އިބްރާހިމް މުހައްމަދު ސޯލިހު ރައީސްކަމުގެ ހުވާކުރެއްވުން

ރައީސާއި ނައިބު ރައީސް ހުވާކުރެއްވުމަށް ބޭއްވި ރައްޔިތުންގެ މަޖިލީހުގެ ޖަލްސާ ނިންމާލައިފި.

ސިފައިންނާއި ފުލުހުންގެ އިދާރާއަކީ ރައްޔިތުން އިތުބާރުކުރާ ގަދަރުވެރި ދެ މުއައްސާސައަށް ހަދާނަން: ރައީސް ސޯލިހު

ރާއްޖެއާ އެކުވެރިކަމުގެ ގުޅުން ބަދަހިކުރަން ބޭނުންވާ ހުރިހާ ގައުމުތަކާ އަޅުގަނޑުމެން ގުޅުން ބަދަހިކުރާނަން: ރައީސް ސޯލިހު

ފުރަތަމަ 100 ދުވަހުގައި އަޅުގަނޑުގެ ސަރުކާރުން ކުރާނެ ކަންތައްތައް މިއަދު ހާމަކުރާނަން: ރައީސް ސޯލިހު

ދިވެހި ރައްޔިތުންގެ ހައްގުތައް ރައްކާތެރިކުރުމަށްޓަކައި އަޅުގަނޑު އަޅަން ފަސްޖެހޭނެ ފިޔަވަޅެއް ނޯންނާނެ: ރައީސް ސޯލިހު

ގާނޫނުގެ ރައްކާތެރިކަން އަޅުގަނޑު ކަށަވަރުކޮށްދޭނަން: ރައީސް ސޯލިހު

ދައުލަތުގެ މުއައްސަސާތަކުން ކުރާ މަސައްކަތްތަކަކީ ދެފުށް ފެންނަ މަސައްކަތްތަތަކަށް ހަދަން އެބަޖެހޭ: ރައީސް ސޯލިހު

ނިގުޅައިގެންފައިވާ ހައްގުތައް ރައްޔިތުންނަށް ހޯދައިދޭން އެބަޖެހޭ، ދިވެހި ހަޒާނާއިން ގެއްލިފައިވާ ފައިސާ ދިވެހިންނަށް ހޯދައިދޭން އެބަޖެހޭ، ގެއްލުވާލާފައިވާ މީހުންގެ ހަގީގަތް ހޯދައި، ރައްޔިތުންނަށް ހާމަކޮށްދޭން ޖެހޭ: ރައީސް ސޯލިހު

ދައުލަތުގެ މާލީ ހާލަތު މި ހާލަތުގައި އޮތް ނަމަވެސް، ރައްޔިތުންނަށް ހިދުމަތްތައް ފޯރުކޮށްދެމުން ދާނަން: ރައީސް ސޯލިހު

ހިޔާނާތާއި ކޮރަޕްޝަންގެ އަމަލުތަކުގެ ސަބަބުން ދައުލަތުން އެތައް ބިލިއަން ރުފިޔާއެއް ވަނީ ގެއްލިފައި، އެ ގެއްލިފައިވާ ފައިސާގެ އަދަދު އަދިވެސް ސާފެއް ނުވޭ: ރައީސް ސޯލިހު

ފަނޑިޔާރުންނަށް ނުފޫޒެއް ނެތި ޝަރީއަތްތައް ހިންގޭނެ މަގެއް ހޯދައިދޭން ޖެހޭ: ރައީސް ސޯލިހު

އަޅުގަނޑުގެ ސަރުކާރުގައި އެއްވެސް ރައްޔިތަކު ބާކީވެގެންނެއް ނުދާނެ: ރައީސް ސޯލިހު

މިއުފެދޭޭ ސަރުކާރުން ރައްޔިތުންނަށް ހިދުމަތް ފޯރުކޮށްދިނުމުގައި ނަސްލަށް، ކުލައަށް، ޖިންސަން، ނަފްސާނީ ނުކުޅެދުންތެރިކަމަކަށް، މާލީ ފުދުންތެރިކަމަކަށް، އުފަން ރަށަކަށް ނުވަތަ އެ ނޫން ވެސް ކަމަކަށް ބަލައިގެންނެއް ނޫން: ރައީސް ސޯލިހު

