ވޯލްޑް ކަޕް ކޮލިފައިން: ރާއްޖެ 0-4 ސީރިއާ (ފުލްޓައިމް)

މެޗުގެ އުސްއަލިތައް:

މެޗުގެ ފުރިހަމަ ވަގުތުގެ ކުޅުން ނިންމާލައިފި. މެޗު ނިމިގެންދިޔައީ 4-0ގެ ނަތީޖާއަކުން ސީރިއާ ކުރީގައި އޮވެގެން.

'86 - ސީރިއާއަށް ހުސް ފުރުސަތެއް. ކައުންޓާ އެޓޭކެއްގައި އަލްމަވާސް ދިން ބޯޅައަކުން ޕެނަލްޓީ އޭރިއާ ތެރެއިން ސީރިއާގެ މަރްދެކް މަރްދްކިއާން ފޮނުވާލި ބާރު ހަމަލާ، އިރުފާން ވަނީ ދިފާއުކޮށްފައި.

'85 - ދެވަނަ ރީނދޫ ކާޑަކާއެކު ސީރިއާގެ އަލަޖާންއަށް ރަތް ކާޑެއް ދައްކައިފި. އޭނާއަށް ދެވަނަ ރީނދޫ ކާޑު ދައްކާފައިވަނީ ރާއްޖޭގެ ޕެނަލްޓީ އޭރިއާ ތެރެއަށް ޑައިވްކުރުމުން.

'82 - ރާއްޖޭގެ ސިފާއުއަށް ކުރި ފައުލަކާ ގުޅިގެން އަލަޖާންއަށް ރީނދޫ ކާޑެއް.

އެންމެ ފަހުން 2018 ވަނަ އަހަރު ރަޝިއާގައި ބޭއްވި ވޯލްޑް ކަޕަށް ކުޅުނު ކޮލިފިކޭޝަންގެ ތިންވަނަ ބުރަށްވެސް ސީރިއާ ދަތުރު ކުރި. އެފަހަރު ވޯލްޑް ކަޕްގެ ޖާގަ ސީރިއާއަށް ގެއްލުނީ ހަނި ފުރުސަތަކުން. މިރޭގެ މެޗުން މޮޅުވެ ސީރިއާއަށް 2022 ވަނަ އަހަރުގެ ވޯލްޑް ކަޕް ކޮލިފިކޭޝަން ފައިނަލް ބުރާ ގާތަށް ޖެހިލެވޭނެ. ގްރޫޕުގެ އެއްވަނަ ޔަގީންކޮށް ފައިނަލް ބުރަށް ދާން އެޓީމަށް ދެން ބޭނުންވަނީ ދެ ޕޮއިންޓް.

'71 - ސީރިއާގެ ޕެނަލްޓީ ކާމިޔާބުކޮށް، ހަތަރު ލަނޑުގެ ލީޑެއް ހޯދައިފި. ސީރިއާގެ ޕެނަލްޓީ ކާމިޔާބުކޮށްދިނީ އަލްވަމާސް. އެ ގޯލާއެކު އޭނާގެ ހެޓްރިކް ވެސް ވަނީ ފުރިހަމަވެފައި.

'69 - ސީރިއާއަށް ޕެނަލްޓީއެއް. މިއީ އެޓީމަށް ލިބޭ ތިންވަނަ ޕެނަލްޓީ. މި ޕެނަލްޓީ ސީރިއާއަށް ލިބުނީ ޕެނަލްޓީ އޭރިއާ ތެރެއިން ކަމެލް މެއިޝޭހްއަށް ރާއްޖޭގެ ސައިފް ކުރި ފައުލަކާ ގުޅިގެން.

ރާއްޖެއިން ދެވަނަ ހާފުގައި ދެ ބަދަލު ގެނައި އިރު، ސީރިއާ އިން ވެސް ވަނީ މިހާތަނަށް ތިން ބަދަލެއް ގެނެސްފައި.

'64 - ރާއްޖެއިން އިތުރު ބަދަލެއް. ސަމޫހުއަށް ލިބުނު އަނިޔާއަކާ ގުޅިގެން އޭނާގެ ބަދަލުގައި ކުޅެން ނުކުތީ މުހައްމަދު ސާއިފް.

ސީރިއާގެ ތިން ގޯލުގެ ތެރެއިން ދެ ގޯލު ޖަހައިދިން އަލްމަވާސްއަކީ ރުމޭނިއާގެ ފުރަތަމަ ޑިވިޝަނުގައި ވާދަކުރާ ބޮސްޓޮސާނީއަށް ކުޅެމުން އަންނަ ކުޅުންތެރިއެއް. އޭނާއަކީ 2012 ވަނަ އަހަރުން ފެށިގެން ސީރިއާ ޓީމަށް ކުޅެމުން އަންނަ ކުޅުންތެރިއެއް. ސީނިއާ ޓީމަށް ކުޅުމުގެ ކުރިން އޭނާ ވަނީ ސީރިއާގެ ޔޫތު ޓީމުތަކަށް ވެސް ކުޅެފައި.

