ޚަބަރު

ކްރިމިނަލް ކޯޓު 14 ދުވަހުގެ ރިސެސް އަކަށް

މުއާވިޔަތު އަންވަރު

ކްރިމިނަލް ކޯޓު 14 ދުވަހުގެ ރިސެސްއަކަށް ދިއުމަށް ނިންމައިފި އެވެ.

ކްރިމިނަލް ކޯޓުން ބުނީ އިއްޔެ އިން ފެށިގެން އަންނަ މަހުގެ 10 ވަނަ ދުވަހާއި ހަމައަށް އެ ކޯޓު ރިސެސްއަކަށް ދިއުމަށް ނިންމާފައިވާ ކަމަށާއި އެ މުއްދަތުގައި ކުރިއަށް ގެންދާނީ ކޮންމެހެން ބާއްވަން ޖެހޭ ހާއްސަ ޝަރީއަތްތައް އެކަނި ކަމަށެވެ.

ކުށުގެ ތުހުމަތުގައި ހައްޔަރު ނުވަތަ ބަންދުކުރާ ފަރާތްތަކުގެ ބަންދާ މެދު ގޮތެއް ނިންމުމަށް ބާއްވާ އަޑުއެހުމުގެ އިތުރުން ތަހުގީގުކުރާ އިދާރާތަކުން އެދިގެން ނެރެދޭ އަމުރުތައް ނެރުމުގެ މަސައްކަތް އެ މުއްދަތު ތެރޭގައި ކުރިއެކޭ އެއްގޮތަށް ކުރިއަށް ގެންދާނެ ކަމަށް ކްރިމިނަލް ކޯޓުން ވަނީ ބުނެފަ އެވެ.

ރިސެސްގައި ކުރުމަށް ނިންމާފައިވާ ކަންކަން

ކޯޓުގެ ލީގަލް އޮފިސަރުންނަށް ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދާ ގުޅޭ ތަމްރީނު ހިންގުން
ގާޒީން ބައިވެރިވާ ގޮތަށް ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދާ ގުޅޭ މަސައްކަތު ބައްދަލުވުމެއް ބޭއްވުން
ބަހުގެ ހަމަތަކަށް ކޯޓުގެ މުވައްޒަފުން އަހުލުވުރިކުރުމަށްޓަކައި ދިވެހި ބަހުގެ އެކަޑަމީއާ ގުޅިގެން ތަމްރީނު ފްރޮގްރާމެއް ހިންގުން
ކޯޓުގެ މުވައްޒަފުންގެ ހާއްސަ ބައްދަލުވުމެއް ބޭއްވުން
ކޯޓުގެ މަސައްކަތް ހަރުދަނާކުރުމަށްޓަކައި ކުރަން ޖެހޭ ކަންކަމާ ގުޅިގެން ޑީޖޭއޭ މެދުވެރިކޮށް ކަމާބެހޭ އެކިއެކި އިދާރާތަކާއެކު މަޝްވަރާ ބައްދަލުވުން ބޭއްވުން