ކުރިއަށްއޮތް ތަނުގައި ރައްޔިތުންނަށް ފެންނާނީ ޖަވާބުދާރީވާ ސަރުކާރެއް: ރައީސް ސޯލިހު

އަޅުގަނޑު ވެފައިވާ ވައުދުތަކެއް ހަނދާން ނައްތައެއް ނުލާނަން: ރައީސް ސޯލިހު

ރައްޔިތުން ވޯޓުދެއްވީ އިންސާފުގެ މަގަށް މިގައުމު ގެންދަން، ހަމަހަމަ ވެއްޓެއް ގާއިމުކުރުމަށް، ކޮރަޕްޝަން ނައްތާލުމަށް، އަސާސީ ހިދުމަތްތައް ފޯރުކޮށްދިނުމަށް: ރައީސް ސޯލިހު

އުންމީދުތައް ހާސިލްކޮށްދިނުމަށްޓަކައި އެއްވެސް ރައްޔިތަކު ތަފާތުކުރުމެއްނެތި ހިދުމަތްކޮށްދިނުމުގައި ދެމިހުންނާނަން: ރައީސް ސޯލިހު

ﷲގެ ވާގިފުޅާއެކު ކުރި ހުވަޔާ އެއްގޮތަށް ދެމި އޮންނާނެ ކަމުގެ ޔަގީންކަން ދިވެހި ރައްޔިތުންނަށް އަރުވަން: ރައީސް ސޯލިހު

ފައިސަލް ނަސީމު ރައީސުލްޖުމްހޫރިއްޔާގެ ނައިބުގެ މަގާމުގެ ހުވާކުރައްވައިފި. ހުވާލައިދެއްވާނީ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ.

އިބްރާހިމް މުހައްމަދު ސޯލިހު ރައީސުލްޖުމްހޫރިއްޔާ ކަމުގެ ހުވާކުރައްވައިފި. ހުވާލައިދެއްވާނީ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ.

ރައީސާއި ނައިބު ރައީސް ހުވާކުރެއްވުމަށް ބާއްވާ ރައްޔިތުންގެ މަޖިލީހުގެ ޖަލްސާ ފަށައިފި. ރިޔާސަތުގައި އިންނެވީ މަޖިލީހުގެ ރައީސް ގާސިމް އިބްރާހިމް. އެ ޖަލްސާގައި ހާޒިރުވެވަޑައިގަންނެވީ 66 މެމްބަރުން.

އެ ޖަލްސާގައި ރައީސާއި ނައިބު ރައީސަށް ހުވާލައިދެއްވާނީ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ.

ރައީސްކަމުގެ ހުވާކުރެއްވުމުގެ ރަސްމިއްޔާތަށް އިންތިހާބީ ރައީސް އިބްރާހިމް މުހައްމަދު ސޯލިހު ގަލޮޅު ދަނޑަށް ވަޑައިގެންފި. އެމަނިކުފާނުގެ އަރިހުގައި އަނބިކަނބަލުން ފަޒްނާ އަހްމަދު ވެސް ވަޑައިގެންނެވި. އިބްރާހިމް މުހައްމަދު ސޯލިހު ގަލޮޅު ދަނޑަށް ވަޑައިގެންނެވީ ރަސްމީ އިއްޒަތުގައި.

ސްރީލަންކާގެ ކުރީގެ ރައީސާ ޗަންދްރިކާ ބަންޑާރަނައިކޭ ކުމާރަތުންގާ ޖަލްސާއަށް ވަޑައިގެންފި.

ހުވާކުރެއްވުމަށް ބާއްވާ ޖަލްސާއަށް އިންތިހާބީ ރައީސް ފައިސަލް ނަސީމް ވެސް ވަޑައިގެންފި.

