ޚަބަރު

އިސްލާމީ ޔުނިވާސިޓީއަށް ޑީނުން އައްޔަންކޮށްފި

އާނިފާ ހުސެއިން ސިރާޖް

ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް)ގެ ފެކަލްޓީތަކަށް އާ ޑީނުން އައްޔަން ކޮށްފިއެވެ.

މިއަދު އެ ޔުނިވާސިޓީގައި ބޭއްވި ރަސްމިއްޔާތެއްގައި ފެކަލްޓީތަކަށް ޑީނުން އައްޔަންކޮށް ވަނީ ފަތްކޮޅު ހަވާލުކޮށްފައެވެ. ފެކަލްޓީތަކަށް އާ ޑީނުން އައްޔަން ކުރީ ކުރިން އެ މަގާމުގައި ތިއްބެވި ބޭފުޅުންގެ ދައުރު ހަމަވުމާއި ގުޅިގެންނެވެ.

މިއަދު އައްޔަންކޮށްފައިވާ ޑީނުންނާއި އެބޭފުޅުން އައްޔަނުކުރި ފެކަލްޓީތައް:
1. ސެންޓާ ފޯ ޕޯސްޓްގުރެޖުއޭޓް ސްޓަޑީޒްގެ ޑީން، ޑރ. އަބްދުﷲ ޖަމީލް
2. ސެންޓާ ފޯ ރިސާޗް އެންޑް ޕަބްލިކޭޝަންގެ ޑީން، ޑރ. އިސްމާއީލް ޝަފީއު
3. ކުއްލިއްޔާ އޮފް އެރަބިކް ލެންގުވޭޖްގެ ޑީން، އިސްހާޤު މުހައްމަދުފުޅު
4. ކުއްލިއްޔާ އޮފް އެޑިޔުކޭޝަންގެ ޑީން، ޑރ. އާއިޝަތު ރީޝާ
5. ކުއްލިއްޔާ އޮފް އިސްލާމިކް ރިވީލްޑް ނޮލެޖް އެންޑް ހިއުމަން ސައިންސަސްގެ ޑީން، އަހުމަދު ސަލީމް ހުސައިން
6. ކުއްލިއްޔާ އޮފް ޝަރީއާ އެންޑް ލޯގެ ޑީން، މުހައްމަދު ޝުޖާއު އަބްދުލްހަކީމް

މި ބޭފުޅުންނަކީ، އެ މަގާމުތަކަށް އާންމުކޮށް ކުރިމަތިލުމަށް ޔުނިވާސިޓީން ކުރި އިއުލާނާ ގުޅިގެން ކުރިމަތިލެއްވި ފަރާތްތަކުގެ ތެރެއިން ޝަރުތު ހަމަވާ ފަރާތްތަކުގެ މެދުގައި އިންޓަވިއު ކުރުމަށްފަހު ޔުނިވާސިޓީގެ މަޖިލީހުން އައްޔަން ކުރެއްވި ބޭފުޅުންނެވެ. މި ބޭފުޅުން އައްޔަންކޮށްފައިވަނީ ހަތަރު އަހަރުގެ މުއްދަތަކަށެވެ.

މިއަދު ފަތްކޮޅު ހަވާލުކުރެވުނު ޑީނުންގެ ތެރެއިން ޑރ. އާއިޝަތު ރީޝާ އާއި އިސްހާގު މުހައްމަދުފުޅާއި އަހުމަދު ސަލީމް ހުސައިން އަދި މުހައްމަދު ޝުޖާއު އަބްދުލްހަކީމަކީ ކުރިން ވެސް ޑީންކަމުގެ މަގާމުގައި ތިއްބަވާ އަލުން އެ މަގާމަށް ހޮވިވަޑައިގެންނެވި ބޭފުޅުންނެވެ.