'60 - ރާއްޖޭގެ ބަދަލެއް. ހަމްޕުގެ ބަދަލުގައި ކުޅެން ނުކުތީ އަލީ ޝަމާލް. ޔުނައިޓެޑް ވިކްޓަރީއަށް ކުޅެމުން އަންނަ ޝަމާލްއަކީ ގައުމީ ސްކޮޑަށް އަލަށް ނެގި ކުޅުންތެރިއެއް. އެހެންކަމުން މި މެޗަކީ ގައުމީ ޖާޒީގައި އޭނާ ކުޅޭ ފުރަތަމަ މެޗު.

'59 - ސީރިއާގެ ހަމަލާއެއް. ޔޫސުފް މުހައްމަދު ދުރުން ފޮނުވާލި ބާރު ހަމަލާ އަމާޒުވީ ރާއްޖޭގެ ގޯލުގެ ހުރަސް ދަނޑިއަށް.

ދެވަނަ ހާފުގެ ފުރަތަމަ ދިހަ މިނެޓަށް ބަލާ އިރު، ފުރަތަމަ ހާފަށް ވުރެ މި ހާފުގައި ރާއްޖޭގެ ކުޅުން ރަނގަޅު.

'46 - ރާއްޖޭގެ ނުރައްކާތެރި ހަމަލާއެއް. ޕެނަލްޓީ އޭރިއާ ތެރެއަށް ވަނުމަށްފަހު، ހަމްޕު ފޮނުވާލި ބާރު ހަމަލާ، ސީރިއާގެ ކީޕަރު އިބްރާހީމް އަލްމާ ވަނީ ހުޝިޔާރުކަމާއެކު މަތަކޮށްފައި.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ ރާއްޖެއިން.

ފުރަތަމަ ހާފުގެ އުސްއަލިތައް:

ފުރަތަމަ ހާފުގެ ކުޅުން ނިންމާލައިފި. ފުރަތަމަ ހާފު ނިމުނު އިރު، 3-0ގެ ނަތީޖާއަކުން ކުރީގައި އޮތީ ސީރިއާ.

'45+ - ޕެނަލްޓީ ކާމިޔާބުކޮށް، ސީރިއާ އިން ތިން ލަނޑުގެ ލީޑެއް ހޯދައިފި. ސީރިއާއަށް އެ ޕެނަލްޓީ ކާމިޔާބުކޮށްދިނީ މަހްމޫދު އަލްމަވާސް. އޭނާގެ ޕެނަލްޓީ އަމާޒުކޮށްލީ ރާއްޖޭގެ ގޯލުގެ މަތީ ކަނަކަށް.

ފުރަތަމަ ހާފުގެ އިތުރު ވަގުތުގެ ގޮތުގައި ތިން މިނެޓުގެ ކުޅުން ދައްކައިފި.

'44 - ސީރިއާއަށް އިތުރު ޕެނަލްޓީއެއް. ސީރިއާއަށް މި ޕެނަލްޓީ ލިބުނީ ސީރިއާގެ މުހައްމަދު އަނީޒް ފޮނުވާލި ހަމަލާ، ޕެނަލްޓީ އޭރިއާ ތެރެއިން ރާއްޖޭގެ ޑިފެންޑަރު ސަމޫހުގެ އަތުގައި ޖެހުމުން.

ކުރިން ފާހަގަވިހެން މި ފެނުނީ ޑިފެންސްގެ ގޯސްތައް. އެ ގޯސްތަކުގެ ބޭނުން ސީރިއާ އިން ހިފާނެ ކަމަށް ކުރިންވެސް ބެލެވުނު. ރާއްޖެއިން ޑިފެންސް ކުރަމުންދިޔައީ ވަރަށް ބޮޑަށް އޯޕެން ކޮށްލައިގެން. ޕެކް ކޮށްލަން އުނދަގޫތަކެއް ދިމާވެގެން ފުލުފުލުގައި ރާއްޖެ ކޮޅަށް ދެ ގޯލު ވަންތަން މި ފެނުނީ.

'38 - ސީރިއާގެ އިތުރު ހަމަލާއެއް. އަލްމަވާސް ނަގައިދިން ހުރަހަކުން ރާއްޖޭގެ ޕެނަލްޓީ އޭރިއާ ތެރޭ ހުރެ ސީރިއާގެ އަލާ އަލްދިން ޔާސިން ދާލީ ބޮލުން ފޮނުވާލި ހަމަލާ، ކީޕަރު ފައިސަލް ވަނީ މަތަކޮށްފައި.

