އަލުން އަޅުވައިގެން މި އަހަރު އެންމެ ބޮޑު އާމްދަނީއެއް ލިބުނީ މަޝްހޫރު މީހުން ނޫޅޭ ފިލްމަކަށް!
2024 ވަނަ އަހަރަކީ އިންޑިއާގައި ގިނަ ރީ ރިލީސްތަކެއް ދެއްކި އަހަރެކެވެ. އެގޮތުން ވޭތުވެދިޔަ މަސްތަކުގައި، ޑަޒަނަކަށްވުރެ ގިނަ ހިންދީ ފިލްމުތަކާއި، އަދި ތަމަޅަ އަދި ތެލިނގު ސިނަމާގެ ގިނަ ފިލްމުތައް ވަނީ ތިއޭޓަރުތަކުގައި އަލުން ދައްކާފައެވެ.
އަލުން ދެއްކި ފިލްމުތަކުގެ ތެރެއިން ގިނަ އަދަދެއްގެ ފިލްމުތަކަށް ވަނީ ރަނގަޅު ކާމިޔާބީއެއްވެސް ލިބިފައެވެ. ޝާހުރުކް ޚާން، ޗިރަންޖީވީ، ރަންބީރު ކަޕޫރު، އަދި ވިޖޭ ފަދަ ތަރިންގެ އެންމެ ބޮޑެތި ހިޓް ފިލްމުތައް އަލުން ދެއްކި ނަމަވެސް، އެންމެ ގިނަ ވިޔަފާރި ކުރެވުނީ މަޝްހޫރު ތަރީން ނުހިމެނޭ، ވަކި ބަޔަކަށް އަމާޒުކޮށްގެން ހެދި ރޫހާނީ ފިލްމަކަށެވެ.
ރާހީ އަނިލް ބާވޭގެ ސޯހަމް ޝާހް ފީޗަރކޮށްފައިވާ "ތުމްބާދް" މިއަހަރު އިންޑިއާގައި އަލުން ދެއްކި ހުރިހާ ފިލްމުތަކުގެ ތެރެއިން ބޮކްސް އޮފީސް ކަލެކްޝަނާއި ޓިކެޓް ވިއްކުމުގައި އެންމެ މަތީގައި ހިމެނިފައިވެއެވެ.
މި ރޫހާނީ ކަލްޓް ކްލާސިކް ފިލްމު އަސްލު ދެއްކީ 2017 ގައެވެ. 5 ކްރޯޑު ރުޕީސްގެ ބަޖެޓެއްގައި ހަދާފައިވާ މި ފިލްމުން އޭރު ބޮކްސް އޮފީހުން ލިބިފައިވަނީ އެންމެ 15 ކްރޯޑު ރުޕީސް އެވެ. އަލުން ދެއްކުމުން، އެ އަދަދަށް 38 ކްރޯޑު ރުޕީސް އިތުރުވެފައިވެއެވެ. އެއާ އަޅައިބަލާއިރު، ރަންބީރުގެ "ރޮކްސްޓާ" އިން ލިބުނީ 10.50 ކްރޯޑު ރުޕީސް އެވެ. ޝާހުގެ "ކަލް ހޯ ނާ ހޯ" އިން ލިބުނީ 2.50 ކްރޯޑު ރުޕީސް އެވެ. އަދި ޗިރަންޖީވީގެ ކަލްޓް ކްލާސިކް "އިންދްރާ" އިން ލިބުނީ 3.20 ކްރޯޑު ރުޕީސް އެވެ.
