ސާފް ޗެމްޕިއަންޝިޕް ލައިވް: ނޭޕާލް 1-3 ކުވައިތު (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 3-1 ގެ ނަތީޖާއަކުން ކުވައިތު ކުރީގައި އޮވެގެން.

'90+3 - ނޭޕާލަށް ފުރުސަތެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ނޭޕާލްގެ އަންޖަން ބިސްޓާ ފޮނުވާލި ހަމަލާ، ކުވައިތުގެ ގޯލާ އަމާޒުވެފައެއް ނުވޭ.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'86 - ނޭޕާލުގެ ހަމަލާއެއް. އަރިމަތިން ނެގި ހުރަހެއް ޕެނަލްޓީ އޭރިއާ ތެރޭ ހުރެ، ނޭޕާލްގެ އަޔުޝް ގަލަން ބޮލުން ފޮނުވާލި ހަމަލާ، ކުވައިތުގެ ގޯލާ އަމާޒުވެފައެއް ނުވޭ.

'85 - ކުވައިތުގެ ބާރު ހަމަލާއެއް. ޕެނަލްޓީ އޭރިއާ ބޭރުން ކުވައިތުގެ އަލީ މުހައިސެން ފޮނުވާލި ބާރު ހަމަލާ، ނޭޕާލްގެ ކީޕަރު ކިރަން ވަނީ މަތަކޮށްފައި.

މިއަދުގެ މެޗަށް ގިނަ އަދަދެއްގެ ސަޕޯޓަރުން ވަދެފައެއް ނުވޭ. އެހެންނަމަވެސް ދަނޑުގެ މެއިން ގޭޓާ ދިމާ ފަޅިން ސިނޑިބަރީގައި ނޭޕާލްގެ ބައެއް ސަޕޯޓަރުން ދަނީ ޓީމަށް ހިތްވަރުދެމުން.

'78 - މުހައްމަދު އަބްދުﷲ ދިން ބޯޅަ، ކުވައިތުގެ ސަލްމާން މުހައްމަދަށް ލިބުމުގެ ކުރިން ނޭޕާލްގެ ކީޕަރު ކިރަން ކުރިއަށް ނުކުމެ، ބޯޅަ ދިފާއުކޮށްފި.

'75 - ނޭޕާލް ކީޕަރު ކިރަންގެ މުހިންމު ސޭވްއެއް. ޕެނަލްޓީ އޭރިއާ ތެރޭ އަރިމަތީގައި ހުރެ، ކުވައިތުގެ މުހައްމަދު އަބްދުﷲ ފޮނުވާލި ބާރު ހަމަލާ ނޭޕާލް ގޯލުގެ ކަނަކަށް އަމާޒުވާން ދަނިކޮށް، ކީޕަރު ކިރަން ވަނީ މަތަކޮށްފައި.

'68 - ނޭޕާލުން ގޯލެއް ޖަހައިފި. ކުވައިތުގެ ޑިފެންސަށް ރަނގަޅަށް ދިފާއުނުކުރެވުމާއެކު ލިބުނު ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ނޭޕާލަށް އެ ގޯލު ކާމިޔާބުކޮށްދިނީ އަންޖަން ބިސްޓާ.

'65 - ޕެނަލްޓީ އޭރިއާ ތެރެއިން ނޭޕާލްގެ ރޯހިތު ޗާންދުގެ އަތުގައި ބޯޅައިން ޖެހުމުން، ކުވައިތަށް ޕެނަލްޓީއެއް. ކުވައިތަށް ޕެނަލްޓީ ކާމިޔާބުކޮށް، ތިން ގޯލުގެ ލީޑެއް ހޯދައިދިނީ މުހައްމަދު އަބްދުﷲ.

'62 - ކުވެއިތުން ދެ ބަދަލެއް. މޮބާރަކް އަލްފަނީނިގެ ބަދަލުގައި ކުޅެން ނުކުތީ އަހުމަދު އަލްދެފީރީ. އަދި ޝަބައިބް އަލްޚަލްދީގެ ބަދަލުގައި ކުޅެން ނުކުތީ ސަލްމާން މުހައްމަދު.

'57 - ނޭޕާލްގެ ނުރައްކާތެރި ހަމަލާއެއް. އަންޖަން ބިސްޓާ ނަގައިދިން ހުރަސް، ޕެނަލްޓީ އޭރިއާ ތެރޭ ހުރެ، ވެއްޓިލާފައި ސަނިޝް ޝްރެސްތާ ބޮލުން ފޮނުވާލި ހަމަލާ ދިޔައީ ކުވެއިތު ގޯލުގެ އަރިމަތީ ދަނޑި ކައިރިން ބޭރަށް.

'51 - ފައުލަކާ ގުޅިގެން ނޭޕާލްގެ އަންޖަން ބިސްޓާއަށް ރީނދޫ ކާޑެއް ދައްކައިފި. މިއީ މެޗުުގައި ދެއްކި ފުރަތަމަ ކާޑު.

'48 - ކުވެއިތުގެ ހަމަލާއެއް. މުހައްމަދު އަބްދުﷲ ދިން ބޯޅައަކުން ޕެނަލްޓީ އޭރިއާ ތެރޭ ހުރެ، ބަދަލު ކުޅުންތެރިއެއްގެ ގޮތުގައި ކުޅެން ނުކުތް އީދް އަލްރާޝިދީ ފޮނުވާލި ހަމަލާ، ނޭޕާލްގެ ގޯލާ އަމާޒުވެފައެއް ނުވޭ.

ދެވަނަ ހާފުގެ ކުޅުން ފަށައިފި. ދަވަނަ ހާފަށް ނުކުތް އިރު، ދަނޑަށް ކޮންމެވެސް ވަރަކަށް ދަނީ ވާރޭ ވެހެމުން.

