ޚަބަރު

ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހަތް މީހަކު ހޯދަނީ

ގުރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހަތް މީހަކު ހޯދަން ފުލުހުން ވަނަވަރު އާންމުކޮށްފިއެވެ.

ފުލުހުން މިއަދު ބުނީ އެމީހުން ހޯދަނީ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގުކުރަމުންދާ މައްސަލައަކާ ގުޅިގެން ކަމަށެވެ.

ފުލުހުން ހޯދަމުންދާ ހަތް މީހުންނަކީ:

ކ. މާލެ/ ދަފްތަރު ނަންބަރު ރސ2260، މައުސޫމް މުހައްމަދުދީދީ (27އ)
ތ. ތިމަރަފުށި/ ސީނުގެ، އަހުމަދު ޝިމްހާޒު (22އ)
ކ. މާލެ/ މ. ލޮނުމިދިލިގެ، ލޫތު އަހުމަދު އާސިފް (18އ)
ގއ. މާމެންދޫ/ ގްލޭނޫރަންމާގެ، އަހުމަދު ރަބީއު (24އ)
ގއ. ގެމަނަފުށި/ ކެނެރީގެ، އަހުމަދު ނާޒިހު (27އ)
ސ. ހުޅުދޫ/ ނާދީ، މުނާދު ޖައުފަރު (20އ)
ސ. މަރަދޫ/ ކޮރަލް، އަހުމަދު ސާތިއު (21އ)

ފުލުހުން ބުނީ މި މީހުންނާ ބެހޭ އެއްވެސް މައުލޫމާތެއް އެނގޭނަމަ އެކަން ފުލުހުންގެ ހޮޓްލައިން ނަންބަރު 3322111 އަށް ނުވަތަ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 އަށް ގުޅައި ހިއްސާ ކުރުމަށް އެދޭ ކަމަށެވެ.

މިދިޔަ އީދު ދުވަހުން ފެށިގެން މާލެއާއި ހުޅުމާލޭގައި ދަނީ ސިލްސިލާ މާރާމާރީތަކެއް ހިންގަމުންނެވެ. އެގޮތުން ރޭ އެކަނިވެސް ހުޅުމާލޭގައި ދެ މާރާމާރީއެއް ހިންގައި ދެ މީހަކު ޒަހަމްކޮށްލި އިރު، މާލޭގައިވެސް މީހަކު ޒަހަމްކޮށްލިއެވެ. އަދި އެ މާރާމާރީތަކާ ގުޅިގެން ފުލުހުން ހިންގި ހާއްސަ އޮޕަރޭޝަނެއްގައި ފަސް މީހަކު ވަނީ ހައްޔަރުކޮށްފައެވެ.