ޚަބަރު

ޕޮލިސް ބޯޑުގެ ރައީސަކަށް ފާއިޒު، ނައިބަކަށް ފަޔާޒު

ޕޮލިސް ބޯޑުގެ ރައީސަކަށް ހާއްސަ މަޖިލީހުގެ ބ. އަތޮޅުގެ ކުރީގެ މެމްބަރު އަލީ ފާއިޒު އިންތިހާބުކޮށްފިއެވެ.

ހޯމް މިނިސްޓްރީން މިއަދު ބުނީ، ދިވެހި ފުލުހުންގެ ހިދުމަތުގެ ގާނޫނުގެ (78) ވަނަ މާއްދާގެ ދަށުން ޕޮލިސް ބޯޑުގެ ރައީސްކަމަށް މއ. މަނާގެ، އަލީ ފާއިޒު އަދި އެ ބޯޑުގެ ނާއިބް ރައީސް ކަމަށް މ. ހަޒާރީވިލާ، އަހުމަދު ފަޔާޒް ހަސަން މިއަދު އިންތިހާބު ކޮށްފައިވާ ކަމަށެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ޕޮލިސް ބޯޑު އެކުލަވާލާފައިވަނީ މިމަހުގެ ނުވަ ވަނަ ދުވަހުއެވެ.

ޕޮލިސް ބޯޑުގައި އެކުލެވޭ މެންބަރުން

1. އަހްމަދު ފަޔާޒް ހަސަން، މ.ހަޒާރީވިލާ
2. އާއިޝަތު ނޫރާ މުހައްމަދު، ހ.ނޫމުތީ
3. އަލީ ފާއިޒު، މއ.މަނާގެ
4. އަހްމަދު ނާޝިދު، މއ.ގޯލްޑަންމޫން
5. އާދަމް އިބްރާހީމް، ގ.ޑިމްލައިޓް
6. ހާމިދު އަބްދުލްޣަފޫރު، ހ.ޝޭޑީކޯނަރ
7. ސަފާ ޝަރީފް، ދެތަޑިމާގެ / ސ.ހުޅުދޫ

ޕޮލިސް ބޯޑަކީ ދިވެހި ފުލުހުންގެ ހިދުމަތުގެ ބިލުން އުފައްދަން ޖެހޭ ބޯޑެކެވެ. ފުލުހުންގެ ހިދުމަތުގެ ބިލުގައި ބުނެފައިވަނީ ޕޮލިސް ކޮމިޝަނަރާއި ޑެޕިއުޓީ ކޮމިޝަނަރު އައްޔަން ކުރުމުގައި އެ މަގާމަށް އެކަށޭނެ ފަރާތެއް ވަޒަންކުރުމަށް ކުރަންޖެހޭ އެންމެހައި ކަންތައްތައް ކުރުމަށާއި އެ ގާނޫނުގެ 76 ވަނަ މާއްދާގައި ބަޔާން ކުރާ މަސްއޫލިއްޔަތުތައް އަދާކުރުމަށާއި އެ ގާނޫނުގެ ދަށުން ލަފާ ދޭންޖެހޭ ކަންކަމުގައި ވަޒީރަށާއި ގާނޫނުގައި ލަފާ ދިނުމަށް ކަނޑައަޅާފައިވާ ފަރާތްތަކަށް ލަފާ ދިނުމަށް "ޕޮލިސް ބޯޑު"ގެ ނަމުގައި ހަތް މެންބަރުންގެ މައްޗަށް އެކުލެވޭ ބޯޑެއް ރައީސުލްޖުމްހޫރިއްޔާ އެކުލަވާލަންވާނެ ކަމަށެވެ.

އެ ހަތް މެންބަރުންގެ ތެރެއިން ދެ މެންބަރުންނަކީ އާންމުކޮށް ހުޅުވާލައިގެން އާންމު ރައްޔިތުންގެ ތެރެއިން، ކުރިމަތިލާ ފަރާތްތަކުގެ ތެރެއިން ހޮވާ ދެ މެންބަރުންނަަށް ވާން ވާނެ ކަމަަށް ވެސް ގާނޫނުގައި ބުނެފައިވެއެވެ. އެ ދެ މެންބަރުން އައްޔަން ކުރުމަށް އެކަމަށް އެދި ކުރިމަތިލުމުގެ ފުރުސަތު ހުޅުވާލާނީ ރައްޔިތުންގެ މަޖިލީހުންނެވެ.