ރާއްޖެ އައި ފަތުރުވެރިންގެ އަދަދު 150،000 އިން މައްޗަށް، އެންމެ ގިނަ ފަތުރުވެރިން އައި ގައުމަކަށް އިންޑިއާ

ރާއްޖެއަށް ފަތުރުވެރިން އަންނަ ގައުމުތަކުގެ ލިސްޓުގެ އެންމެ ކުރިއަށް އިންޑިއާ ޖެހިލައިފިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިއަހަރުގެ މިހާތަނަށް އިންޑިއާއިން 32،970 ފަތުރުވެރިން ރާއްޖެއަށް އައިސްފައިވެއެވެ. އެއީ މިއަހަރު ރާއްޖެ އައި ފަތުރުވެރިންގެ 22 އިންސައްތައެވެ.

ލިސްޓުގެ ދެވަނައަށް ވެއްޓުނު ރަޝިއާއިން މިއަހަރު ރާއްޖެއަށް އައީ 32،019 ފަތުރުވެރިންނެވެ.

މިއަހަރު ރާއްޖެއަށް އެންމެ ގިނަ ފަތުރުވެރިން އައި ފަސް ގައުމު:

ތަފާސް ހިސާބުތަކުން ދައްކާ ގޮތުގައި އިއްޔެއާ ހަމައަށް މިއަހަރު ރާއްޖެއަށް 150،000 އަށްވުރެ ގިނަ ފަތުރުވެރިން އައިސްފައިވެއެވެ. މިމަހުގެ ތެރޭގައި އެވްރެޖުކޮށް ދުވާލެއްގެ މައްޗަށް 3،273 ފަތުރުވެރިން ރާއްޖެ އާދެއެވެ.

ކޮވިޑް 19އާ ގުޅިގެން މިދިޔަ އަހަރުގެ މާޗު މަހުގެ ތެރޭގައި ރާއްޖޭގެ ބޯޑަރުތައް ބަންދުކުރުމަށް ފަހު އަލުން ހުޅުވީ ޖުލައި 15 ގައެވެ. މިދިޔަ އަހަރު ރާއްޖެއަށް ޒިޔާރަތްކޮށްފައިވަނީ 555،494 ފަތުރުވެރިންނެވެ. ޓޫރިޒަމް މިނިސްޓްރީގެ މިއަހަރުގެ އަމާޒަކީ 1.5 މިލިއަން ފަތުރުވެރިން ގެނައުމަށެވެ.