ވޯލްޑް ކަޕް: ކްރޮއޭޝިއާ 2-1 މޮރޮކޯ (ފުލްޓައިމް)

މެޗުގެ އުސްއަލިތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 2-1 ގެ ނަތީޖާއަކުން ކްރޮއޭޝިއާ ކުރީގައި އޮވެގެން. ކްރޮއޭޝިއާއަށް ތިންވަނަ.

'90+6 - މޮރޮކޯއަށް ރަނގަޅު ފުރުސަތެއް. އަތިޔަތަﷲ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ އެން ނަސީރީ ބޮލުން ފޮނުވާލި ހަމަލާ ދިޔައީ ކްރޮއޭޝިއާ ގޯލުގެ ހުރަސް ދަނޑިމަތިން ބޭރަށް.

ދެވަނަ ހާފުގެ އިތުރު ވަގުތުގެ ގޮތުގައި ހަ މިނެޓުގެ ކުޅުން ދައްކައިފި.

'87 - ކްރޮއޭޝިއާއަށް ހުސް ފުރުސަތެއް. އޯސިޗް ދިން ބޯޅައަކުން ޕެނަްޓީ އޭރިއާ ތެރެއިން ވަރަށް ހުސްކޮށް ހުރެ، މަޓިއޯ ކޮވަސިޗް ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

'76 - މޮރޮކޯއަށް ހުސް ފުރުސަތެއް. ޕެނަލްޓީ އޭރިއާ ތެރޭ ހުސްކޮށް ހުރެ، އެން ނަސީރީ ފޮނުވާލި ހަމަލާ، ކްރޮއޭޝިއާގެ ކީޕަރު ޑޮމިނިކް ލިވަކޮވިޗް ވަނީ މަތަކޮށްފައި.

'75 - މޮރޮކޯގެ ނުރައްކަލެއް. ޕެނަލްޓީ އޭރިއާ ތެރެއިން އަޝްރަފް ހަކީމީ ނުރައްކާކުރުމުގެ ކުރިން ކްރޮއޭޝިއާގެ ކެޕްޓަން މޮޑްރިޗް ވަނީ ދިފާއުކޮށްފައި.

'71 - ކްރޮއޭޝިއާގެ ހަމަލާއެއް. ޕެނަލްޓީ އޭރިއާ ބޭރުން ވްލަސިޗް ފޮނުވާލި ބާރު ހަމަލާ ދިޔައީ މޮރޮކޯ ގޯލުގެ ހުރަސް ދަނޑިމަތިން ބޭރަށް.

'67 - މޮރޮކޯ އިން އިތުރު ބަދަލެއް. އެލް ޔަމީގްގެ ބަދަލުގައި ކުޅެން ނުކުތީ ސެލީމް އަމާލާ.

'66 - ކްރޮއޭޝިއާ އިން އިތުރު ދެ ބަދަލު. ލަވާޔާ އާއި މަޔާގެ ބަދަލުގައި ބްރޫނޯ ޕެޓްކޮވިޗް އާއި މާރިއޯ ޕަސަލިޗް.

'64 - މޮރޮކޯ އިން ބަދަލެއް. ޑާރީ އާއި ބުފާލްގެ ބަދަލުގައި ކުޅެން ނުކުތީ ބަދްރު ބެނޫން އާއި އަނަސް ޒަރޫރީ.

'61 - ކްރޮއޭޝިއާ އިން ބަދަލެއް. އަނިޔާއަކާ ގުޅިގެން ކްރަމަރިޗްގެ ބަދަލުގައި ކުޅެން ނުކުތީ ނިކޮލާ ވްލަސިޗް.

'56 - މޮރޮކޯ އިން ބަދަލެއް. ބިލާލް އެލް ކަނޫސްގެ ބަދަލުގައި ކުޅެން ނުކުތީ އަޒެއްދީން އުނާހީ.

'47 - ކްރޮއޭޝިއާގެ ހަމަލާއެއް. ޕެނަލްޓީ އޭރިއާ ބޭރުން އޯސިޗް ފޮނުވާލި ހަމަލާ، މޮރޮކޯގެ ޑިފެންޑަރު ޖަވާދް އެލް ޔަމީގްގެ ގައިގައި ޖެހި ވަނީ ބްލޮކްވެފައި.

