ސާފް ޗެމްޕިއަންޝިޕް ލައިވް: އިންޑިއާ 4-0 ޕާކިސްތާން (ފުލްޓައިމް)

މެޗުގެ އުސްއަލިތައް:

މެޗުގެ ދެވަނަ ހާފުގެ ކުޅުން ނިންމާލައިފި. މެޗު ނިމިގެންދިޔައީ 4-0 ގެ ނަތީޖާއަކުން އިންޑިއާ ކުރީގައި އޮވެގެން.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'81 - އިންޑިއާ އިން ހަތަރު ގޯލުގެ ލީޑެއް ހޯދައިފި. އިންޑިއާގެ ހާފުން ދިން ބޯޅައެއް ކޮންޓްރޯލުކޮށްލުމަށްފަހު، ޕެނަލްޓީ އޭރިއާ ތެރެއަށް ވަދެ، ޕާކިސްތާން ގޯލުގެ ތެރެއަށް ފޮނުވާލައިގެން އިންޑިއާއަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ފެނިގެންދާ އުދަންތާ ސިންހް ކުމާމް.

މިއީ ސާފް ޗެމްޕިއަންޝިޕްގެ ތާރީހުގައި ޗެތުރީ ޖެހި 21 ވަނަ ގޯލު. ސާފް ޗެމްޕިއަންޝިޕްގައި އެންމެ ގިނަ ގޯލު ޖެހުމުގެ ރެކޯޑު އޮތީ ރާއްޖޭގެ އަލީ އަޝްފާގު (ދަގަނޑޭ)ގެ އަތުގައި. އޭނާ ވަނީ ޖުމުލަ 23 ގޯލު ޖަހާފައި. އެހެންކަމުން އެ ރެކޯޑާ އަރައި ހަމަކުރުމަށް ޗެތުރީއަށް ދެން ބޭނުންވާނީ އެންމެ ދެ ގޯލު. އަނިޔާއާ ގުޅިގެން މި މުބާރާތުގައި ދަގަނޑޭ ނުފެންނާނެ.

'74 - އިންޑިއާއަށް ތިން ގޯލުގެ ލީޑެއް. ޗެތުރީގެ ޕެނަލްޓީ އަމާޒުކޮށްލާފައިވަނީ ޕާކިސްތާން ގޯލުގެ މަތީ ކަނަކަށް. އެ ގޯލާއެކު ޗެތުރީގެ ހެޓްރިކް ވެސް ވަނީ ފުރިހަމަވެފައި.

'73 - ޕެނަލްޓީ އޭރިއާ ތެރެއިން އިންޑިއާ ކެޕްޓަން ޗެތުރީއަށް ޕާކިސްތާންގެ މުހައްމަދު ސުފިޔާން ކުރި ފައުލަކާ ގުޅިގެން އިންޑިއާއަށް އިތުރު ޕެނަލްޓީއެއް.

'66 - އިންޑިއާގެ ނުރައްކަލެއް. އިންޑިއާގެ ސަހަލް އަބްދުލް ސަމަދު ނަގައިދިން ހުރަސް، ޕެނަލްޓީ އޭރިއާ ތެރެއިން ޕާކިސްތާނުގެ އީސާ ސުލިމާން ބޮލުގައި ޖެހި، އަމާޒުވީ ޕާކިސްތާން ގޯލުގެ ހުރަސް ދަނޑިއަށް.

ދަނޑުގެ ހާލަތު އޮތް ގޮތުން އިންޑިއާއަށް ވެސް ދަނީ އުނދަގޫތަކެއް ކުރިމަތިވަމުން. ހާއްސަކޮށް ވާރޭ ވެހުމުގެ ސަބަބުން ވަޅުގަނޑު ހެދިފައިވާ ތަންތަނުގައި ފެން ހެދިފައި ހުރުމުން ކުޅެން ދެ ޓީމަށް ވެސް އުނދަގޫވޭ.

މިހާރު ޕާކިސްތާންގެ ކެޕްޓަން ބޭންޑު އަޅައިގެން ކުޅެމުންދަނީ ޑިފެންޑަރު އީސާ ސުލިމާން.

'54 - ޕާކިސްތާނުން ދެ ބަދަލެއް. މުހައްމަދު އުމަރު ހަޔާތުގެ ބަދަލުގައި ކުޅެން ނުކުތީ އަލީ ޚާން ނިއާޒީ. އަދި ކެޕްޓަން ހަސަން ނަވީދް ބަޝީރުގެ ބަދަލުގައި ކުޅެން ނުކުތީ ޝަޔާކް ދޯސްތު.

'48 - އިންޑިއާއަށް ހުސް ފުރުސަތެއް. މުހައްމަދު ކުރުނިޔާން ނަގައިދިން ހުރަސް، ޕާސްކިތާން ކީޕަރު ސާގިބް ހަނީފް ދިފާއުކުރުމާއެކު ޕެނަލްޓީ އޭރިއާ ތެރޭ ހުސްކޮށް ހުއްޓައި އިންޑިއާގެ ސަހަލް އަބްދުލް ސަމަދު ލިބުނު ބޯޅައިން ފޮނުވާލި ހަމަލާ ޕާކިސްތާނުގެ ގޯލާ އަމާޒުވެފައެއް ނުވޭ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-0 ގެ ނަތީޖާއަކުން އިންޑިއާ ކުރީގައި އޮވެގެން.

