ޚަބަރު

ވިޔަފާރިތަކާއި ކާބޯތަކެތި ޑެލިވަރީ ކުރާ ފަރާތްތަކުން ނަގަންޖެހޭ ހުއްދަ ސްޓިކާ ލިބޭނެ ތަންތަން އާންމުކޮށްފި

އައިދާ އަބްދުލް ހަކީމް

ވިޔަފާރިތަކާއި ކާބޯތަކެތި ޑެލިވަރީ ކުރާ ފަރާތްތަކުން ނަގަންޖެހޭ ހުއްދަ ސްޓިކާ ލިބޭނެ ތަންތަން ފުލުހުން އާންމުކޮށްފި އެވެ.

ކޮވިޑް 19 އާ ގުޅިގެން ވަކި ގަޑިތަކެއްގައި ހެލްތު ޕްރޮޓެކްޝަން އޭޖެންސީ(އެޗްޕީއޭ) އިން ކާފިއު އިއުލާނުކޮށް އަދި މިއަދު މެންދުރު 12ގެ ފަހުން، ކާފިއުގެ ވަގުތުގައި ނޫނަސް އެއްފަހަރާ ތިންމީހުނަށްވުރެ ގިނައިން ބޭރުގައި އުޅުން މަނާ ކޮށްފައިވާތީ ވިޔަފާރިތަކާއި ކާބޯތަކެތި ޑެލިވަރީ ކުރާ ފަރާތްތަކުން ނަގަންޖެހެއެވެ.

ފުލުހުން ބުނީ އެ ހުއްދަ ސްޓިކާ މާލޭ ޓޯޔާޑް 9790121، ވިލިމާލެ ޕޮލިސް ސްޓޭޝަން 9790083 އަދި ހުޅުމާލެ 4000007 އަށް ގުޅުމުން ލިބޭނެ އިންތިޒާމު ހަމަޖައްސާފައިވާކަމަށެވެ.

ފުލުހުން ބުނެފައިވަނީ އެޗްޕީއޭގެ އެންގުމާއި ހިލާފުވާ ފަރާތްތައް 1000 ރުފިޔާއިން ޖޫރިމަނާ ކުރާނެކަމަށެވެ.

މާލޭ ސަރަހައްދަށް މިއަދުން ފެށިގެން ކޮންމެ ދުވަހަކު ތިން ގަޑިއިރަށް ކާފިއު އިއުލާނު ކުރިނަމަވެސް ބައެއް ފަރާތްތަކާއި، އުޅަނދުފަހަރު ދުއްވުން ހުއްދަކުރުމަށް ވަނީ ނިންމާފައެވެ.

އިސްތިސްނާ ފަރާތްތަކާއި އުޅަނދުތައް:

ސަލާމަތީ ބާރުތަކާއި ގާނޫނު ތަންފީޒުކުރާ އިދާރާތަކުގެ ޑިއުޓީ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު.
ސިއްހީ ހިދުމަތްދޭ އިދާރާތަކުގެ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު.
ވެމްކޯގެ ޔުނީފޯމު އެޅި މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު.
އުރީދޫ، ދިރާގު، ބޭންކްތައް، އެސްޓީއޯ، ސްޓެލްކޯ، އެމްޑަބްލިޔުއެސްސީގެ ޔުނީފޯމު އެޅި ޑިއުޓީ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު
ދައުލަތުގެ (ޖީ ބޯޑު) ހަރުކޮށްފައިވާ އުޅަނދުފަހަރު
ޑިޕްލޮމެޓިކް އުޅަނދުފަހަރު.
އެމްބިއުލަންސް.
އެންއީއޯސީގެ ފާސް ލިބިފައިވާ ފަރާތްތައް.
ފާމަސީތަކުގެ މުވައްޒަފުންނާއި އެ މުވައްޒަފުން ދުއްްވާ އުޅަނދުފަހަރު.
އެޗްޕީއޭއިން ދޫކުރާ ހާއްސަ ސްޓިކާ ޖަހައިފައިވާ އުޅަނދުތައް.