި.

އިންޑިއާ އިން ދަނީ ވަރަށް ބޮޑަށް ކުރިއަށްޖެހި، ނޭޕާލްގެ ގޯލަށް ނުރައްކާކުރުމަށް މަސައްކުރަމުން.

'16 - އިންޑިއާއަށް ފުރުސަތެއް. އަރިމަތިން އާކާޝް މިޝްރާ ދިން ބޯޅައަކުން ޕެނަލްޓީ އޭރިއާ ތެރޭ ހުރެ، ސަހަލް އަބްދުލް ސަމަދު ފޮނުވާލި ހަމަލާ ދިޔައީ ނޭޕާލްގެ ގޯލުގެ އަރިމަތީ ދަނޑިކައިރިން ބޭރަށް. އޭނާއަށް ރަނގަޅަށް އެ ބޯޅަ ފޮނުވާލެވިފައެއް ނުވޭ.

'15 - އިންޑިއާގެ ސަހަލް އަބްދުލް ސަމަދު، ޕެނަލްޓީ އޭރިއާ ވަންނަން މަސައްކަތްކުރަނިކޮށް، ނޭޕާލްގެ ޑިފެންޑަރުން އެ ބޯޅަ ހޯދައިފި.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ދެ ޓީމުން ވެސް މަސައްކަތްކޮށްފައިވަނީ އެޓޭކިން ކުޅުމަކަށް. ނަމަވެސް އިންޑިއާ އަދި ނޭޕާލަށް ވެސް އިދިކޮޅު ޓީމުގެ ގޯލަށް ބޮޑު ނުރައްކަލެއް ކުރެވިފައެއް ނުވޭ.

މެޗު ކުރިއަށްދާ އިރު، ކޮންމެވެސް ވަރަކަށް ވާރޭ ވެހެމުންދޭ. ފިނިހޫނުމިން ހުރީ 23 ޑިގްރީސް ސެލްސިއަސްގައި.

މި މެޗުގެ ރެފްރީއަކީ ރާއްޖޭގެ އެލީޓް ރެފްރީ ހުސައިން ސިނާން.

މެޗުގެ ކުޅުން ފަށައިފި.

އިންޑިއާގެ ފުރަތަމަ 11:

ނޭޕާލްގެ ފުރަތަމަ 11: