ފާނަ ހިފަން ތިބީ ދިދަ ނަގައިގެން، މަރުވި މީހާގެ ހަށިގަނޑުގެ ބޮޑުބައެއް އޮތީ ކަފައިގެން ގޮސްފައި

އދ. ދަނގެތި ކައިރީގައި ފާނަ މަސްވެރިކަމަށް މޫދަށް އެރި އުޅެނިކޮށް ލޯންޗަކުން ޖެހި މިއަދު މަރުވި މީހާގެ ހަށިގަނޑުގެ ބޮޑުބައެއް އޮތީ ވަރަށް ބޮޑަށް ކަފައިގެން ގޮސްފައި ކަމަށް މަންޒަރު ދުށް ބައެއް މީހުން ބުނެފިއެވެ.

މިއަދު ހެނދުނު މާމިގިލިން ފުރައިގެން މާލެއަށް ދަތުރު ކުރަމުންދިޔަ ލޯންޗަކުން ޖެހި އެ ހާދިސާގައި މަރުވީ ފ. ފީއައްޔަށް ނިސްބަތްވާ 'ޓްވިންސް' ނަމަކަށް ކިޔާ ދޯންޏެއްގެ ބަންގްލަދޭޝް ފަޅުވެރިއެކެވެ.

ދައުރުވަމުންދާ ވީޑިއޯއަކުން ފެންނަ ގޮތުގައި، އެ ދޯނީގެ މީހުން އެ ސަރަހައްދުގައި ފާނަ މަސްވެރިކަން ކުރަމުން ދިޔައީ ބާސްކެޓުގައި ސަލާމަތީ ގޮތުން ނަގަންޖެހޭ ދިދަވެސް ނަގައިގެންނެވެ.

ދަނގެތީ ކައުންސިލުގެ ރައީސް މުއާވިޔަތު ރަޝީދު "ވަން" އަށް މިއަދު ވިދާޅުވީ، އެ މީހާ މޫދުން ނަގައިގެން ރަށު ސިއްހީ މަރުކަޒަށް ގެންދިޔައިރުވެސް އޮތީ މަރުވެފައި ކަމަށެވެ. އަދި އޭނާގެ ބޮލުން ފެށިގެން ފޫޅާ ހަމައަށް ކަފައިގެން ގޮސްފައި އޮތް ކަމަށްވެސް ވިދާޅުވިއެވެ.

"މޭމަތި އެއްކޮށް ގޮސްފައި އޮތީ. (ހަށިގަނޑު) ވައްކަތް ނުވޭ،" މުއާވިޔަތު ވިދާޅުވިއެވެ.

އޭނާ ވިދާޅުވީ، ހާދިސާ ހިނގި ސަރަހައްދަކީ މާލެ ދަތުރުކުރާ ލޯންޗުތަކުން އާންމު ގޮތެއްގައި ދުއްވާ އުޅޭ ސަރަހައްދެއް ކަމަށާއި އެއީ ފާނަ މަސްވެރިކަންވެސް ކޮށް އުޅޭ ސަރަހައްދެއް ކަމަށް ބުންޏެވެ.

ދަނގެތިން "ވަން" އާ ވާހަކަ ދެއްކި މީހަކު ބުނީ، އެ މީހާ މޫދުން ނަގައިގެން ސިއްހީ މަރުކަޒަށް ގެންދިޔައީ މަރުކަޒުގެ އެމްބިއުލާންސްގައި ކަމަށާއި އެމްބިއުލާންސް ތެރޭގައިވެސް ގިނަ އަދަދެއްގެ ލޭ ހުރި ކަމަށެވެ.

އަދި އެ މީހާގެ ގައިގައި ޖެހުނު ލޯންޗު ދަތުރުކުރި ވަގުތަކީ އިރު އަރައިގެން އައި ވަގުތު ކަމުން އިރުގެ ދޯދިތަކުގެ ސަބަބުން އެ ސަރަހައްދުގެ މޫދުގައި ބަޔަކު ތިބިކަން ލޯންޗު ދުއްވަން އިން ކައްޕިއަށް ނޭނގުނީ ކަމަށް ވެދާނެ ކަމަށްވެސް އެ މީހާ ބުންޏެވެ.

އެ ހާދިސާ ފުލުހުން ތަހުގީގު ކުރަމުން އަންނައިރު، ބިދޭސީ މީހާގެ ގައިގައި ޖެހުނު ލޯންޗު ދުއްވަން އިން މީހާ ފުލުހުން ވަނީ ހައްޔަރުކޮށްފައެވެ.