އުންމީދީ ނޫސްވެރިޔަކަށް އާލިމް، އެންމެ މޮޅު ނޫސްވެރިޔަކަށް ޝިފްލީން

މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ އުންމީދީ ނޫސްވެރިޔާގެ އެވޯޑް، "މިހާރު" ގެ އާލިމް އަބްދުލްލަތީފަށް ލިބުނުއިރު، އަހަރުގެ އެންމެ މޮޅު ނޫސްވެރިޔާގެ އެވޯޑް "ދައުރު" ނޫހުގެ އާމިނަތު ޝިފްލީނަށް ލިބިއްޖެއެވެ.

އެންމެ އުންމީދީ ނޫސްވެރިޔާގެ އެވޯޑް އާލިމަށް ލިބުނީ، "އަދަދު" ނޫހުގެ މުހައްމަދު އުސާމް އާއި "ދައުރު" ނޫހުގެ މަރިޔަމް އުމްނާ އިސްމާއީލާ ވާދަކޮށެވެ. އަހަރުގެ އެންމެ މޮޅު ނޫސްވެރިޔާގެ އެވޯޑް ޝިފްލީނަށް ލިބުނީ "އަދަދު" ނޫހުގެ ނާޒިމް ހަސަން އާއި ވަގުތު ނޫހުގެ މުހައްމަދު ޔާމީންއާ ވާދަކޮށެވެ.

އެހެން ދާއިރާތައް:

އެކަށީގެންވާ ވަރަށް މާކްސް ލިބިފައި ނުވާތީ ތަހުގީގީ ނޫސްވެރިކަމުގެ ދާއިރާ އާއި ބްރޯޑްކާސްޓިން ކެޓެގަރީން ދެމެހެއްޓެނިވި ތަރައްގީ އާއި އިޖުތިމާއީ ދާއިރާ އާއި ސިޔާސީ ދާއިރާ އާއި ޝަރުއީ އަދި ގާނޫނީ ދާއިރާގެ އިތުރުން ފީޗާ ދާއިރާއިން މިފަހަރުގެ އެވޯޑް ހަފުލާގައި އެވޯޑް ދީފައެއް ނުވެއެވެ.

މިއަހަރުގެ އެވޯޑް ހަފުލާގައި ވަނީ ޑރ. އަލީ ރަފީގާއި މަޑުލު މުހައްމަދު ވަހީދަށް ހަޔާތީ އަރުތައިގެ އެވޯޑް އަރުވައިފައެވެ.