ސީރިއާއަކީ އޭޝިއާ ސަރަހައްދުގެ އެންމެ ވަރުގަދަ އެއް ޓީމު. އެޓީމުގެ ފަރާތުން ފެނިގެން މިދަނީ އެ ކޮލިޓީގެ ކުޅުން. މި ފެންނަނީ ރަނގަޅު ޕާސްތަކަކާއެކު ނުރައްކާކޮށް ކުޅެމުންދާ ތަން. ދިވެހި ޓީމަށް މެޗުގެ ބާކީ ބައިގައި މިފަދަ ގޮތަކަށް ޑިފެންސް ކުރަން ޖެހިއްޖެ ނަމަ މެޗުން މޮޅުވާން އުނދަގޫ ވާނެ. ހާއްސަކޮށް ޑިފެންސިވް މިސްޓޭކްތައް ފެންނަމުންދޭ. ދިވެހި ޓީމުން އެކަންކަން ރަނގަޅު ކުރަން ޖެހޭ.

'33 - ސީރިއާއަށް ލިބުނު ޕެނަލްޓީ ކާމިޔާބުކޮށް، ދެ ގޯލުގެ ލީޑެއް ހޯދައިފި. ސީރިއާގެ ޕެނަލްޓީ ކާމިޔާބުކޮށްދިނީ އައީސް އޮސްމާން.

'32 - ސީރިއާއަށް ޕެނަލްޓީއެއް. ސީރިއާއަށް އެ ޕެނަލްޓީ ލިބުނީ ރާއްޖޭގެ ޕެނަލްޓީ އޭރިއާ ތެރެއިން އަލާ އަލްދިން ޔާސިން ދާލީއަށް ކެޕްޓަން އަކޫ ކުރި ފައުލަކާ ގުޅިގެން.

'28 - ސީރިއާ އިން ގޯލެއް ޖަހައި، ލީޑު ހޯދައިފި. އަރިމަތިން ތައީރު ކުރޫމާ ދިން ބޯޅައަކުން ސީރިއާއަށް އެ ގޯލު ކާމިޔާބުކޮށްދިނީ މަހްމޫދު އަލްމަވާސް. އޭނާއަށް ރާއްޖޭގެ ޕެނަލްޓީ އޭރިއާ ތެރެއިން ބޯޅަ ލިބުނު އިރު، އޭނާ ހުރީ ވަރަށް ހުސްކޮށް. އޭނާ ބޯޅަ އަމާޒުކޮށްލީ ގޯލުގެ ކަނަކަށް.

'26 - ސީރިއާއަށް އިތުރު ފުރުސަތެއް. ރާއްޖޭގެ ޕެނަލްޓީ އޭރިއާ ތެރެއިން ސީރިއާގެ އައީސް އޮސްމާން ފޮނުވާލި ހަމަލާ ދިޔައީ ގޯލާ އަމާޒު ނުވެ ބޭރަށް.

'24 - ސީރިއާއަށް ހުސް ފުރުސަތެއް. ރާއްޖޭގެ ކުޅުންތެރިން އަތުން ގެއްލުނު ބޯޅައެއް ހިފައިގެން ސީރިއާގެ އަލްމަވާސް ހުސްކޮށް ހުރެ ޕެނަލްޓީ އޭރިއާ ތެރެއަށް ވަނުމަށްފަހު، ކީޕަރު ފައިސަލް ކަޓުވާލައި ހުސް ގޯލަށް ފޮނުވާލި ނަމަވެސް، ގޯލުގެ ލައިން މަތިން ކެޕްޓަން އަކޫ ވަނީ އެ ބޯޅަ ދިފާއުކޮށްފައި.

21' ރާއްޖޭގެ ޑިފެންސްގެ އިތުރު ގޯހެއް. ރާއްޖޭގެ ކުޅުންތެރިން އަތުން ގެއްލުނު ބޯޅަ ހިފައިގެން ސީރިއާގެ އަލްމަވާސް ރާއްޖޭގެ ޕެނަލްޓީ އޭރިއާ ތެރެއަށް ވަން ނަމަވެސް، ނުރައްކާ ކުރެވިފައެއް ނުވޭ.

'19 - ސީރިއާއަށް ހުސް ފުރުސަތެއް. ކީޕަރު ފައިސަލްއަށް ހެދުނު ގޯހެއްގެ ފައިދާ ނަގައި، ރާއްޖޭގެ ޕެނަލްޓީ އޭރިއާ ތެރޭ ހުރެފައި ސީރިއާގެ އައީސް އޮސްމާން ފޮނުވާލި ހަމަލާ، ކީޕަރު ފައިސަލް ވަނީ މަތަކޮށްފައި.

