ސިޔާސީ ސަބަބަކަށްޓަކައި ފިޔަވަޅު އަޅާފައިވާ މުވައްޒަފުންގެ ޝަކުވާ ހުށަހެޅެމުގެ މުއްދަތު އިތުރުކޮށްފި

ނިމިދިޔަ ސަރުކާރުން ސިޔާސީ ސަބަބަކަށްޓަކައި ވަޒީފާއިން ވަކިކޮށްފައިވާ ނުވަތަ ނުހައްގުން ފިޔަވަޅު އަޅާފައިވާ މުވައްޒަފުންގެ ޝަކުވާތައް ހުށަހެޅުމަށް ކުރިން ހުޅުވާލި މުއްދަތު އިތުރުކޮށްފިއެވެ.

ސިޔާސީ ސަބަބަކަށްޓަކައި ފިޔަވަޅު އަޅާފައިވާ މުވައްޒަފުންގެ ޝަކުވާތައް ފޮނުވުމަށް މިމަހުގެ 21 ވަނަ ދުވަހުގެ 14:00ގެ ނިޔަލަށް ރައީސް އިބްރާހިމް މުހައްމަދު ސޯލިހު ވަނީ އިތުރުކުރައްވައިފައެވެ.

ޝަކުވާ ހުށަހެޅުމުގެ މުއްދަތު އިތުރުކޮށްފައިވަނީ އެ މުއްދަތު އިތުރު ކޮށްދިނުމަށް ގިނަ ފަރާތްތަކަކުން އެދެމުންދާތީ ކަމަށް ރައީސް އޮފީހުން ނެރުނު އިއުލާނެއްގައި ބުނެފައިވެއެވެ. މީގެ ކުރިން އެ ފުރުސަތު ހުޅުވާލާފައިވަނީ 3 ޑިސެންބަރު 2018 އިން ފެށިގެން 30 ދުވަހުގެ މުއްދަތަށެވެ.

ޝަކުވާ ހުށަހަޅާ ފޯމު ރައީސުލްޖުމްހޫރިއްޔާގެ އޮފީހުގެ ރިސެޕްޝަނުންނާއި ރައީސުލްޖުމްހޫރިއްޔާގެ އޮފީހުގެ ވެބްސައިޓް https://presidency.gov.mv އިން ޑައުންލޯޑް ކުރެވެން ހުންނާނެ ކަމަށް ރައީސް އޮފީހުގެ އިއުލާނުގައި ބުނެފައިވެއެވެ.