މާލޭގެ ގަރާޖެއްގައި އަނެއްކާވެސް އަލިފާނުގެ ބޮޑު ހާދިސާއެއް، މިހާތަނަށް 10 މަރު!

އަލިފާނުގެ ހާދިސާގައި މަރުވީ އިންޑިއާގެ އަށް މީހަކާއި ބަންގްލަދޭޝްގެ ދެ މީހެއްކަން ކަށަވަރުވެއްޖެ. އޭގެ ތެރެއިން އެކަކަކީ ފިރިހެނެއް އަދި އަނެއްކަކީ އަންހެނެއްކަން ވަނީ ޔަގީންވެފައި.

މާލޭގައި އަލިފާނުގެ ހާދިސާތައް ހިނގުން މަދުކުރުމަށް ކުރަންޖެހޭ އެންމެ މުހިއްމު ކަމަކީ މާލޭގައި އޮތް ތޮއްޖެހުމަށް ހައްލެއް ގެނައުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ

އެ މަނިކުފާނު އެހެން ވިދާޅުވީ، ރޭ ހާދިސާ ހިނގި ސަރަހައްދަށް ވަޑައިގެން ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން

އަލިފާނުގެ ހާދިސާ ހިނގި ސަރަހައްދަށް ރައީސް އިބްރާހިމް މުހައްމަދު ސޯލިހު ވަޑައިގެންފި. އެ ސަރަހައްދުގައި ޑިފެންސް މިނިސްޓަރު މާރިޔާވެސް އެބަ ހުންނެވި.

އަލިފާނުގެ ހާދިސާ ހިނގި ސަރަހައްދަށް ޑިފެންސް މިނިސްޓަރު މާރިޔާ އަހުމަދުދީދީ އާއި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ވަޑައިގެންފި

ރޯވި އިމާރާތުގައި ބަންގްލަދޭޝް، ސްރީ ލަންކާ އަދި އިންޑިއާގެ މީހުން ދިރިއުޅޭ: އެމްއެންޑީއެފް ފަޔާ އެންޑް ރެސްކިއުގެ ކޮމަންޑަންޓް ކާނަލް އިބްރާހިމް ރަޝީދު

އަލިފާނުގެ ހާދިސާގައި އައިޖީއެމްއެޗަށް ގެނައީ ދެ މީހުން. އޭގެ ތެރެއިން އެކަކު ގެނައި އިރުވެސް ވަނީ މަރުވެފައި. އެއީ އަންހެނެއް.

އަނެއް މީހާއަށް ފަރުވާ ދެމުންދަނީ ވެންޓިލޭޓަރުގައި. އެއީ ބަންގްލަދޭޝްގެ ފިރިހެނެއް.

ރޯވި އިމާރާތް ހުރީ ޑެގް އަޅައި ތިން ބުރިއަށް ހަދާފައި. އެތަނަށް އަރަން ހުންނަނީ ހަނި ސިނޑިއެއް. ކޮޓަރިތައް ހަދާފައި ހުރީ ޕާޓިޝަން ޖަހައިގެން. ދެ ކުޑަދޮރާއި މެއިން ދޮދު ނޫނީ ބޭރަށް ނުކުމެވޭނެ އެއްވެސް ގޮތެއް ނެތް.

މައުލޫމާތު ލިބިފައިވާ ގޮތުގައި ގަރާޖު ތެރެއިން މިހާތަނަށް ނެރުނު 10 މީހުންނަކީވެސް އިންޑިއާ މީހުން.

ފުލުހުން ބުނީ މިހާތަނަށް ލިބިފައިވާ މައުލޫމާތުން ދިހަ މީހުން މަރުވެފައިވާ ކަމަށް މައުލޫމާތު ލިބޭ ކަމަށާއި އެމްއެންޑީއެފް އަދި ފުލުހުން އެ ސަރަހައްދުގައި ހަރަކާތްތެރިވަމުން އަންނަ ކަމަށް.