ކޯޗު ސްޓިމަކްއަށް ދެއްކި ރަތް ކާޑަކީ މިފަހަރުގެ މުބާރާތުގައި ދެއްކި ފުރަތަމަ ރަތް ކާޑު.

'45 - ޕާކިސްތާނުގެ ކުޅުންތެރިޔާ ބޯޅަ އެއްލަނިކޮށް، އިންޑިއާގެ ކޯޗު އިގޯ ސްޓިމަކް ބޯޅައިގައި ޖެހުމުން މެޗު ހޫނުވެ، ސްޓިމަކްއަށް ރަތް ކާޑެއް ދައްކައިފި.

'41 - އިންޑިއާގެ ނުރައްކަލެއް. އަރިމަތިން ކުރުނިޔަން އަރައި ނަގައިދިން ބޯޅަ ޕާކިސްތާނުން ސާފުކޮށްލުމުން ރީބައުންސްގައި ސުބަހަސިޝް ބޯސްއަށް ފޮނުވާލަން ލިބުނު ނަމަވެސް، އޭނާގެ ހަމަލާ ބްލޮކްވެގެން ދިޔައީ ސާގިބް އަތަށް.

މިހާރު މެޗު ކުރިއަށްދަނީ ވިއްސާރައިގައި.

'31 - ޗެތުރީ ފޮނުވާލި ހިލޭ ޖެހުން ދިޔައީ ޕާކިސްތާން ގޯލުގެ އަރިމަތީ ދަނޑިކައިރިން ބޭރަށް.

'30 - ޕާކިސްތާންގެ ޕެނަލްޓީ އޭރިއާ ބޭރުން މުހައްމަދު ކުރުނިޔާންއަށް ކުރި ފައުލަކާ ގުޅިގެން ޕާކިސްތާންގެ މުހައްމަދު އުމަރު ހަޔާޓްއަށް ރީނދޫ ކާޑެއް، އިންޑިއާއަށް ހިލޭ ޖެހުމެއް.

'29 - ޕާކިސްތާނުގެ ހަމަލާއެއް. ޕެނަލްޓީ އޭރިއާ ތެރެއިން ޕާކިސްތާނުގެ މުހައްމަދު ސުފިޔާން ފޮނުވާލި ހަމަލާ، އިންޑިއާގެ ގޯލާ އަމާޒުވެފައެއް ނުވޭ.

'25 - އިންޑިއާގެ ހަމަލާއެއް. ޕްރިތަމް ކޮޓާލް ދިން ބޯޅައަކުން ޕެނަލްޓީ އޭރިއާ ތެރެއިން ލާލިއަންޒުއާލާ ޗަންގްޓޭ ފޮނުވާލި ހަމަލާ އަމާޒުވީ ޕާކިސްތާން ކީޕަރު ސާގިބް ހަނީފްއާ ދިމާއަށް.

'22 - ޕެނަލްޓީ އޭރިއާާ ބޭރުން ޕާކިސްތާނުގެ އަލީ އުޒައިރު މަހުމޫދު ފޮނުވާލި ހަމަލާ، އިންޑިއާގެ ގޯލާ އަމާޒެއް ނުވި.

ޕާކިސްތާން ކީޕަރު ސާގިބް ހަނީފަށް ހެދުނު ގޯހަކުން އިންޑިއާ އިން ޖެހި ގޯލަށްފަހު، ޕާކިސްތާންގެ ކުޅުމަށް އޭގެ އަސަރުކޮށްފައިވާކަން ފާހަގަކޮށްލެވޭ. ޕާކިސްތާންގެ ގޯލު ބަލަހައްޓަމުންދާ ސާގިބް ހަނީފަކީ ރާއްޖޭގެ ކްލަބު ގްރީން ސްޓްރީޓްސްއަށް ކުޅެމުންދާ ކީޕަރެއް.

'15 - އިންޑިއާގެ ޕެނަލްޓީ ކާމިޔާބުކޮށް، ލީޑު ފުޅާކޮށްދިނީ ފުރަތަމަ ގޯލު ވެސް ކާމިޔާބުކޮށްދިން ކެޕްޓަން ސުނިލް ޗެތުރީ.

'14 - އަނިރުދް ތާޕާ ފޮނުވާލި ހަމަލާއެއް ޕެނަލްޓީ އޭރިއާ ތެރެއިން ޕާކިސްތާންގެ އީސާ ސުލިމާން އަތުގައި ބޯޅަ ޖެހުމުން އިންޑިއާއަށް ޕެނަލްޓީއެއް.

'10 - އިންޑިއާ އިން ގޯލެއް ޖަހައި ލީޑު ހޯދައިފި. ޕާކިސްތާނުގެ ކީޕަރު ސާގިބް ހަނީފަށް ހެދުނު ގޯހަކުން އިންޑިއާއަށް އެ ގޯލު ކާމިޔާބުކޮށްދިނީ ކެޕްޓަން ސުނިލް ޗެތުރީ.

ޕާކިސްތާންގެ ފުރަތަަމަ 11:

އިންޑިއާގެ ފުރަތަމަ 11: