ޚަބަރު

ގޭގެއަށް ޒިޔާރަތްކުރުން މަނާކޮށް އިތުރު ހަރުކަށި ފިޔަވަޅުތަކާއެކު އައްޑޫ ސިޓީ ލޮކްޑައުންއަކަށް

ރިފާ ހަލީލު

އައްޑޫ އިކުއިޓޯރިއަލް ހޮސްޕިޓަލް (އޭއީއެޗް)ގެ ފްލޫ ކްލިނިކަށް ދެއްކި މީހަކު ކޮވިޑް-19 އަށް ޕޮޒިޓިވް ވެ މުޅި އައްޑޫ ސިޓީ މޮނިޓަރިން އަށް ލުމާ ގުޅިގެން އެ ސިޓީގައި ގޭގެއަށް ޒިޔާރަތް ކުރުން މަނާކޮށް ހަރުކަށި ފިޔަވަޅުތަކެއް އަޅަން ނިންމައިފި އެވެ.

އައްޑު ސިޓީގެ ގުޅިފައިވާ ރަށްތައް މޮނިޓަރިން އަށް ލާފައިވަނީ އިއްޔެ އެވެ. ނަމަވެސް އޭގެ ކުރިން ވަކިން އޮންނަ ހުޅުމީދޫ އިން ކޮވިޑް-19 އަށް ބަޔަކު ޕޮޒިޓިވް ވުމާ ގުޅިގެން އެރަށްވެސް ވަނީ މޮނިޓަރިން އަށް ލައިފަ އެވެ. އެހެން ކަމުން މިހާރު މުޅި އައްޑޫ ސިޓީ ވަނީ މޮނިޓަރިންގެ ހާލަތުގަ އެވެ.

އައްޑޫ ސިޓީ ކައުންސިލުން މިއަދު ކޮށްފައިވާ އިއުލާނެއްގައި ބުނެފައިވަނީ އައްޑޫގައި މިވަގުތު ކޮމިއުނިޓީ ސްޕްރެޑެއް އޮތްކަމަށް ލަފާ ކުރެވޭތީ، އެންމެހައި ރައްޔިތުންގެ ސަލާމަތާއި ރައްކާތެރިކަމަށްޓަކައި ހެލްތު ޕްރޮޓެކްޝަން އެޖެންސީން އައްޑޫ ސިޓީގެ މޮނިޓަރިން ހާލަތު އުވައިލަންދެން ނުވަތަ ކައުންސިލުން ވަކިގޮތެއް އަންގަންދެން މިވަގުތުން ފެށިގެން ފިޔަވަޅުތަކެއް އަޅަން ނިންމާފައިވާ ކަމަށެވެ.

މޮނިޓަރިން އުވާލަންދެން އައްޑޫގައި އަޅަން ނިންމާފައިވާ ފިޔަވަޅުތައް:

އައްޑޫ ސިޓީގައި އެއް ގެއިން އަނެއް ގެއަށް ޒިޔާރަތް ނުކުރުން.
އައްޑޫ ސިޓީ ތެރޭގައި އެއް ރަށުން އަނެއް ރަށަށް ދަތުރު ނުކުރުން.
އައްޑޫގައި ގާއިމުވެފައިވާ އޮފީސްތައް އާއްމު ހިދުމަތްތަކަށް ބަންދުކޮށް، އޮންލައިންކޮށް ހިދުމަތްދިނުން.
ހެލްތު ޕްރޮޓެކްޝަން އެޖެންސީން އަންގާ އެންގުންތަކާ އެއްގޮތަށް ސެލޫން، ބޯކޮށާ ތަންތަނާއި ޖިމްތަކާއި އަދި ފިހާރަތަކުން ހިދުމަތްދިނުން، އަދި ކަނޑައަޅާފައިވާ އަދަދަށް ފިހާރަތަކަށް މީހުން ވެއްދުމަށް ސަމާލުކަން ދިނުން.
ހުރިހާ ކުޅިވަރުގެ ހަރަކާތްތައް ހުއްޓާލުން.
ޕާޓީތަކާއި، ހަފުލާތަކާއި، ބައްދަލުވުންތައް ކުރިއަށް ނުގެންދިއުން، މީގެ ތެރޭގައި ގިނަ މީހުން އެއްވެގެން ބާއްވާ ރޯދަވީއްލުން ހިމެނޭ.
ޓެކްސީ ހިދުމަތް ފޯރުކޮށްދޭ ނަމަ، ޓެކްސީ ހިދުމަތް ފޯރުކޮށްދިނުމުގައި އެޗްޕީއޭ އިން އެކުލަވާލާފައިވާ ގައިޑްލައިނާ އެއްގޮތަށް ހިދުމަތްދިނުން.
މިސްކިތްތަކަށް ދާއިރު ގެއިން ވުޟޫކޮށްގެން ދިއުމާއި، ނަމާދުކުރުމަށް އަމިއްލަ މުސައްލަ ގެންދިއުމާއި މާސްކް އަޅައިގެން ދިއުމަށް ސަމާލުކަން ދިނުން، އަދި މިސްކިތްތަކުގައި ދަރުސް ޕްރޮގްރާމްތައް ކުރިއަށް ނުގެންދިއުން.
ހެލްތު ޕްރޮޓެކްޝަން އެޖެންސީން އަންގާފައިވާ އެންގުންތަކާ އެއްގޮތަށް ރެސްޓޯރެންޓްތަކާއި ކެފޭތަކާއި ހޮޓާތަކާއި ގާޑިޔާތަކުން ހިދުމަތްދިނުން.

އައްޑޫ ސިޓީ ކައުންސިލުން ބުނީ މި ފިޔަވަޅުތަކާއި ހިލާފުވާ ފަރާތްތަކަށް އޮންނަ އުސޫލުގެ މަތިން ފިޔަވަޅު އަޅާނެ ކަމަށާއި މި ފިޔަވަޅުތަކަކީ އެންމެންގެ ސަލާމަތާއި ރައްކާތެރިކަމަށް އަޅާފައިވާ ފިޔަވަޅުތަކެއް ކަމަށްވުމުން މި ފިޔަވަޅުތަކަށް ސަމާލުކަން ދިނުމަށް އެދޭ ކަމަށެވެ.