ދެވަނަ ހާފަށް ނޭޕާލް އަދި ނޭޕާލުން ނުކުތީ ބަދަލަކާއެކު. ނޭޕާލުން ނަވަޔުގް ޝްރެސްތާގެ ބަދަލުގައި ކުޅެން ނުކުތީ އަޔުޝް ގަލަން. އަދި ކުވެއިތުން އަބްދުﷲ އަލަފަހާދް ކުޅެން ނުކުތީ އަބްދުﷲ އަލްބްލޫޝީ.

ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-0 ގެ ނަތީޖާއަކުން ކުވައިތު ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

'41 - ކުވައިތުން އިތުރު ގޯލެއް ޖަހައި ލީޑު ފުޅާކޮށްފި. ކުވައިތަށް އެ ގޯލު ކާމިޔާބުކޮށްދިނީ ޝަބައިބް އަލްޚަރަބީ. މުހައްމަދު އަބްދުﷲ އަރިމަތިން ދިން ބޯޅަ ކޮންޓްރޯލުކޮށްލުމަށްފަހު ޕެނަލްޓީ އޭރިއާ ތެރެއިން އެނބުރިލާފައި އަލްޚަރަބީ ވަނީ ފަސޭހަކަމާއެކު ނޭޕާލުގެ ގޯލުގެ ތެރެއަށް ބޯޅަ ފޮނުވާލާފައި.

'36 - ކުވައިތުގެ ނުރައްކާތެރި ހަމަލާއެއް. ފަވާޒް އަލޮތައިބީ ނަގައިދިން ހުރަހަކުން މުހައްމަދު އަބްދުﷲ ބޮލުން ފޮނުވާލި ހަމަލާ އަމާޒުވީ ނޭޕާލު ގޯލުގެ ހުރަސް ދަނޑިއަށް

'23 - ކުވެއިތުން ގޯލެއް ޖަހައި ލީޑު ހޯދައިފި. ކުވައިތުގެ ކޯނަރެއް ޕެނަލްޓީ އޭރިއާ ތެރެއިން ނޭޕާލަށް ރަނގަޅަށް ދިފާއުނުކުރެވުމާއެކު، ހުސްކޮށް ހުއްޓައި ލިބުނު ބޯޅައަކުން ކުވައިތަށް އެ ގޯލު ކާމިޔާބުކޮށްދިނީ އެޓީމުގެ ކެޕްޓަން ޚާލިދު ހަޖިއާ. ކީޕަރު ކިރަން ކުމާރު ލިމްބޫ ވެސް ކުރިއަށް އަރައި ހުރުމުން، ކުވައިތުގެ ޚާލިދު އެ ބޯޅަ ފޮނުވާލީ ހުސް ގޯލަކަށް.

'21 - ނޭޕާލަށް ރަނގަޅު ފުރުސަތެއް. އެއްލުމެއްގެ ތެރެއިން ޕެނަލްޓީ އޭރިއާ ތެރޭ އަރިމަތިން ލިބުނު ބޯޅައަކުން ނޭޕާލްގެ ނަވަޔުގް ޝްރެސްތާ ފޮނުވާލި ހަމަލާ، ކުވެއިތުގެ ގޯލާ އަމާޒުވެފައެއް ނުވޭ.

ފުރަތަމަ 15 މިނެޓުގެ ތެރޭގައި ގިނަ ވަގުތު ބޯޅަ ހިފަހައްޓައިގެން އެޓޭކުގައި ނުރައްކާކުރަމުން ދިޔައީ ކުވެއިތުން. ނަމަވެސް ނޭޕާލުން ވަރަށް ބޮޑަށް ފަހަތަށް ޖެހި ކުޅެމުންދާތީ، ކުވައިތަށް ވަނީ އުނދަގޫތަކަކާ ކުރިމަތިލާން ޖެހިފައި.

'15 - ކުވައިތުގެ ނުރައްކާތެރި ހުރަހެއް. ކުވައިތުގެ އަބްދުﷲ އަލްފަހާދު ނަގައިދިން ހުރަސް، ނުރައްކާވުމުގެ ކުރިން ޕެނަލްޓީ އޭރިއާ ތެރެއިން ނޭޕާލްގެ ކީޕަރު ކިރަން ކުމާރް ލިމްބޫ ވަނީ މަތަކޮށްފައި.

'13 - ކުވެއިތުގެ ހަމަލާއެއް. ކުވެއިތުގެ މުހައްމަދު އަބްދުﷲ ދުރުން ފޮނުވާލި ހަމަލާ ދިޔައީ ނޭޕާލް ގޯލުގެ އަރިމަތީ ދަނޑިކައިރިން ބޭރަށް.

'11 - ކުވެއިތުގެ އަތުބީ ސަލާހް ދުރުން ފޮނުވާލި ހަމަލާ، ނޭޕާލްގެ ގޯލާ އަމާޒުނުވެ ބޭރަށް.

މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، ދެ ޓީމަށް ވެސް އިދިކޮޅު ގޯލަށް ނުރައްކާ ކުރެވިފައެއް ނުވޭ.

ނޭޕާލްގެ ފުރަތަމަ 11:

ކުވެއިތުގެ ފުރަތަމަ 11:

'4 - ނޭޕާލްގެ މަނީޝް ޑަންގީ ބޯޅަ ހިފަހައިގެން ޕެނަލްޓީ އޭރިއާ ތެރެއަށް ވަނުމަށްފަހު ނުރައްކާކުރުމުގެ ކުރިން ކުވެއިތުގެ ޑިފެންޑަރުން ދިފާއުކޮށްފި.

މެޗުގެ ކުޅުން ފަށައިފި.