[ތުމްބާދް ޓްރެއިލަރު]
(https://youtu.be/O9CaB4J4VEI)
ހޮނިހިރު ދުވަހު، ފިލްމީ ވިއު އިން ވަނީ 2024 ވަނަ އަހަރު އިންޑިއާގައި އަލުން ދެއްކި ބައެއް ފިލްމުތަކުގެ ޓިކެޓް ވިއްކުނު މިންވަރުގެ މައުލޫމާތު ހިއްސާކޮށްފައެވެ. މިއަހަރު އަލުން ދެއްކި 6 ފިލްމަކުން ވަނީ އެއް ލައްކައަށްވުރެ ގިނަ ޓިކެޓް ވިއްކާފައެވެ. މިހާރުވެސް ތިއޭޓަރުތަކުގައި ދައްކަމުން އަންނަ "ކަލް ހޯ ނާ ހޯ" އިން ވަނީ 1 ލައްކައަށްވުރެ ގިނަ ޓިކެޓް ވިއްކާފައެވެ. އަދި "ރޮކްސްޓާ" އިން ވަނީ 3 ލައްކަ ޓިކެޓް ވިއްކާފައެވެ. މި ދެ ފިލްމުގެ ދޭތެރޭގައި ވަނީ "ގައްބަރު ސިންގް" އާއި "މުރާރީ" އެވެ. މި ދެ ފިލްމުން ވިއްކާފައިވަނީ އެއް ފިލްމަކުން 2.10 ލައްކަ އަދި އަނެއް ފިލްމުން 2.58 ލައްކަ ޓިކެޓެވެ. ވިޖޭގެ "ގިލީ" ވަނީ 4 ލައްކައަށްވުރެ ގިނަ މީހުން ބަލައިފައިވުމާއެކު ދެވަނަ ގޮނޑީގައެވެ. ނަމަވެސް އެއީ އަދިވެސް "ތުމްބާދް" އިން އަލުން ދެއްކުމުން ވިއްކުނު 10.25 ލައްކަ ޓިކެޓާ ވަރަށް ދުރު އަދަދެކެވެ.
ތުމްބާދު ފިލްމުގައި ވަނީ ކިހިނެއް؟
"ތުމްބާދް" ގައި ސޯހަމް ޝާހް މެއިން ލިޑުން ވިނާޔަކްގެ ރޯލުން ފެނެއެވެ. ވިނާޔަކް އަކީ ތުމްބާދް ރަށަށް ޖެހިފައިވާ ހާދިސާ ނައްތާލުމުގެ ތަޅުދަނޑި އޮތް ފޮރުވިފައިވާ މުދަލެއް ހޯދުމަށް ނުރައްކާތެރި ދަތުރެއް ފަށާ މީހެކެވެ. "ތުމްބާދް" ޑައިރެކްޓްކުރީ ރާހީ އަނިލް ބާވޭ އެވެ. އަދި ސޯހަމް ޝާހް، އާނަންދް އެލް. ރާއީ، މުކޭޝް ޝާހް، އަދި އަމީތާ ޝާހް ވަނީ މި ފިލްމު ޕްރޮޑިއުސްކޮށްފައެވެ. 2017 ގައި އަސްލު ދެއްކި އިރު، މި ފިލްމަށް ފާޑުކިޔުންތެރިންގެ ތައުރީފު ލިބުނު ނަމަވެސް ބޮކްސް އޮފީހުން މާ ބޮޑު ކާމިޔާބީއެއް ނުލިބުނެވެ. ފަހުން ސްޓްރީމިން ޕްލެޓްފޯމްތަކުގައި ދެއްކުމުން މި ފިލްމަށް ވަކި ހާއްސަ ބަޔަކު ތަބާވާ ފިލްމެއްގެ ގޮތުގައި މަގުބޫލުކަން ލިބުނެވެ. އެއީ 2024 ގައި އަލުން ދެއްކުމަށް މަގުފަހިވި ސަބަބެވެ. އޭގެ ފަހުން ބޮކްސް އޮފީހުން ލިބުނު ކާމިޔާބީގެ ސަބަބުން ފަހުން މި ފިލްމުގެ ސީކުއަލްއެއް ހެދުމަށްވެސް ހުއްދަ ލިބުނެވެ.
