ޚަބަރު

މަސްތުން ސަލާމަތްވެ، މިދިޔަ އަހަރު 200 އަށްވުރެ ގިނަ މީހުން މުޖުތަމައަށް

މުހައްމަދު އިޝާން

ފަރުވާ ފުރިހަމަ ކުރުމަށްފަހު، މިދިޔަ އަހަރު 242 މީހުން މުޖުތަމައަށް ނެރެފައިވާ ކަމަށް ނޭޝަނަލް ޑްރަގް އެޖެންސީ (އެންޑީއޭ)އިން ބުނެފިއެވެ.

އެންޑީއޭއިން މިދިޔަ ހޯމަ ދުވަހު ޓުވިޓާގައި އާންމުކުރި ތަފާސްހިސާބުގައިވާ ގޮތުން މިދިޔަ އަހަރު ޑިސެމްބަރު މަހުގެ ނިޔަލަށް މަސްތުވާތަކެތި ބޭނުންކުރާ 1،017 މީހަކު ވަނީ ފަރުވާ ހޯދައިފައެވެ އެގޮތުން 242 މީހަކު ފަރުވާ ނިންމާފައިވާ އިރު، 775 މީހުން އަދިވެސް ދަނީ ފަރުވާ ހޯދަމުން ކަމަށް ތަފާސްހިސާބުގައި ބުނެފައިވެއެވެ.

އެންޑީއޭގެ ދަށުން ރާއްޖޭގެ އެކިކަންކޮޅުތަކުގައި ހުރި ސެންޓަރުތަކުން މިވަގުތު ފަރުވާ ހޯދަމުންދާ މީހުންގެ އަދަދު:

ހުޅުމާލޭ ހާފްވޭ ހައުސް: 143 މީހުން
ގަން ކްލިނިކް: 89
މާލެ ކޮމިއުނިޓީ ސާވިސް ސެންޓަރު: 317 މީހުން
ކ. ހިންމަފުށީ ޓްރީޓްމެންޓް އެންޑް ރިހެބިލިޓޭޝަން ސެންޓަރު: 146 މީހުން
ސ. ހުޅުދޫ ވިލުނު ސެންޓަރު: 36 މީހުން
ގއ. ވިލިނގިލި ދަގެނާ ކޮމިއުނިޓީ ރިހެބިލިޓޭޝަން ސެންޓަރު: 19 މީހުން
ހުޅުމާލޭގެ ސެމީ ރެސިޑެންޝަލް ހާފްވޭ ހައުސް: ހަ މީހުން
ފުވައްމުލަކު ސިޓީގެ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ސެންޓަރު: 55 މީހުން
ހިތަދޫ ޑްރަގް ޓްރީޓްމަންޓް އެންޑް ޑިޓޮސްކްސިފިކޭޝަން ސެންޓަރު: 111 މީހުން
ހުޅުމާލޭ ހާފްވޭ ހައުސް ފީމޭލް ރީހޭބިލިޓޭޝަން ސެންޓަރު: ހަތް މީހުން
ޗިލްޑްރަންސް ކޮމިއުނިޓީ ރިހޭބިލިޓޭޝަން ސާވިސް: ތިން ކުދިން
ކ. ގުޅި ސެންޓްރަލް ޑިޓޮކްސިފިކޭޝަން ސެންޓަރު: 16 މީހުން

ދައުލަތުގެ ހިންގުމުގެ އޮނިގަނޑަށް 2021 ވަނަ އަހަރުގެ މެއި މަހުގެ ފަސް ވަނަ ދުވަހު ގެނައި ބަދަލާއެކު އެންޑީއޭ ވަނީ ހެލްތު މިނިސްޓްރީގެ ބެލުމުގެ ދަށަށް ގެނެސްފައެވެ. ހެލްތު މިނިސްޓްރީން ވަނީ އެންޑީއޭގެ ހިންގުން ހަރުދަނާކުރުމުގެ ގޮތުން 2021 ވަނަ އަހަރުގެ ޖޫން މަހުގެ 21 ވަނަ ދުވަހު ނޭޝަނަލް ޑްރަގް އެޖެންސީ ބޯޑު އެކުލަވާލައިފައެވެ. އެ ބޯޑު ހިންގާނީ ހެލެތް މިނިސްޓާގެ އިރުޝާދުގެ ދަށުންނެވެ.

މަސްތުވާތަކެތީގެ މައްސަލައަކީ ރާއްޖޭގައި އެންމެ ބޮޑުވެފައިވާ އެއް މައްސަލައެވެ. މަސްތުވާތަކެތި ބޭނުން ކުރާ މީހުންގެ އަދަދު އަދިވެސް ގިނަ އިރު، އެ ވަބާ އިން ދުރުވުމަށް ފަރުވާ ހޯދަން އަންނަ މީހުންގެ ތެރެއިން ފަރުވާ ނުފެށި ކިއުގައި ގިނަ ބަޔަކު އަދިވެސް އެބަ ތިއްބެވެ.