މިދިޔަ އަހަރު ސްޓެލްކޯއަށް 138 މިލިއަން ރުފިޔާގެ ފައިދާއެއް

ސްޓެލްކޯއަށް މިދިޔަ އަހަރު 138 މިލިއަން ރުފިޔާގެ ފައިދާއެއް ލިބިފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.

ފަހުމީ އެކްސްގައި މިއަދު ވަނީ މިދިޔަ ހަތް އަހަރު އެ ކުންފުނީގެ މާލީ އުސްއަލިތައް ހާމަކުރައްވައިފަ އެވެ. އެ ހިސާބުތައް ދައްކާ ގޮތުން 2023 ވަނަ އަހަރު އެ ކުންފުންޏަށް 172 މިލިއަން ރުފިޔާގެ ގެއްލުންވިއެވެ.

ނަމަވެސް މިދިޔަ އަހަރު އެ ގެއްލުމުން އަރައިގަނެ، 138 މިލިއަން ރުފިޔާގެ ފައިދާއެއް ވަނީ ހޯދައިފަ އެވެ. މިއީ މިދިޔަ ހަ އަހަރު ތެރޭ އެ ކުންފުންޏަށް ލިބުނު އެންމެ ބޮޑު ފައިދާ ކަމަށްވެސް ތަފާސް ހިސާބުތަކުން ދައްކަ އެވެ.

ފަހުމީ ހާމަކުރެއްވި ހިސާބުތައް:

ސްޓެލްކޯއަށް ގެއްލުމާ ކުރިމަތިވުމަށް ފަހު އެ ކުންފުންޏަށް މިދިޔަ އަހަރު އަނެއްކާ ވެސް ފައިދާވުމުން ފަހުމީ ވިދާޅުވީ އެ ނަތީޖާ ހާސިލް ކުރެވުނީ ވަސީލަތްތައް ހަރުދަނާގޮތުގައި ބޭނުންކުރުމާއި އިސްރާފު ކުޑަކުރުން އަދި ހިންގުމުގެ ނިޒާމު ހަރުދަނާކޮށްގެން ކަމަށެވެ.