ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ކޯޓަށް ހާޒިރުކުރައްވާނެކަން މާކުރިން ވެސް އެނގިވަޑައިގަންނަވާ ކަމަށާއި އެމަނިކުފާނުގެ މައްޗަށް ސާބިތުކުރެވޭނެ އެއްވެސް ދައުވާއެއް ނޯންނާނެ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
ރާއްޖޭން ބޭރުގައި އުޅުއްވުމަށްފަހު މިރޭގެ ވަގުތެއްގައި އަދުރޭ ވަނީ ރާއްޖެއަށް ވަޑައިގެންފައެވެ. އަދުރޭ ވިދާޅުވީ ޗުއްޓީއަށް މެލޭޝިއާއަށް ވަޑައިގެންނެވީ އާއިލާއެކު ޗުއްޓީ ހޭދަކުރެއްވުމަށާއި ބޭސްފަރުވާއަށް ކަމަށެވެ.
އަދުރޭ މިރޭ ރާއްޖެ ވަޑައިގެންނެވި އިރު، ރައީސް ޔާމީން މާދަމާ ހެނދުނު 11:30ގައި ކްރިމިނަލް ކޯޓަށް ހާޒިރުކުރުމަށް ވަނީ ޗިޓު ފޮނުވައިފައެވެ. އެމަނިކުފާނު ކޯޓަށް ހާޒިރުކުރަނީ އެމްއެމްޕީއާރްސީގެ މައްސަލައިގައި ކުރަމުން އަންނަ، މަނީ ލޯންޑްރިންގެ ޝަރީއަތުގެ އަޑުއެހުމަކަށެވެ.
"ރައީސް ޔާމީން ކޯޓަށް ހާޒިރުކުރާނެކަން އަޅުގަނޑުމެންނަށް އެނގޭ މާކުރިންވެސް. އެހެންނަމަވެސް އަޅުގަނޑުމެންނަށް ޔަގީންކަމަކީ އިރާދަކުރެއްވިއްޔާ ރައީސް ޔާމީންގެ މައްޗަށް ސާބިތުކުރެވޭނެ އެއްވެސް ކަމެއް ނޯންނާނެ. އަދި އެމަނިކުފާނު ކޯޓަށް ހާޒިރުކުރަން ޗިޓު ފޮނުވައިފިއްޔާ ކޯޓަށް ވަޑައިގަންނަވާނެ،" ވެލާނާ އިންޓަނޭޝަނަލް އެއާޕޯޓުގައި ހުންނަވައި ނޫސްވެރިންނަށް މައުލޫމާތުދެއްވަމުން އަދުރޭ ވިދާޅުވިއެވެ.
އަދުރޭ ވިދާޅުވީ މި ސަރުކާރަށް އެންމެ ބޮޑު ގޮންޖެހުމަކަށް ވާނީ ރައީސް ޔާމީން ކަމަށާއި އެމަނިކުފާނު އިދިކޮޅުގައި މަސައްކަތްކުރައްވަން ހުންނެވުމަކީ މި ސަރުކާރަށް ކެތްކުރެވޭ ކަމަކަށް ނުވާނެ ކަމަށެވެ. އަދި ކޯޓުގައި ރައީސް ޔާމީނަށް ކުރައްވާ ސުވާލުތަކަށް ސާފުކޮށް ޖަވާބުދެއްވައި، ދިފާއުވެވަޑައިގަންނަވާނެ ކަމުގެ ޔަގީންކަން އޮތް ކަމަށްވެސް އަދުރޭ ވިދާޅުވިއެވެ.
ރޯދަ 28، އެސްޓީއޯ ރޯދަ ބާޒާރު: ދިވެހި ކަރާ މަދުވެ އަގު އުފުލިއްޖެ
ހެޔޮ އަމަލުތައް ކުރުން މަތީ ދެމިތިބެން ޖެހޭ، ކުރެވުނު އަމަލަކުން ސުވަރުގެ ޔަގީންވީކަމަށް ދެކިގެން ނުވާނެ: ހުތުބާ
ރައީސްގެ ނިންމެވުމާ އެއްގޮތަށް މަތީ ތައުލީމަށް ދޫކުރާ ލޯނުތަކުގެ އިދާރީ ފީ ކަނޑާލައިފި
ފަގީރުންގެ ދަފްތަރުގައި ހިމެނޭ އެންމެންނަށް އެއް ހަމައަކުން ޒަކާތް ބަހަނީ، ކޮންމެ މީހަކަށް 4500 ރުފިޔާ
