އިންޑިއަން ފިލްމު ފެސްޓިވަލް އޮފް މެލްބަންގައި ނޯރާ ފަތޭހީ މިވަނީ އިންޑިއާގެ މުނިފޫހިފިލުވުމުގެ ދާއިރާގެ ކުރީކޮޅު އޭނާ ކުރިމަތިލާން ޖެހުނު ދަތިތަކާ ގުޅޭ ގޮތުން ވާހަކަދައްކައިފައެވެ. އެގޮތުން ކެރިއަރުގައި ބޮޑު ކުރިއެރުމެއް ގެނުވި ލަވަތައް ކަމުގައިވާ "ސަތިޔަމޭވަ ޖަޔަތޭ"ގެ "ދިލްބަރު" އަދި "ސްޓްރީ"ގެ "ކަމަރިޔާ" އަށް އެއްވެސް އުޖޫރައެއް ނުލިބޭ ކަމަށް އޭނާ ބުނެފައިވެއެވެ.
"ދިލްބަރު" އަށް އޭނާ ދިން އުފެއްދުންތެރި ހިޔާލުތަކާ ގުޅޭ ގޮތުންވެސް އޭނާ ވާހަކަދެއްކިއެވެ. ނޯރާ ބުނީ އެ ލަވައިގައި އޭނާގެ މަގުސަދަކަށްވީ އާންމު އައިޓަމް ލަވަތަކާ ތަފާތު ގޮތަކަށް، ކޮރިއޯގްރަފީއަށް އިސްކަން ދިނުން ކަމަށެވެ. ލަވައިގައި އުނދަގޫ ޑާންސް ސްޓެޕްތައް ހިމަނައިގެން ގެނެސްދިނުމަށާއި އާއިލާތަކާ ރައްޓެހި ގޮތަކަށް އެކަމަކު އާންމު އައިޓަމް ލަވަތަކުގެ ސިފަތަކަށް އެކަނި ބަރޯސާ ނުވެ އެކަން ކުރުމަށް އިސްކަން ދިން ކަމަށް ބުންޏެވެ.
މާލީ އެހީތެރިކަން ބޭނުންވެފައި ހުރި ނަމަވެސް، އޭނާ މަސައްކަތް ބަލައިގަތީ ކެރިއަރުގައި ވަރަށް މުހިންމު ފުރުސަތުތަކެއްގެ ގޮތުގައެވެ. އޭނާ ހިޔާރުކުރީ ފައިސާއަށްވުރެ މީހުންނަށް ފެނުމާއި އަމިއްލަ ނަފުސު ސާބިތުކޮށްދިނުމުގެ ފުރުސަތެވެ.
"އަހަރެން އަމިއްލަ ނަފްސަށް ބުނީ މިއީ ފައިސާގެ ވަގުތެއް ނޫނޭ، އަމިއްލަ ނަފްސު ސާބިތުކޮށްދޭން ޖެހޭ ވަގުތޭ،" ނޯރާ ބުންޏެވެ. އިތުރަށް ބުނީ ބޫޝަން ކުމާރު އަދި ދިނޭޝް ވިޖަންއާއެކު މަސައްކަތްކުރުމަކީ އޭނާގެ އިތުބާރު ގާއިމުކުރުމަށް އެޅުނު ފިޔަވަޅުތަކެއްގެ ގޮތުގައި ދެކޭ ކަމަށެވެ.
"ދިލްބަރު" ގެ ސެޓުގައި ހެދުމާ ގުޅޭގޮތުން ދިމާވި މައްސަލައަކާ ބެހޭގޮތުން ވެސް ނޯރާ ވާހަކަދެއްކިއެވެ. އޭނާއަށް ދިން ބްލައުޒް "މާ ކުޑަ" ކަމަށް ފެނުމުން އޭނާ އެކަމަށް އިންކާރުކޮށް، ޖިންސީ ގޮތުން ރައްކާތެރިކަމާ ހަމަހަމަކަމެއް ގެނެސްދޭ ހެދުމަކަށް ވަކާލާތުކުރިއެވެ. އޭނާއަށް ފަސޭހަވާނެ ގޮތަކަށް އެންމެ ފަހު ވަގުތު ބްލައުޒް އަލުން ޑިޒައިންކުރަން ޖެހުނެވެ. "ބައެއް މީހުންނަށް އަދިވެސް މާ ސެކްސީކޮށް ފެނުނު ނަމަވެސް، އަހަރެންނަށް ކޮމްފަޓަބަލް ވި،" ނޯރާ ސާފުކޮށްދިނެވެ.