އިބްރާހިމް މުހައްމަދު ސޯލިހު ހުވާކުރެއްވުމަށް ބާއްވާ ޖަލްސާއަށް އިންޑިއާގެ ބޮޑުވަޒީރު ނަރެންދްރަ މޯދީ، ގަލޮޅު ދަނޑަށް ވަޑައިގެންފި.

އެމްޑީއޭގެ ލީޑަރު އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ރަސްމިއްޔާތަށް ވަޑައިގެންފި. އޭގެ އިތުރުން ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވެސް ވަނީ ވަޑައިގެންފައި.

އިބްރާހިމް މުހައްމަދު ސޯލިހު ރައީސްކަމުގެ ހުވާކުރެއްވުމުގެ ރަސްމިއްޔާތަށް ރައީސް އަބްދުﷲ ޔާމީން އަބްދުލްޤައްޔޫމްގެ ސަރުކާރުގެ ފުރަތަމަ ނައިބު ރައީސް ޑރ. މުހައްމަދު ޖަމީލް އަހްމަދު ވެސް ވަނީ ވަޑައިގަންނަވާފައި.

އިންތިހާބީ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ކެބިނެޓުގައި މަސައްކަތްކުރައްވާނެ ބޭފުޅުން މަގާމަށް އައްޔަން ކުރެއްވުން މިރޭ އޮންނާނެ ކަމަށް ރައީސް އޮފީހުން ވަނީ ބުނެފައި. ނަމަވެސް އިބްރާހީމް މުހައްމަދު ސޯލިހުގެ ސަރުކާރުގެ ކެބިނެޓް އަދި އިއުލާންކުރައްވައިފައެއް ނުވޭ.

އިންޑިއާގެ ބޮޑުވަޒީރު ނަރެންދްރަ މޯދީއަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ ރައްޔިތުންގެ މަޖިލީހުގެ ރައީސް ގާސިމް އިބްރާހީމާއި ހެންވޭރު އުތުރު ދާއިރާގެ މެމްބަރު ކަމުން އަބްދުﷲ ޝާހިދު. ޝާހިދަކީ އިބްރާހިމް މުހައްމަދު ސޯލިހުގެ ކެބިނެޓުގައި ހިމެނިވަޑައިގަންނަވާނެ ބޭފުޅެއް ކަމަށް ބެލެވޭ.

ރައީސާއި ނައިބު ރައީސް ހުވާކުރެއްވުމަށް ބާއްވާ ރައްޔިތުންގެ މަޖިލީހުގެ އެޖެންޑާގައި ފުރަތަމަ ކުރިއަށްދާނީ ރައީސުލްޖުމްހޫރިއްޔާ ކަމުގެ މަގާމަށް އިންތިހާބުވެވަޑައިގެންފައިވާ އިބްރާހިމް މުހައްމަދު ސޯލިހު ރައީސުލްޖުމްހޫރިއްޔާ ކަމުގެ ހުވާކުރައްވައި، ހުވައިގެ އިގުރާރުގައި ސޮއިކުރެއްވުން.

އެއަށްފަހު ކުރިއަށްދާނީ ރައީސުލްޖުމްހޫރިއްޔާގެ ނައިބު ކަމުގެ މަގާމަށް ކަނޑައަޅުއްވާފައިވާ ފައިސަލް ނަސީމް ރައީސުލްޖުމްހޫރިއްޔާގެ ނައިބު ކަމުގެ މަގާމުގެ ހުވާ ކުރައްވައި، ހުވައިގެ އިގުރާރުގައި ސޮއިކުރެއްވުން.

އަދި ޖަލްސާ ނިންމުމުގެ ކުރިން ރައީސުލްޖުމްހޫރިއްޔާ ކަމުގެ މަގާމަށް އިންތިހާބުވެވަޑައިގެންފައިވާ އިބްރާހިމް މުހައްމަދު ސޯލިހު ވާހަކަފުޅު ދެއްކެވުމަށް ހަމަޖެހިފައިވޭ.

އިބްރާހިމް މުހައްމަދު ސޯލިހު ރައީސްކަމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެ ވަޑައިގެންފި.