އެންމެ ގިނައިން ވާރޭ ވެހުނީ މާލެއަށް، މިއަދުވެސް ބޮޑު ސަރަހައްދަކަށް ޔެލޯ އެލާޓް!

މިދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭ ވެހުނީ މާލެއަށް ކަމަށް މޫސުމާ ބެހޭ އިދާރާ، މެޓް އޮފީހުން މިއަދު ބުނެފިއެވެ.

މެޓް އޮފީހުން ބުނީ އިއްޔެ ހެނދުނު 8:00 އިން މިއަދު ހެނދުނު 8:00 އަށް މާލެއަށް 130.7 މިލިމީޓަރުގެ ވާރޭ ވެހިފައިވާ ކަމަށެވެ. ދެން އެންމެ ގިނައިން ވާރޭ ވެހުނީ ހުޅުލެއަށެވެ. ހުޅުލެއަށް 79.5 މިލިމީޓަރުގެ ވާރޭ ވެހުނެވެ. ތިންވަނަށް އެންމެ ގިނައިން ވާރޭ ވެހުނު އއ. ތޮއްޑުއަށް 70.3 މިލިމީޓަރުގެ ވާރޭ ވެހިފައިވެއެވެ.

މާލެއަށް ރެއިން ފެށިގެން މެދުނުކެނޑި ވާރޭ ވެހުމުގެ ސަބަބުން މާލޭގެ މަގުތަކުގައި ވަރަށް ބޮޑަށް ފެން ބޮޑުވި އިރު، މިއަދުވެސް ބޯކޮށް ވާރޭ ވެހި ފެންބޮޑުވާނެ ކަމަށް ލަފާކޮށް މެޓް އޮފީހުން ވަނީ ރާއްޖޭގެ ބޮޑު ސަރަހައްދަކަށް ޔެލޯ އެލާޓް ނެރެފައެވެ.

މިއަދު މެންދުރުފަހު 1:00 އާ ހަމައަށް އެލާޓް ނެރެފައިވަނީ ށ. އަތޮޅުން ތ. އަތޮޅަށެވެ.