'18 - ރާއްޖޭގެ އުމައިރު ބޯޅަ ހިފައިގެން ސީރިއާގެ ޕެނަލްޓީ އޭރިއާ ތެރެއަށް ވަން ނަމަވެސް، އޭނާއަށް ރަނގަޅަށް ހުރަސް ނަގައިދެވިފައެއް ނުވޭ.

'14- ސީރިއާގެ ހަމަލާއެއް. އަރިމަތިން ޕެނަލްޓީ އޭރިއާ ތެރެއަށް ވަނުމަށްފަހު، ހުސައިން އަލް ވައީދު ފޮނުވާލި ހަމަލާ، ރާއްޖޭގެ ކީޕަރު ފައިސަލް ވަނީ މަތަކޮށްފައި.

ރާއްޖޭގެ ޓީމުގެ ފަރާތުން ފެނިގެންދަނީ ވަރުގަދަ ޑިފެންސިވް ކުޅުމެއް. ޑިފެންސްގައި ޓީމުގެ ހުރިހާ ކުޅުންތެރިން ބައިވެރިވަމުން އަންކަން ފާހަގަކުރެވޭ.

'12 - ސީރިއާއަށް ހުސް ފުރުސަތެއް. ކޯނަރަކުން ހުސްކޮށް ހުރެ ސީރިއާގެ މިދާނީ ބޮލުން ފޮނުވާލި ހަމަލާ ދިޔައީ ރާއްޖޭގެ ގޯލުގެ އަރިމަތީ ދަނޑިކައިރިން ބޭރަށް.

އަރިމަތިން ކުޅެ، ހުރަސްތަކެއް ނެގުމަށް ސީރިއާ އިން މަސައްކަތްކުރަމުންދިޔަ ނަމަވެސް، ރާއްޖޭގެ ޕެނަލްޓީ އޭރިއާ ތެރެއަށް ރަނގަޅު ހުރަހެއް ނަގައިދެވިފައެއް ނުވޭ.

9' ރާއްޖޭގެ ޕެނަލްޓީ އޭރިއާ ތެރެއިން ސަމޫހުއަށް ސީރިއާގެ އަލްމަވާސް ކުރި ފައުލަކާ ގުޅިގެން ރާއްޖެއަށް ހިލޭ ޖެހުމެއް.

މެޗުގައި ރާއްޖޭގެ ގޯލު ބަލަހައްޓަމުން އަންނަނީ ސާފް ޗެމްޕިއަންޝިޕް 2018ގެ އެންމެ މޮޅު ކުޅުންތެރިޔާ ފައިސަލް. އަދި އޭނާގެ ކުރިން ފެނިގެންދަނީ އެ މުބާރާތް ރާއްޖެއަށް ހޯދައިދިން ކެޕްޓަން އަކޫ.

މެޗުގެ ފުރަތަމަ ފަސް މިނެޓުގެ ކުޅުން ނިމުނު އިރު، ރާއްޖެއަށް ސީރިއާގެ ގޯލަށް ހަމަލާއެއް ފޮނުވައިލެވިފައެއް ނުވޭ. ސީރިއާގެ ފަރާތުން ވެސް އެންމެ އެދެވޭ ކުޅުމެއް ފެނިފައެއް ނުވޭ.

'4 - ސީރިއާގެ ނުރައްކާތެރި ހަމަލާއެއް. އަލާ އަލްދިން ޔާސިން ދާލީ ދުރުން ފޮނުވާލި ބާރު ހަމަލާ، ރާއްޖޭގެ ކީޕަރު ފައިސަލް ވަނީ މަތަކޮށްފައި.

'2 - ސީރިއާގެ ހަމަލާއެއް. ރާއްޖޭގެ ޕެނަލްޓީ އޭރިއާ ބޭރުން ސީރިއާގެ މުހައްމަދު އަނީޒް ފޮނުވާލި ބާރު ހަމަލާ، އަކްރަމްގެ ފައިގައި ޖެހިފައި ދިޔައީ ކޯނަރަކަށް ބޭރަށް.

މެޗުގެ ކުޅުން ފަށައިފި. ކިކްއޯފް ކުރީ ސީރިއާ އިން.

ޖޮއިންޓް ކޮލިފިކޭޝަންގައި ރާއްޖެއިން ވަނީ 2019 ވަނަ އަހަރު ސީރިއާ ދެކޮޅަށް ނުކުމެފައި. އެ މެޗުވެސް ކުޅުނީ ޑުބާއީގައި. އެ މެޗުގެ 2-1ގެ ނަތީޖާއަކުން ރާއްޖެ ބަލިވި އިރު، މެޗުގައި ރާއްޖެއިން ޖެހި ހަމައެކަނި ގޯލު ކާމިޔާބުކޮށްދިނީ އަލީ އަޝްފާގު (ދަގަނޑޭ).

މެޗަށް ދެ ޓީމު ވެސް ދަނޑަށް އަރައިފި.