ރައްޔިތުންގެ ހުރި މައިގަނޑު ކަންބޮޑުވުންތައް އަންނަ އަހަރުގެ ބަޖެޓުން ހައްލުވާނެ: ރައީސް

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށާހެޅި ބަޖެޓުން ރައްޔިތުންގެ ހުރި މައިގަނޑު ކަންބޮޑުވުންތައް ހައްލުވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސް ރޭ ކުރެއްވި ޓުވީޓެއްގައި ވިދާޅުވީ، 2020 އަހަރުގެ ދައުލަތުގެ ބަޖެޓުގައި ކުރިއަށް ނެރެފައިވާނީ ރައްޔިތުން ކަމަށެވެ.

އެގޮތުން ސިއްހީ ދާއިރާ، ތައުލީމީ ދާއިރާ، ފެނާއި ނަރުދަމާގެ ހިދުމަތް އަދި އިޖްތިމާއީ ރައްކާތެރިކަމުގެ އިތުރުން ލާމަރުކަޒީ ވެރިކަމަކީ ރައްޔިތުންގެ ހުރި މައިގަނޑު ކަންބޮޑުވުންތައް ކަން ފާހަގަކުރައްވާ ރައީސް ވިދާޅުވީ، އެކަންކަން ހައްލުވެ ސަރުކާރުން ތަސައްވަރުކުރާ ފާގަތި ރާއްޖެ ހާސިލުވާނެ ކަމަށެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ސަރުކާރުގެ ފަރާތުން ހުށަހެޅީ 37.504 ބިލިއަން ރުފިޔާގެ ބަޖެޓެކެވެ.

ބަޖެޓް ހުށަހަޅުއްވައި ދެއްވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ، 2020 ވަނަ އަހަރުގެ ބަޖެޓަކީ އެންމެހާ ރައްޔިތުންނަށް ގަދަރުވެރި ދިރިއުޅުމެއް ހޯދައި ދިނުމަށް މަގުފަހިކޮށްދޭނެ، ރައްޔިތުންނަށް ބުރަ ބޮޑު ނުވާނެ ގޮތަށް ހުށަހަޅާފައިވާ ބަޖެޓެއް ކަމަށެވެ.

އަންނަ އަހަރުގެ ބަޖެޓުގެ ޖުމުލަ ހަރަދަކީ، 35،600 ބިލިއަން ރުފިޔާ އެވެ. އެހެން ކަމުން މި ބަޖެޓަކީ، 5678 ބިލިއަން ރުފިޔާއިން ޑެފިސިޓް (ދަރަނި) ބަޖެޓެކެވެ. ޖުމުލަ އާމްދަނީ އާއި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައިވާ އަދަދަކީ 29،922 ބިލިއަން ރުފިޔާ އެވެ.

މިއީ މި އަހަރުގެ ބަޖެޓަށް ވުރެ 8.5 ބިލިއަން ރުފިޔާ ބޮޑު ބަޖެޓެކެވެ. ބަޖެޓް ހުށަހަޅުއްވަމުން ފިނޭންސް މިނިސްޓަރު އަމީރު ވިދާޅުވީ، އަންނަ އަހަރަށް ލަފާކޮށް ހުށަހެޅި 37.504 ބިލިއަން ރުފިޔާގެ ބަޖެޓުން ހަރަދުގެ ގޮތުގައި ހިނގާނެ ކަމަށް ބެލެވެނީ ޖުމްލަ 35.6 ބިލިއަން ރުފިޔާ ކަމަށެވެ.

ބަޖެޓާއި ހަރަދާއި ހުރި ތަފާތުގެ ބޮޑުބައެއް ހިއްސާކުރަނީ، ދައުލަތުގެ ދަރަނި އަދާ ކުރުމަށް ދައްކާ 1.9 ބިލިޔަން ރުފިޔާ ކަމަށްވެސް ވިދާޅުވިއެވެ.

ޖުމުލަ އާމްދަނީ އާއި ހިލޭ އެހީގެ ގޮތުގައި ދައުލަތަށް ލިބޭނެ ކަމަށް ލަފާކުރެވެނީ، 29.9 ބިލިޔަން ރުފިޔާ ކަމަށާއި އެހެންކަމުން ބަޖެޓް ޑެފިސިޓް ވާނީ 5.7 ބިލި ރުފިޔާއިން ކަށާއި، ޖީޑީޕީގެ ނިސްބަތުން އެއި 5.8 ޕަސެންޓް ކަމަށްވެސް ވިދާޅުވިއެވެ.

ބަޖެޓްގައި އަންނަ އަހަރު ދައުލަތަށް ލިބޭ އާމްދަނީ މައިގަނޑު ފަސް ދާއިރާއަކަށް އަމާޒު ކޮށްފައިވާއިރު، އެންމެ ބޮޑު އާމްދަނީއެއް ލިބެނީ ޓެކްސްގެ ގޮތުގައެވެ. އެއީ އާމްދަނީގެ 48 ޕަސެންޓް ކަމަށް ވާ 17.8 ބިލިއަން ރުފިޔާ އެވެ. ޓެކްސް ނޫން އެހެން ގޮތްގޮތުން ލިބޭ 6.8 ބިލިއަން ރުފިޔާގެ އިތުރުން ހިލޭ އެހީ އާއި އެހެނިހެން ގޮތްގޮތުން 5.2 ބިލިއަން ރުފިޔާ ލިބޭނެކަމަށް ވަނީ ހިމަނައިފައެވެ.