ޚަބަރު

ރަސްދޫ ބަނދަރު ބޭރުތޮށި ޖެހުމާއި އޮމަދޫގެ ބަނދަރު އަޕްގްރޭޑު ކުރަން އެމްޓީސީސީއަށް

ރިފާ ހަލީލު

އއ. ރަސްދޫ ބަނދަރު ބޭރުތޮށި ޖެހުމާއި ގޮނޑުދޮށް ހިމާޔަތްކުރުމުގެ މަޝްރޫއާއި އދ. އޮމަދޫ ބަނދަރު އަޕްގްރޭޑު ކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ.

ޕްލޭނިން މިނިސްޓްރީގައި މިއަދު ބޭއްވި ރަސްމިއްޔާތެއްގައި މި މަޝްރޫއުތަކުގެ އެއްބަސްވުންތަކުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓާ ޖެނެރަލް ފާތިމަތު ޝާނާ ފާރޫގެވެ. އެމްޓީސީސީގެ ފަރާތުން ސޮއި ކުރެއްވީ އެކުންފުނީގެ ސީއީއޯ އާދަމް އާޒިމެވެ.

ރަސްދޫ ބަނދަރު ބޭރުތޮށި ޖެހުމާއި ގޮނޑުދޮށް ހިމާޔަތް ކުރުމުގެ މަސައްކަތުގެ ދަށުން 104،000 ސޭންޑް ފިލްޑް ބްރޭކްވޯޓާ ރިކްލެމޭޝަން ހެދުމާއި 64 މީޓަރަށް ވޯޓާބްރޭކް ޖެހުމާއި 42 މީޓަރަށް ސަބްމާޖް ބްރޭކްވޯޓާ ޖެހުމާއި 1736 މީޓަރު ސަރަހައްދެއްގައި ރިވެޓްމެންޓު ޖެހުމާއި، 224 މީޓަރު ސަރަހައްދެއްގައި ގްރޮއިން ޖެހުމާއި 97 މީޓަރު އެއްގަމު ތޮށި ލުން ހިމެނެއެވެ. އަދި ހަތަރު ނެވިގޭޝަން ލައިޓާއި 10 މަގު ބައްތި ހަރުކުރުމާއި 450 އަކަ މީޓަރުގެ ޕޭވްމެންޓް ހެދުމާއި 86 މީޓަރުގެ ކޮންކްރީޓު ބްރިޖަކާއި 40 މީޓަރުގެ ކޮންކްރީޓް ބްރިޖެއް ހެދުމުގެ މަސައްކަތް ކުރާނެއެވެ.

ރަސްދޫ ބަނދަރު ބޭރުތޮށި ޖެހުމާއި ގޮނޑުދޮށް ހިމާޔަތް ކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ 86.8 މިލިއަން ރުފިޔާއަށް 365 ދުވަހުގެ ތެރޭގައި ނިންމުމަށެވެ.