ޚަބަރު

އެމްއެމްޑަބްލިއުއެމް އިމްޕެކްޓް އޮކްޝަން ފަށައިފި

މިޝަން ފޯ މައިގްރަންޓް ވޯކާސް މޯލްޑިވްސް (އެމްއެމްޑަބްލިއުއެމް) އިން، އެމްއެމްޑަބްލިއުއެމް އިމްޕެކްޓް އޮކްޝަނެއް ފަށައިފިއެވެ.

މިއީ ރާއްޖޭގައި މިގޮތަށް ކުރިއަށްގެންދާ މިފަދަ ފުރަތަމަ އޮކްޝަންއެވެ. މި އޮކްޝަންގެ ދަށުން ހުނަރުތަކާއި، ހިދުމަތްތަކާއި، ހާއްސަ ތަޖުރިބާތައް ބިދޭސީ މަސައްކަތްތެރިންނަށް އެހީތެރިވެދޭ ކަންކަމަށް ބަދަލުކުރެވޭނެއެވެ.

މި އޮކްޝަނުން ވަކިވަކި ފަރުދުންނަށާއި ވިޔަފާރިތަކަށް ސީދާ ފައިސާގެ އެހީ ނުދީ އިފްތާރު ކާނާއާއި އަސާސީ އެހީތެރިކަން ފޯރުކޮށްދިނުމަށް ފަންޑު ހޯދުމުގެ ފުރުސަތު ލިބިގެންދާނެއެވެ.

"އަހަރުން އަހަރަށް އަޅުގަނޑުމެންނަށް ލިބޭ ކާނާގެ އަދަދު އިތުރުވަމުންމުން އައިސްފައިވޭ. އެކަމަކު މިއަހަރު އަޅުގަނޑުމެންނަށް ފެނިގެން މިދަނީ އެ އަދަދު މަދުވަމުންދާ މަންޒަރު،" އެމްއެމްޑަބްލިއުއެމްގެ ރައީސް ޑރ. މިނާހު ފާއިޒް ރަޝާދު ވިދާޅުވިއެވެ.

"އާންމު ގޮތްތަކުން ފަންޑު ހޯދުން އިތުރަށް އުނދަގޫވަމުންދާތީ، އަޅުގަނޑުމެންނަށް އާ ގޮތްތަކުން އެހީތެރިކަން ފޯރުކޮށްދެވޭނެ އުފެއްދުންތެރި ހައްލެއް ބޭނުންވެފައިވަނީ. މި އޮކްޝަނުން ވަކިވަކި ފަރުދުންނަށާއި ވިޔަފާރިތަކަށް އެމީހުންގެ އަތުގައި މިހާރުވެސް ހުރި އެއްޗެއް ހުށަހަޅައިގެން އަޅުގަނޑުމެންގެ މަގުސަދަށް އެހީތެރިވެވޭނެ. އެއީ ހުނަރެއް، ހިދުމަތެއް ނުވަތަ ހާއްސަ ތަޖުރިބާއެއް ކަމުގައިވިޔަސް، އެއްވެސް މާލީ ބުރައެއް ނެތި އެކަން ކުރެވޭނެ،"

މި އޮކްޝަން ހިނގާނެ ގޮތް:

މުޖުތަމައުގެ މެންބަރުންނަށް ފޮޓޯގްރަފީ، ޔޯގާ ސެޝަންތައް، ކޯޗިން، ޓިއުޝަން ނުވަތަ އުފެއްދުންތެރި ހިދުމަތްތައް ފަދަ ހުނަރުތައް އޮކްޝަނަށް ހުށަހެޅިދާނެ.
ކުންފުނިތަކުން ހޮޓެލްތަކުގައި ހުރުމާއި، ފައިން ޑައިނިން، ލީޑާޝިޕް ތަމްރީނު ނުވަތަ ޑިސްކައުންޓް ކުރެވިފައިވާ ތަކެތި ފަދަ ހާއްސަ ތަޖުރިބާތައް ހުށަހެޅިދާނެ.
ޓީމުން ހުރިހާ އެންޓްރީތަކެއް ބެލުމަށްފަހު، އޮންލައިން އޮކްޝަނެއް ބޭއްވޭނެ. ކޮންމެ ހުށަހެޅުމަކަށް އެންމެ މަތިން ބިޑު ކުރާ ފަރާތުން ބިދޭސީ މަސައްކަތްތެރިންނަށް ކާނާއާއި އެހީތެރިކަން ފޯރުކޮށްދިނުމަށް ފަންޑު ކުރާނެ.
މި އޮކްޝަނުން ލިބޭ ހުރިހާ އާމްދަނީއެއް އެމްއެމްޑަބްލިއުއެމްގެ 'ޝެއާ އަ މީލް، ހެލްޕް އަ ލައިފް' ކެމްޕޭނަށް ހޭދަކުރެވޭނެ. މި ކެމްޕޭނުން އެހީ ބޭނުންވާ ބިދޭސީ މަސައްކަތްތެރިންނަށް އިފްތާރު ކާނާއާއި އަސާސީ އެހީތެރިކަން ފޯރުކޮށްދެވޭނެ.

އެހީތެރިކަމަކުން ފޯރުކޮށްދެވޭނެ ތަކެތި (50 ރުފިޔާ - 1 އިފްތާރު ކެއުމެއް ސްޕޮންސާ ކުރުމުގެ އަގު ކަމަށް ބަލައިގެން):

ފޮޓޯގްރަފީ ސެޝަނެއް - 15 ކެއުން
ޔޯގާ ކްލާހެއް - 20 ކެއުން
އަމިއްލަ ކުކިން ފިލާވަޅެއް - 30 ކެއުން
ހޮޓަލެއްގައި ހުރުމާއި ކެއުމުގެ ތަޖުރިބާއެއް - 70 ކެއުން
ވިޔަފާރި ސްޓްރެޓެޖީ މަޝްވަރާއެއް - 40 ކެއުން

މި އޮކްޝަނުގައި ބައިވެރިވުމަށް އެމީހެއްގެ ހުނަރު، ހިދުމަތް ނުވަތަ ތަޖުރިބާ އޮކްޝަނަށް ހުށަހެޅުމަށް އެމްއެމްޑަބްލިއުއެމްގެ ސޯޝަލް މީޑިއާ ނުވަތަ ވެބްސައިޓުގައިވާ ލިންކް މެދުވެރިކޮށް ރަޖިސްޓަރީކުރުމަށް އެމްއެމްޑަބްލިއުއެމް އިން އެދެއެވެ. ރަޖިސްޓަރީ ކުރުމުގެ އެންމެ ފަހު ދުވަހަކީ މާދަމާއެވެ.