ކުރީގެ ޓްރާންސްޕޯޓް މިނިސްޓަރު އާއިޝަތު ނަހުލާ

ރައީސް ސޯލިހު ދެއްވާ ހިތްވަރާއި ލަފަޔަށް ފަށްފަށުން ޝުކުރު ދަންނަވަން: ނަހުލާ

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެއްވާ ހިތްވަރާއި ލަފަޔަށް ފަށްފަށުން ޝުކުރު ދަންނަވާ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު އައިޝަތު ނަހުލާ ވިދާޅުވެއްޖެއެވެ.

ގައުމީ އެއާލައިން މޯލްޑިވިއަންގެ އެތެރޭގެ އުދުހުންތަކުގެ އަގު 25-30 އިންސައްތައަށް ހެޔޮކުރިކަން މިއަދު އިއުލާންކުރުމާއެކު ރައީސް ސޯލިހު ވަނީ އެކަން ފުރިހަމަކޮށްދިނުމަށް ކުރެއްވި މަސައްކަތަށް އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އާއި ޓްރާންސްޕޯޓް މިނިސްޓަރު ނަހުލާއަށް ޝުކުރު ދަންނަވައިފައެވެ.

ނަހުލާ ކުރެއްވި ޓުވީޓެއްގައި ވިދާޅުވީ ދިވެހި ލޮބުވެތި ރައްޔިތުން ވައިގެ ދަތުރުފަރު ހެޔޮއަގުގައި ކުރުމުގެ އުފާވެރިކަމާއި އުޖާލާކަމަށް އެދޭ ހާލު ރައީސް ސޯލިހު ދެއްވާ ހިތްވަރާއި ލަފަޔަށް ފަށްފަށުން ޝުކުރު ދަންނަވާ ކަމަށެވެ.

އައިއޭއެސްއެލް އިން އިއުލާންކޮށްފައިވާ އާ އަގުތަކުގައި މިމަހުގެ 10 ވަނަ ދުވަހުން ފެށިގެން އެ ކުންފުނީގެ ޓިކެޓިން އޮފީސްތަކުން އަދި އޭޖެންޓުން މެދުވެރިކޮށް ޓިކެޓު ވިއްކަމުންދާނެ ކަމަށް އެ ކުންފުނިން ބުނެއެވެ.

މޯލްޑިވިއަންގެ އެތެރޭގެ އުދުހުންތަކުގެ އަގުތަކަށް ގެނެވުނު ބަދަލު (ޓެކްސްއާއި ޖީއެސްޓީ ހިމަނައިގެން):

މާލެ - ހަނިމާދޫ - މާލެ: 1،610 ރުފިޔާއާއި 2،226 ރުފިޔާއާ ދެމެދު
މާލެ - އިފުރު - މާލެ: 1،500 ރުފިޔާއާއި 2،056 ރުފިޔާއާ ދެމެދު
މާލެ - ދަރަވަންދޫ - މާލެ: 1،098 ރުފިޔާއާއި 1،562 ރުފިޔާއާ ދެމެދު
މާލެ - ކުޑަހުވަދޫ - މާލެ: 1،500 ރުފިޔާއާއި 2،056 ރުފިޔާއާ ދެމެދު
މާލެ - ތިމަރަފުށި - މާލެ: 1،610 ރުފިޔާއާއި 2،226 ރުފިޔާއާ ދެމެދު
މާލެ - ކައްދޫ - މާލެ: 1،610 ރުފިޔާއާއި 2،226 ރުފިޔާއާ ދެމެދު
މާލެ - ކޫއްޑޫ - މާލެ: 1،652 ރުފިޔާއާއި 2،442 ރުފިޔާއާ ދެމެދު
މާލެ - ކާޑެއްދޫ - މާލެ: 1،652 ރުފިޔާއާއި 2،442 ރުފިޔާއާ ދެމެދު
މާލެ - ފުވައްމުލައް - މާލެ: 1،698 ރުފިޔާއާއި 2،598 ރުފިޔާއާ ދެމެދު
މާލެ - ގަން - މާލެ: 1،698 ރުފިޔާއާއި 2،666 ރުފިޔާއާ ދެމެދު