ދެވަނަ ހާފަށް މޮރޮކޯ އިން ނުކުތީ ބަދަލަކާއެކު. ސަބީރީގެ ބަދަލުގައި ކުޅެން ނުކުތީ އިލިއާސް ޗެއާ.

މެޗުގެ ދެވަނަ ހާފުގެ ކުޅުން ފަށައިފި.

ފުރަތަމަ ހާފުގެ އުސްއަލިތައް:

ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-1 ގެ ނަތީޖާއަކުން ކްރޮއޭޝިއާ ކުރީގައި އޮވެގެން.

ފުރަތަމަ ހާފުގެ އިތުރު ވަގުތުގެ ގޮތުގައި ދެ މިނެޓުގެ ކުޅުން ދައްކައިފި.

'42 - ކްރޮއޭޝިއާ އިން ގޯލެއް ޖަހައި އަލުން ލީޑު ހޯދައިފި. މާކޯ ލިވާޔާ ދިން ބޯޅަ، މިސްލާވް އޯސިޗް ވަނީ ޕެނަލްޓީ އޭރިއާ ތެރެއިން ވަރަށް ރީތިކޮށް މޮރޮކޯގެ ކީޕަރު ބޯނޯގެ ބޯމަތިމަތިން ފޮނުވާލާފައި. އެ ބޯޅަ ގޯލުގެ ތެރެއަށް ވަދެފައިވަނީ މޮރޮކޯ ގޯލުގެ އަރިމަތީ ދަނޑީގައި ޖެހިފައި.

'37 - މޮރޮކޯގެ ނުރައްކަލެއް. ޒިޔެޗް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ، ޔޫސުފް އެން ނަސީރީ ބޮލުން ފޮނުވާލި ހަމަލާ، ކްރޮއޭޝިއާގެ ގޯލާ އަމާޒުވެފައެއް ނުވޭ.

'24 - ކްރޮއޭޝިއާގެ ނުރައްކަލެއް. މަޔާ ދިން ބޯޅައަކުން ޕެނަލްޓީ އޭރިއާ ބޭރުން ކެޕްޓަން ލޫކާ މޮޑްރިޗް ފޮނުވާލި ހަމަލާ، ކީޕަރު ޔަސީން ބޯނީ ވަނީ މަތަކޮށްފައި.

'18 - ކްރޮއޭޝިއާއަށް ރަނގަޅު ފުރުސަތެއް. ޕެރިސިޗް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، އަންދްރޭ ކްރަމަރިޗް ބޮލުން ފޮނުވާލި ހަމަލާ އަމާޒުވީ މޮރޮކޯގެ ކީޕަރު ޔަސީން ބޯނޯގެ އަތަށް.

'15 - ކްރޮއޭޝިއާގެ ހަމަލާއެއް. ޕެނަލްޓީ އޭރިއާ ބޭރުން ޖޮސިޕް ސަޓަނިސިޗް ފޮނުވާލި ހަމަލާ، މޮރޮކޯގެ ގޯލާ އަމާޒުވެފައެއް ނުވޭ.

'9 - މޮރޮކޯ އިން ގޯލެއް ޖަހައި ނަތީޖާ ހަމަހަމަކޮށްފި. ހަކީމް ޒިޔެޗް ނަގައިދިން ހިލޭ ޖެހުން، މަޔާގެ ބޮލުގައި ޖެހި ލިބުމުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން މޮރޮކޯއަށް އެ ގޯލު ކާމިޔާބުކޮށްދިނީ އަޝްރަފް ޑާރީ.

'7 - ކްރޮއޭޝިއާ އިން ގޯލެއް ޖަހައި، ލީޑު ހޯދައިފި. ހިލޭ ޖެހުމަކުން ލޮވްރޯ މަޔާ ދިން ބޯޅައަކުން އިވާން ޕެރިސިޗް ޖައްސާލި ބޯޅައަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން ކްރޮއޭޝިއާއަށް އެ ގޯލު ކާމިޔާބުކޮށްދިނީ ޖޮސްކޯ ގުވާޑިއޯލް.

މެޗުގެ ކުޅުން ފަށައިފި. ކިކްއޯފް ކުރީ ކްރޮއޭޝިއާ އިން.