2004 ވަނަ އަހަރު ރިލީސްކުރި ފިލްމު "އޭތްރާޒް" އަކީ އެއްފަހަރު ބަލައިލުމަށްފަހު ހަނދާނުން ފޮހެލަން އުނދަގޫ ފިލްމެކެވެ.
ފިލްމުގައި މައިގަނޑު ރޯލުތަކުގައި ޕްރިޔަންކާ ޗޯޕްރާ، އަކްޝޭ ކުމާރު އަދި ކަރީނާ ކަޕޫރު ޚާން ފެނިގެންދެއެވެ. ޑްރާމާއާއި މިސްޓްރީ އިން ފުރިގެންވާ މި ފިލްމު ހިންދީ ސިނަމާގައި 20 އަހަރު ފުރިހަމަކޮށްފިއެވެ. މި މުނާސަބަތުގައި، ފިލްމު އުފެއްދި ފަރާތް ކަމަށްވާ ސުބާޝް ގައި އިން ވަނީ "އޭތްރާޒް 2" އިއުލާނުކޮށްފައެވެ. އޭނާ ބުނި ގޮތުގައި މި ފިލްމުގެ ސްކްރިޕްޓް ލިޔުމުގެ މަސައްކަތް ވޭތުވެދިޔަ 3 އަހަރު ދިޔައީ ކުރަމުންނެވެ.
އޭނާ އެކަން އިއުލާނުކުރީ އިންސްޓަގްރާމްގައި ޕްރިޔަންކާ ފެންނަ، ފިލްމުގެ ފޮޓޯއެއް ހިއްސާކުރަމުންނެވެ. އަދި މި ފޮޓޯއާއެކު، ޕްރިޔަންކާއަށް ތައުރީފު ކޮށްފައިވެއެވެ. އެއީ ޕްރިޔަންކާ ފިލްމީ ދާއިރާއަށް ވަދެ މަސައްކަތް ފަށައިގަތް ދުވަސްވަރެވެ. އަދި އޭނާ ސޯނިއާގެ ދައުރުގައި ވަރަށް ފުރިހަމަ ރޯލެއް އަދާކުރިއެވެ. މިއީ އަހުލާގީ ގޮތުން ދެކޮޅުޖެހޭ ކެރެކްޓަރެއް ނޫނެވެ.
ސުބާޝް އަކީ 80 އަދި 90 ގެ އަހަރުތަކުގައި ހިންދީ ސިނަމާގެ އެންމެ ފާހަގަކޮށްލެވޭ އަދި ކާމިޔާބު ފިލްމް ހަދާ ފަރާތްތަކުގެ ތެރެއިން އެކެކެވެ. އޭނާގެ އެންމެ ފާހަގަކޮށްލެވޭ މަސައްކަތްތަކުގެ ތެރޭގައި ކާލީޗަރަން، ވިޝްވަނާތް، ކަރްޒް، ހީރޯ، ވިދާތާ، މޭރީ ޖަންގް، ކަރްމާ، ރާމް ލަކްޝަން، ސައުދާގަރު، ކަލްނާޔަކް، ޕަރްދޭސް އަދި ތާލް ހިމެނެއެވެ.
