ބޮޑު އީދަށް މާފުށި ތައްޔާރުވަނީ، ހަވާ އާއި ކަލަރަންވެސް އޮންނާނެ

މިދިޔަ ކުޑައީދަށް ވުރެ ކުލަގަދަކޮށް، މާފުށީގައި ބޮޑުއީދުގެ ހަރަކާތްތައް ކުރިއަށް ގެންދަން ނިންމައިފިއެވެ.

މިދިޔަ ކުޑައީދު އެންމެ ކުލަގަދަ ގޮތެއްގައި ފާހަގަކުރި އެއް ރަށަކީ މާފުށްޓެވެ. ހަވަޔާއެކު މިޔުޒިކް ޝޯއެއް ބޭއްވި އިރު، ސަފާގީ ކުޅިވަރުތައްވެސް އެރަށުގައި ކުރިއަށްގެންދިޔައެވެ. ކުޑައީދަށް އެރަށަށް 3000-4500 މީހުން ގޮސްފައިވާކަމަށް ކައުންސިލުން ވަނީ ބުނެފައެވެ.

މާފުށީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކައުންސިލްގެ ރައީސް ހަސަން ސޮލާހު ވިދާޅުވީ، ކުޑައީދުގައި ލިބުނު ތަރުހީބާއެކު ބޮޑުއީދު އެއަށްވުރެ ކުލަގަދަކޮށް ފާހަގަކުރަން އެރަށް ތައްޔާރަށް އޮތް ކަމަށެވެ. އެގޮތުން ބޮޑު އީދުގައި ގިނަ ހަރަކާތްތައް ކުރިއަށްގެންދާނެ ކަމަށް ވިދާޅުވިއެވެ.

"އަޅުގަނޑުމެން މި ބަލަނީ ބޮޑު އީދުގައި މިރަށަށް 7،000 ނޫނީ 8،000 މީހުން އެރުން ގާތް ކަމަށް،" ސޮލާހު ވިދާޅުވިއެވެ.

މާފުށީ ކައުންސިލުން މި ފަހަރު ފާހަގަ ކުރާ ބޮޑު އީދުގެ ކަންކަންވެސް އިންތިޒާމު ކުރަނީ ލިކަމެކް ކުންފުނިންނެވެ.

މާފުށީގައި އީދުގައި ބާއްވަން ރާވާފައިވާ ބައެއް ހަރަކާތްތައް

ސޮލާހު ވިދާޅުވީ، ކަލަރަންގައި ކޮންމެ މީހަކަށްވެސް ބައިވެރިވެވޭނެ ކަމަށާއި އެކަމަށް ހާއްސަ ޓީޝާޓަކާއި މެޑަލެއް ތައާރަފުކުރާނެ ކަމަށެވެ. އަދި މެޑަލް ލިބޭނީ ފީއެއް ދައްކައިގެން ކަމަށް ވިދާޅުވިއެވެ.

ސޮލާހު އިތުރަށް ވިދާޅުވީ ކެއިންބުއިމުގެ ހިދުމަތްތައް ފަސޭހައިން ލިބޭނެ އިންތިޒާމުތައްވެސް ހަމަޖައްސާނެ ކަމަށެވެ. އަދި އީދަށް އެރަށަށް ދިއުމަށް ގިނަ ފެރީތަކެއް ބާއްވާނެ ކަމަށްވެސް ވިދާޅުވިއެވެ.