ހަރުކަށި ފިކުރުގެ މީހުން ދެނެގަންނާނެ ގޮތް ކަނޑައަޅައިފި

ހަރުކަށި ފިކުރުގެ މީހުން ދެނެގަންނާނެ ގޮތް ނެޝަނަލް ކައުންޓާ ޓެރަރިޒަމް ސެންޓަރު (އެންސީޓީސީ) އިން ކަނޑައަޅައިފިއެވެ.

ހަރުކަށި ފިކުރު މާނަކުރާގޮތް އާންމުކޮށް އެންސީޓީސީން މިއަދު ނެރުނު ބަޔާނެއްގައި ބުނެފައިވަނީ ހަރުކަށި ފިކުރަކީ ގާނޫނު އަސާސީގެ ރޫހާއި، ގާނޫނީ ހަމަތަކާއި، އާންމު އިޖްތިމާއީ އުސޫލުތަކަށް ބަހާއި އަމަލުން އިންކާރުކޮށް، އެކަންކަމާ ދެކޮޅަށް ވަކާލާތުކުރުމުގައި ހަރުކަށިވެ، އަނިޔާވެރިވުމާއި އިހާނެތިކޮށް ހިތުމުގެ ފިކުރު ކަމަށެވެ.

އެގޮތުން ހަރުކަށި ފިކުރަކީ، އެތަނެއްގެ ސަގާފަތާއި، ޒަމާންވީ އާދަކާދަތަކާއި ހަމަތަކާއި އުސޫލުތަކުގެ މައްޗަށް ބިނާވެގެންވާ ސާފުސީދާ މަގުން އެއްކިބާވެ އަދި، އެތަނެއްގައި އޮންނަ ގާނޫނާއި ގަވާއިދުތަކާއި، އުސޫލުތަކުގެ އިންތަކުން ބޭރުވެތިބެ، އެބައެއްގެ ފިކުރަށް ތަބާވާ މީހުން ފިޔަވައި އެހެން މުސްލިމުންނަކީ މުސްލިމުން ނޫން ކަމަށްބުނެ އެގޮތަށް ދެއްކުމަށް މަސައްކަތް ކުރާ މީހުން ކަމަށްވެސް އެންސީޓީސީގެ ބަޔާނުގައި ބުނެފައިވެއެވެ.

އޭގެ އިތުރުން، ރައްޔިތުންގެ މުދަލުން ވައްކަން ކުރުމާއި ފޭރުން އެއީ ހުއްދަކަމެއް ކަމުގައި ބުނެ އެކަމަށް ވަކާލާތުކޮށް، މީސްތަކުންނަށް އިހާނެތިކޮށް ހިތައި އަނިޔާވެރިވެ، މީހުންގެ ފުރާނައާއި މުދަލަށް ގެއްލުން ދިނުމަކީ ލާޒިމު ކަމެއްކަމަށް ދައްކުވައިދީ، އެކަންކަން އެގޮތަށް ކުރުމަށް ހިތްވަރުދީ އެކަންކަން އެގޮތަށް ކުރުމުގެ ފިކުރަކީވެސް ހަރުކަށި ފިކުރު ކަމަށް ބަޔާނުގައި ބުނެފައިވެއެވެ.

އެންސީޓީސީގެ ބަޔާނުގައި ކަނޑައަޅާފައިވާ ހަރުކަށި ފިކުރުގެ މީހުން ދެނެގަންނާނެ ގޮތް:

އެގޮތުން، ގައުމީ ދިދައާއި ދައުލަތުގެ ނިޝާނާއި ގައުމީ ސަލާމް ބަލައި ނުގަތުމާއި، ސުކޫލުތަކުގެ ގައުމީ ތައުލީމީ މަންހަޒުތައް ބަލައިނުގަތުމާއި، ދަރިވަރުން ސުކޫލަށް ހާޒިރުނުކުރުމާއި، މި ފިކުރަށް މަގުފަހިވާ ގޮތަށް ވަކާލާތުކުރާ މީހުންނަކީ ހަރުކަށި ފިކުރުގެ މީހުން ކަމަށް ބުނެފައިވެއެވެ.

އަދި ބައިނަލްއަގުވާމީ ސިއްހީ މިންގަނޑުތަކުން ކުދިން މަހުރޫމު ކުރުވުމާއި، ދިވެހިރާއްޖޭގެ އަންނަން އޮތް ޖީލަށް ނުރައްކާވާ ފަދަ ފަނާކުރަނިވި ވިސްނުން ކުރިއަރުވައި ފެތުރުމުގެ އިތުރުން، އިންސާނީ ހައްގުތަކަށް ބެލުމެއްނެތި އަންހެނުންނާއި ކުޑަކުދިން ނިކަމެތިކޮށް ކައިވެނި ކުރުވިކަމަށް ބުނެ ތުއްތުކުދިންނަށް ޖިންސީ ގޯނާކުރުމަކީވެސް ހަރުކަށި ފިކުރު ކަމަށްވެސް އެންސީޓީސީގެ ބަޔާނުގައި ބުނެފައިވެއެވެ.