އެމްއެންޑީއެފުން ބުނީ މ. ނިރުފެހި ގޭގައި ހިނގި އަލިފާނުގެ ހާދިސާގައި އެގޭގައި ދިރިއުޅުނު މީހުންގެ ފަރާތުން ނުވަ މީހަކު މަދުކަމަށް މައުލޫމާތުދިނުމުން އެ މީހުން ހޯދުމުގެ މަސައްކަތްކުރި ކަމަށާއި އެމީހުން މަރުވެފައި އޮއްވައި ފެނިފައިވާ ކަމަށް.

އަލިފާނުގެ ހާދިސާގައި މަރުވި މީހުންގެ އަދަދު މިހާރު 9 އަށް އަރާފައިވާ ކަމަށް އެމްއެންޑީއެފާއި ފުލުހުން މައުލޫމާތުދޭ.

އެ އިމާރާތުގެ ތެރޭގައި އަދިވެސް އިތުރު މީހަކު އޮތް ކަމުގެ މައުލޫމާތު ލިބޭ. އެމްއެންޑީއެފުން އަދިވެސް އެ އިމާރާތް ބަލައި ފާސްކުރުމުގެ މަސައްކަތް އަންނަނީ ކުރަމުން.

"ވަން"އަށް ކަށަވަރުވެފައިވާ ގޮތުގައި މަރުވެފައިވަނީ ބިދޭސީ އަންހެނެއް. އޭނާގެ ހަށިގަނޑު އެމްއެންޑީއެފުން ނެރުނީ އަލިފާން ރޯވި އިމާރާތުގެ ތެރެއިން. އެނގިފައިވާ ގޮތުގައި އެ އަންހެން މީހާ އައިޖީއެމްއެޗަށް ގެންދިޔަ އިރުވެސް އޮތީ މަރުވެފައި. އޭނާއާއެކު އިތުރު މީހަކުވެސް ފަރުވާއަށް އައިޖީއެމްއެޗަށް ގެންގޮސްފައިވޭ. ނަމަވެސް އޭނާގެ ހާލަތު އަދި އެނގިފައެއް ނުވޭ.

ދުމުގެ އަސަރުކޮށްގެން ދެ މީހަކު އައިޖީއެމްއެޗަށް ގެންދިޔަ.

ރޯވެފައިވާ އަލިފާންގަނޑު ނިއްވާލައިފި.

ހާދިސާގައި މީހަކަށް އަނިޔާވިކަމުގެ މައުލޫމާތެއް އަދި ނުލިބޭ.

އެމްއެންޑީއެފުން ބުނީ އަލިފާން ރޯވެފައިވަނީ އިސްކަންދަރު މަގުގައި ހުރި މ. ސެންޑްރޯސް ދެކުނު ބައިގައި ކަމަށް. އަދި ރޯވެފައިވާ އަލިފާން ނިއްވުމުގެ މަސައްކަތް އަދިވެސް ކުރަމުން އަންނަ ކަމަށް.

އެ ސަރަހައްދަށް ގިނަ މީހުން ވަނީ އެއްވެފައިވާ އިރު، ފުލުހުން ވެސް ހަރަކާތްތެރިވޭ.

ގަރާޖާ ކައިރި އިމާރާތްތަކުން މިހާރު ވަނީ މީހުން ހުސްކޮށް، ރައްކާތެރި ސަރަހައްދުތަކަށް ގެންގޮސްފައި. ގަރާޖުގެ ތެރެއިން ގޮވުމުގެ އަޑުތަކެއް އިވޭ. ބެލެވޭ ގޮތުގައި އެއީ ކެމިކަލްތަކުގައި އަލިފާން ހިވާތީ ގޮވާ އަޑެއް.

އެ ގަރާޖަކީ ކާރު ޕެއިންޓުކުރަން ބޭނުންކުރާ ގިނަ އަދަދެއްގެ ކެމިކަލް ހުރި ގުދަނެއް. ގަރާޖުގައި ދަނީ ވަރަށް ބޮޑަށް ރޯވެ އަނދަމުން. އަލިފާން ހިފާފައި ހުރީ ގަރާޖު އިމާރާތުގެ އެތެރޭ ފަޅީގައި.